އިސްލާމިކް މިނިސްޓްރީ އާއި އައިޔޫއެމް ދެމެދު މުހިއްމު ދެ އެއްބަސްވުމެއް!

އިސްލާމީކަންތައްތަކާއި އައުޤާފާ ބެހޭ ވުޒާރާއާއި ދިވެހިރާއްޖޭގެ އިސްލާމީ ޔުނިވާސިޓީ (އައި.ޔޫ.އެމް) އާ ދެމެދު މުހިއްމު ދެ އެއްބަސްވުމެއްގައި މިއަދު ސޮއިކޮށްފިއެވެ.

އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވުނު ޚާއްސަ ރަސްމިއްޔާތެއްގައި، ދެ މުއައްސަސާގެ ދެމެދުގައި ފުރަތަމަ ސޮއިކުރެވުނީ ދީނީ އަދި އިޖުތިމާޢީ ދާއިރާއިން ދިރާސާކުރުމަށް އެކުލަވާލި އެއްބަސްވުމެއްގައެވެ. މި އެއްބަސްވުމުގެ ދަށުން "ލޯކަލް ޓޫރިޒަމްގެ ސަބަބުން މުޖުތަމަޢަށް ކުރާ އަސަރު" ދެނެގަތުމަށްޓަކައި ޚާއްސަ ދިރާސާއެއް ހެދުމަށް ވަނީ ހަމަޖެހިފައެވެ.

މި އެއްބަސްވުމުގައި އިސްލާމީކަންތައްތަކާއި އައުޤާފާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރުގެ ނައިބު އަލްއުސްތާޛާ ޙައްވާ ލަޠީފްއެވެ. އަދި ދިވެހިރާއްޖޭގެ އިސްލާމީ ޔުނިވާސިޓީގެ ފަރާތުން ސޮއިކުރެއްވީ އެ ޔުނިވާސިޓީގެ ޑީން ޑރ. އާމިނަތު ޝާފިޔާ އާދަމްއެވެ.

މީގެ އިތުރުން، މި ރަސްމިއްޔާތުގައި ވަނީ އިސްލާމީ ޔުނިވާސިޓީން އިންތިޒާމުކޮށްގެން ބާއްވާ "ޢިލްމީ ކުރިއެރުމާއި ބެހޭ ބައިނަލްއަޤުވާމީ މަހާސިންތާ" އާ ގުޅޭ އެއްބަސްވުމެއްގައިވެސް ސޮއިކޮށްފައެވެ. މި އެއްބަސްވުމުގެ ދަށުން އެ މަހާސިންތާގެ ޕްލެޓިނަމް ސްޕޮންސަރެއްގެ ގޮތުގައި އިސްލާމީ ވަޤްފު ފަންޑު ވަނީ ހަމަޖައްސާފައެވެ.

މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ޑރ. މުޙައްމަދު ޝުކާއު ޢަބްދުލް ޙަކީމްއެވެ. އަދި އިސްލާމީ ޔުނިވާސިޓީގެ ފަރާތުން ސޮއިކުރެއްވީ ވައިސް ޗާންސެލަރ ޑރ. ވިސާލް މޫސާއެވެ.

މި އެއްބަސްވުންތަކުގެ މައިގަނޑު މަޤްޞަދަކީ ރާއްޖޭގެ އިޖުތިމާޢީ ފޭރާމަށް އަންނަ ބަދަލުތައް ދިރާސާކޮށް، ޢިލްމީ ދާއިރާއިން ގުޅުން ބަދަހިކުރުމެވެ. މި ދިރާސާތަކުގެ އަލީގައި މުޖުތަމަޢުގެ އިސްލާމީ އުޞޫލުތައް ހިމާޔަތްކުރުމަށް ކުރެވިދާނެ ކަންކަން ދެނެގަނެވޭނެ ކަމަށް އެ ވުޒާރާއިން މަޢުލޫމާތު ދެއެވެ.