މިސްކިތްތައް މަރާމާތު ކުރަން ފައިސާ ހޯދާތީ މިނިސްޓްރީން ކަންބޮޑުވެއްޖެ

މާލޭގެ މިސްކިތްތައް މަރާމާތު ކުރުމަށް ޓެލެތޯން ހިންގައިގެން ފައިސާ ހޯދާތީ، އިސްލާމިކް މިނިސްޓްރީން ކަންބޮޑުވުން ފާޅުކޮށްފިއެވެ.

ޕީއެސްއެމްނިއުސްއަށް މަޢުލޫމާތު ދެއްވަމުން މިނިސްޓަރ އޮފް އިސްލާމިކް އެފެއާޒް ޑރ.އަޙްމަދު ޒާހިރު ވިދާޅުވެފައިވަނީ 2020 ވަނަ އަހަރު އެމަސައްކަތް ކުރުމަށް 1 މިލިއަން ރުފިޔާގެ ބަޖެޓެއް ސިޓީ ކައުންސިލަށް ދޫކޮށްފައިވާނެކަމަށެވެ.

އަދި ފައިސާ ބޭނުންކުރާ ގޮތުގެ ރިޕޯޓު ހުށައެޅުމަށް އެންގުމުން އެގޮތަށް ޢަމަލުނުކުރުމުން 2021 ވަނަ އަހަރުވެސް އެފައިސާ ބޭނުންކުރެވޭނެ ކަމަށް މިނިސްޓްރީން ކައުންސިލަށް އަންގާފައިވާނެ ކަމަށް މިނިސްޓަރ ވިދާޅުވިއެވެ. އެހެންނަމަވެސް 2021 ވަނަ އަހަރުވެސް އެފާއިސާ ބޭނުންކުރި ގޮތުގެ ރިޕޯޓު ހުށަނާޅާތީ ސުވާލުކުރުމުން ސިޓީ ކައުންސިލުން އެފައިސާ ބޭނުން ނުކުރާ ކަމަށާއި އެފައިސާ އެބަހުރިކަމަށް އޭރު ބުނެފައިވާ ކަމަށް އިސްލާމިކް މިނިސްޓްރީން ވިދާޅުވެއެވެ.

2022 ވަނަ އަހަރުވެސް 2 މިލިއަން ރުފިޔާގެ ބަޖެޓެއް މާލޭގެ މިސްކިތްތައް މަރާމާތުކުރުމަށް ކަނޑައަޅާ، އެކަން ސިޓީ ކައުންސިލަށް އަންގާފައިވާނެ - މިނިސްޓަރ

މާލެ ސިޓީގެ މިސްކިތްތަކުގެ އާބާތުރަ ފިލުވުމަށް ސަރުކާރުން އަހަރެއްގެ މައްޗަށް ދެނީ އެންމެ އެއް މިލިއަން ރުފިޔާ ކަމަށާއި މިސްކިތްތަކުގެ އާބާތުރަ ފިލުވުމުގެ މަސައްކަތަށް މިހާރު ވެސް ނުވަ މިލިއަނެއްހާ ރުފިޔާ ބޭނުންވާ ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވަނީ ވިދާޅުވެއްފައެވެ.

މިއަދު ހަވީރު 16:00-18:00 އަކަށް އާޓިފިޝަލް ބީޗުގައި ކުޑަކުދިންގެ ހަވީރަކާއި އެކު ޗާލު މިސްކިތް ހަރަކާތް ކުރިއަށް ދާނެ. ހުރިހާ ބޭފުޅުންވެސް އާއިލާ އާއި އެކު ވަޑައިގެން މިސްކިއްތަކުގެ މަރާމާތައް ވީވަަރަކުން އެހީތެރިކަން ފޯރުކޮށްދެއްވާ!! pic.twitter.com/oza4ncwZk5

— Male' City Council (@MaleCitymv) January 7, 2023

މާލޭ ސިޓީ ގެ މިސްކިތްތަކުގެ އާބާތުރަ ފިލުވުމުގެ މަސައްކަތަށް ބޭނުންވާ ފައިސާ ސަރުކާރުން ފޯރުކޮށް ނުދިނުމުގެ ސަބަބުން އެކަމަށް ބޭނުންވާ ފައިސާ ހޯދުމަށްޓަކައި މާލެ ސިޓީ ކައުންސިލުން އިންތިޒާމްކޮށްގެން ކުރިއަށް ގެންދާ ” ޗާލު މިސްކިތް ”، ހަރަކާތް ފައްޓަވާ ދެއްވަމުން މޭޔަރު ވިދާޅުވީ މާލޭގެ މިސްކިތްތައް މަރާމާތު ކުރަން ސަރުކާރުން ދޭ އެއް މިލިއަން ރުފިޔާއަކީ މިސްކިތްތައް މަރާމާތު ކުރަން އެކަށޭނެ އަދަދެއް ނޫން ކަމަށެވެ. އެހެންކަމުން ، ދެ ދުވަހުގެ މުއްދަތަކަށް މި ހަރަކާތް ކުރިއަށްގެގޮސް ފައިސާގެ އެހީ ހޯދުމަށް ކައުންސިލަށް މަޖުބޫރު ވީކަމުގައެވެ.

“މާލެ ސިޓީގެ ސްޓްރެޓެޖިކް އެކްޝަން ޕްލޭންގައި އެންމެ އިސްކަމެއް ދޭ ކަމެއްގެ ގޮތުގައި އޮތީ މާލޭގެ މިސްކިތްތައް ޒީނަތްތެރިކުރުން. އަޅުގަނޑުމެންގެ ފަލްސަފާއެއް ގޮތުގައި ޕްލޭންގައި ފާސްކޮށްފައި އޮންނާނީ މާލޭގެ އެންމެ ރީތި ބިނާތައް ކަމުގައި ވާންޖެހޭނީ މިސްކިތްތައް ކަމަށް.” މޭޔަރުގެ ވާހަކަފުޅުގައި ވިދާޅުވިއެވެ.

މޭޔަރު ވިދާޅުވީ މިހާރު އޮތް ކައުންސިލްގެ ދައުރު ފެށުނު އިރު މާލޭ މިސްކިތްތަކުގައި މަރާމާތަށާއި އާބާތުރަ ފިލުވުމަށް 14 މިލިއަން ރުފިޔާގެ މަސައްކަތް ކުރަން ހުރި ކަމަށެވެ. އޭގެ ތެރެއިން ހަތަރު މިލިއަން ރުފިޔާގެ މަސައްކަތް ކައުންސިލުގެ ބަޖެޓުންނާއި އެހެނިހެން ގޮތްގޮތުން ކޮށްފައިވާ ކަމަށެވެ.