
ފްލައިޓްތައް ކެންސަލްވުމާއި ގުޅިގެން ލަންކާއިން ނުފުރި ލަސްވާ ފަރާތްތަކުގެ ވިސާއަށް ލުއިތަކެއް

އައިޝަތު އިނާޝާ - 29 ނޮވެމްބަރު 2025 - 12:23
ސްރީލަންކާގައި ފާއިތުވި ދެ ދުވަހު މޫސުން ގޯސްވުމުގެ ސަބަބުން ބައެއް ސަރަހައްދުތަކުގައި ފެންބޮޑުވެ، ގިނަ ފްލައިޓުތައް ކެންސަލްވުމުގެ ސަބަބުން ނުފުރި ލަސްވާ ފަރާތްތަކުގެ ވިސާއަށް ލުއިތަކެއް ދިނުމަށް އެގައުމުގެ ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުން ނިންމައިފިއެވެ.
އެޤައުމުގައި ހުންނަ ދިވެހި އެމްބަސީން ބުނިގޮތުގައި ލަންކާގައި މިވަގުތު ތިބި އެހެން ގައުމުތަކުގެ ރައްޔިތުންނަށް މިހާލަތުގައި ނުފުރި ލަސްވުމާއި ގުޅިގެން ވިސާ ހަމަވުމުގެ މައްސަލަތައް ކުރިމަތިވަމުންދާތީ ސްރީލަންކާގެ އިމިގްރޭޝަނުން އެކަމުގައި ލުއިގޮތްތަކެއް ހަމަޖައްސަވައިދެއްވާފައިވާ ކަމަށެވެ. އެގޮތުން މިމަހުގެ 28 ވަނަ ދުވަހު ފުރަން ހަމަޖެހިފައިވާ ފަރާތްތަކުގެ ތެރެއިން މޫސުން ގޯސްވެ، ފްލައިޓްތައް ކެންސަލް ކުރުމާއި ގުޅިގެން ނުފުރި ތިބި ފަރާތްތަކުގެ ވިސާގެ ފީއާއި، ވިސާ ހަމަވެ އިތުރަށް މަޑުކުރަންޖެހޭ މުއްދަތުގައި އަރާ ޖޫރިމަނާ ފީތައް މާފު ކުރުމަށް ނިންމާފައިވާ ކަމަށް އެމްބަސީން ވަނީ ބުނެފަައެވެ.
ކުރު މުއްދަތަކަށް ދަތުރުކުރާ ފަތުރުވެރިންނާއި، ބިޒްނަސް ވިސާއާއި ރެސިޑެންސް ވިސާ ފުރިހަމަ ކުރުމަށް 7 ދުވަހުގެ މުހުލަތެއް ދިނުމަށްވެސް ލަންކާގެ އިމިގްރޭޝަނުން ވަނީ ނިންމާފައެވެ. އަދި މި ހިދުމަތްތައް ލަންކާގެ އިމިގްރޭޝަންގެ ވެބްސައިޓު މެދުވެރިކޮށް ލިބޭނެ އިންތިޒާމް ވަނީ ހަމަޖައްސާފައެވެ.
ލަންކާއަށް މިހާރު ކުރަމުންދާ ވިއްސާރައިގައި ގިނަ ފްލައިޓުތައް ކެންސަލްވުމުގެ ސަބަބުން ބައެއް ދިވެހީން ވެސް ވަނީ އެއާޕޯޓުގައި ތާށިވެފަައެވެ. ލަންކާގެ ބަންޑާރަނައިކެ އިންޓަނޭޝަނަލް އެއާޕޯޓުން މާލެ އަދި ގަމަށް މިއަދު އަންނަން ހަމަޖެހިފައިވާ ސްރީލަންކަން އެއާލައިންސް ފްލައިޓްތައް ވެސް ކެންސަލްވެފައިވާއިރު، އެ ފްލައިޓުން ދަތުރުކުރުމަށް އެއާޕޯޓަށް ދިޔަ ދިވެހީން އެއާޕޯޓުގައި ތާށިވިކަަމުގެ މައުލޫމާތު ވަނީ ލިބިފައެވެ.
ބާރުގަދަ ތޫފާނެއް ކަމުގައިވާ ދިތުވާއާ ގުޅިގެން ސްރީ ލަންކާއަށް ކުރަމުންދާ ވިއްސާރައިގައި ކުރިއަށް އޮތް ދުވަސްތަކުގައި ވެސް ވައި ބާރުވެ، އިތުރަށް ވާރޭ ވެހި، ފެންބޮޑުވުމުގެ ހާދިސާތައް ކުރިމަތިވާނެ ކަމުގެ އިންޒާރު މޫސުން ލަފާ ކުރާ އިދާރާތަކުން ވަނީ ދީފާއެވެ. މި ތޫފާނާގެ ސަބަބުން އެކި ސަރަޙައްދުތަކުގައި ފެންބޮޑުވުމާ ގުޅިގެން މަރުވި މީހުންގެ އަދަދު ވަނީ 69ށް އުފުލިފައެވެ.
ގުޅުން ހުރި ޙަބަރުތައް

6 ރަށެއްގައި އެއާޕޯޓް ތަރައްގީ ކުރުމަށް ދެ ކުންފުންޏަކާއެކު ފައިނޭސިންގް އެއްބަސްވުމަކަށް
3 އަހަރު ކުރިން

ނައިބު ރައީސް އަންނަ ހަފްތާގައި އައްޑޫއަށް ވަޑައިގަންނަވަނީ
3 އަހަރު ކުރިން

އެއިޑްސް ދުވަހުގެ ހަރަކާތްތައް ގއ.އަތޮޅުގައި ކުރިޔަށްދަނީ
3 އަހަރު ކުރިން

ޓައިމް މެގަޒިންގެ އަހަރުގެ ޝަހުސިއްޔަތަކީ ޒްލެންސްކީ
3 އަހަރު ކުރިން


