ވެމްކޯގެ އެއްބާސްވުން އާނުކޮށް މާލެ ސާފުކުރުން ސިޓީ ކައުންސިލަށް ނަގައިފި

މާލެ ސިޓީގެ މަގުތައް ކުނިކަހާ ސާފުކުރުމުގެ މަސައްކަތްކުރުމަށް ވެމްކޯ އާއި ސިޓީ ކައުންސިލާއި ހަދާފައިވާ އެއްބަސްވުން އާނުކޮށް، އެ މަސައްކަތް ސިޓީ ކައުންސިލުގެ ދަށަށް ގެނެސްފިއެވެ.

މާލެ ސާފުކޮށް ބެލެހެއްޓުމުގެ ގޮތުން ހަދާފައިވާ އެއްބަސްވުމުގެ މުއްދަތު ހަމަވެފައި ވަނީ 25 ޑިސެމްބަރު 2022 ވަނަ ދުވަހު އެވެ. މި އެއްބަސްވުމަކީ 5 އަހަރު ދުވަހުގެ މުއްދަތަކަށް ހަދާފައިވާ އެއްބަސްވުމެކެވެ.

ކައުންސިލުން މި އެއްްބަސްވުން އާނުކުރާން ނިއްމީ، އެ މަސައްކަތް ކައުންސިލުގެ ބެލުމުގެ ދަށުން، ކައުންސިލުން އަމިއްލައަށް ކުރުމުގެ ވިސްނުމުގައެވެ.

މާލޭގެ އާންމު ތަންތަނުގެ ހުރިހާ ތަނެއް ސާފުކޮށް، ކުނިކަހާ، ކުނިބުނި ނަގާނީ މީގެ ފަހުން ދެން ސިޓީ ކައުންސިލުންނެވެ.

މިކަމާއި ގުޅިގެން 'އަސްލު' ނޫހުން ބަހެއް ހޯދާލުމަށް މާލެ ސިޓީގެ މޭޔަރު ޑރ. މުހައްމަދު މުއިއްޒަށް ގުޅާލުމުން ފޯނަށް ޖަވާބު ނުދެއްވާތީ ވަނީ ބަހެއް ލިބޭ ގޮތް ނުވެފައެވެ.