ޔާމީނުގެ ހުކުމާއެކު ގައުމު ވެއްޓިފައި މިވަނީ ފުން އަދަވަޅަކަށް ކަމަށް މާލެ ސިޓީ ކައުންސިލުން ބުނެފި

ރައީސް ޔާމީނުގެ މައްޗަށް ކްރިމިނަލް ކޯޓުންކުރި ހުކުމާއެކު ގައުމު ވެއްޓިފައި މިވަނީ ފުން އަދަވަޅަކަށް ކަމަށް މާލެ ސިޓީ ކައުންސިލުން ބުނެފިއެވެ.

މާލެ ސިޓީ ކައުންސިލުން ނެރުނު ނޫސްބަޔާނެއްގައި ބުނެފައި ވަނީ، ރައީސް ޔާމީންގެ މައްޗަށް ކުރި ހުކުމަކީ ކުރިއަށް އޮތް ދިވެހި ރާއްޖޭގެ ރިޔާސީ އިންތިޙާބުގައި އިދިކޮޅު ރިޔާސީ ކެންޑީޑޭޓެއްގެ ގޮތުގައި އެ މަނިކުފާނު ވާދަކުރެއްވުމަށް ވަރަށް ގިނަ ރައްޔިތުންތަކެއްގެ ރުހުމާއެކު ނިކުންނެވުމުން އެ ފުރުސަތުވެސް އެ މަނިކުފާނުގެ ކިބައިން ނިގުޅައިގަތުމުގެ ނިޔަތުގައި ކޮށްފައިވާ ހުކުމެއް ކަމުގައި ނޫނީ ނުވާނެ ކަމަށެވެ.

މީގެ އިތުރުން، ޔާމީންގެ މައްޗަށް ކުރި ހުކުމާއެކު ގައުމު ވެއްޓިފައިވަނީ ފުން އަނދަވަޅަކަށް ކަމަށް ބުނެ، އެކަމުން އަރައިގަނެ އެމަނިކުފާނު އެނބުރި ރައްޔިތުންގެ ހިދުމަތަށް އައުމުގެ ހެޔޮ ތައުފީގު މިންވަރުކުރެއްވުން އެދި الله ސުބުހާނަހޫ ވަތައާލާގެ ހަޒުރަތުގައި ދުއާ ދަންނަވާ ކަމަށްވެސް ސިޓީ ކައުންސިލުގެ ބަޔާނުގައި ބުނެފައިވެއެވެ.

މާލެ ސިޓީ ކައުންސިލުން މިފަދަ ބަޔާނެއް މިއަދު ނެރެފައިވާއިރު، އިއްޔެ ރައީސް ޔާމީންގެ މައްޗަށް އިއްވި ހުކުމާއެކު މާލެ ސިޓީގެ މޭޔަރ އަދި ޕީޕީއެމް/ޕީއެންސީގެ ނައިބު ރައީސް ޑރ. މުހައްމަދު މުއިއްޒު އިދިކޮޅު ކޯލިޝަންގެ ރިޔާސީ ޓިކެޓު ހޯދުމަށް މަސައްކަތްކުރާ ކަމުގެ ތުހުމަތުގެ އަޑުވަނީ ގަދަވެފައެވެ.