ރާއްޖެއަކީ އަމާން އަދި ސުލްހަވެރި ގައުމެއްގެ ގޮތުގައި ބޭއްވުމަށް މަސައްކަތް ކުރަންޖެހޭ: ނައީބް ރައީސް

ރާއްޖެއަކީ އަމާން އަދި ސުލްހަވެރި ގައުމެއްގެ ގޮތުގައި ބޭއްވުމަށް މަސައްކަތް ކުރުމަށް ނައިބު ރައީސް ހުސެއިން މުހައްމަދު ލަތީފް ޒުވާނުންނަށް އިލްތިމާސް ކުރައްވައިފިއެވެ.

ހުރަވީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ނައިބު ރައީސް ވިދާޅުވީ ރާއްޖެއަކީ އަމާން އަދި ސުލްހަވެރި ގައުމެއްގެ ގޮތުގައި ބޭއްވުމަށް މަސައްކަތް ކުރަންޖެހޭ ކަމަށެވެ. އަދި ރާއްޖޭގެ ފަސްގަނޑުން އެއްވެސް ބައެއް އެހެން ބަޔަކަށް ލިބުމަށް އެއްވެސް ރައްޔިތަކު ބޭނުން ނުވާނެކަން ފާހަގަ ކުރައްވައި، ނައިބް ރައީސް ވަނީ ފަންނީ ހުނަރުތައް ދަސްކުރުމަށް ޒުވާނުންނަށް އިލްތިމާސް ކުރައްވައިފައެވެ.

ނަމޫނާ ދެއްކޭނީ ދޮންބަންޑާރައިން ފަދަ ބަތަލުންނަށް އަދާކުރަން ޖެހޭ ހައްގު ޝުކުރު މިއަދު އަދާ ކޮށްގެންކަން ފާހަގަ ކުރައްވައި، ނައިބު ރައީސް ވިދާޅުވީ ޝުކުރު އަދާކުރި ކަމަށް ވާނީ ޒުވާނުންނަކީ ފަންނީ ގޮތުން ހުނަރުވެރި ޒުވާނުންނަށް ވާން ސަރުކާރުން ކުރާ މަސައްކަތުގައި އަމަލާއި ބަހުން ބައިވެރި ވެގެން ކަމަށެވެ.

ނައިބް ރައީސް ވިދާޅުވީ އަދުގެ ޒުވާން ޖީލަކީ މާދަމާއަށް ނަމޫނާ ޖީލަކަށް ވާންޖެހޭ ބައެއް ކަމަށާއި،ޒުވާނުންނަކީ ފަންނީ ގޮތުން ހުނަރުވެރި ބަޔަކަށް ހެދުމަށްޓަކައި އަދުގެ ސަރުކާރުން ކުރައްވާ މުހިންމު މަސައްކަތްޕުޅުތަކުގައި ޢަމަލާއި ބަހުން ޝާމިލްވެ، ގައުމީތަރައްގީއަށް ބޭނުންވާ ލަނޑުދަނޑިތައް ހާޞިލު ކުރުމަށް އެ މަނިކުފާނު ގޮވާލެއްވިއެވެ.

އަދުގެ ސަރުކާރުން ދިވެހި ގައުމުގެ އެންމެ މަތީ މަސްލަހަތުން ފެށިގެން އާންމު މަސްލަހަތުތައް ހިމާޔަތްކުރުމަށް ގިނަގުނަ މަސައްކަތްތަކެއް ކުރައްވާ ކަމަށާއި، ފަންނިއްޔާތުގެ ދާއިރާއަށް އަންނަމުންދާ ހަލުވި ތަރައްޤީއާއި، މަސްނޫއީ ވިސްނުން ފުޅާވާމުން އަންނަ އައުމާއެކު ސައިބަރ ސަލާމަތީ ފިޔަވަޅުތައްވެސް ކަމާބެހޭ ފަރާތްތަކުގެ ފަންނީ އެހީއާއެކު ހަރުދަނާކުރައްވަމުން ގެންދަވާކަން އެ މަނިކުފާނު ފާހަގަކުރެއްވިއެވެ.

ރައީސުލްޖުމުހޫރިއްޔާ ޑޮކްޓަރ މުޙައްމަދު މުޢިއްޒުގެ ދުރު ވިސްނުންފުޅާއެކު ގައުމީ މަސްލަހަތަށްޓަކައި ކަމާބެހޭ އެންމެހައި ފަރާތްތަކާއި، ގައުމީ މަސްލަހަތުވެރީންނާ، އެކުވެރި ގުޅުންތަކާއެކު އުޚުއްވަތްތެރިކަމުގެ ވިޔުގައެއް ގާއިމުކުރެވެމުންދާ ކަމަށާއި، ދިވެހި އަސްކަރީ ބާރުވެރިކަމާއި، ދިވެހި ރައްޔިތުންނަށް ދެމުންދާ ސަލާމަތީ ހިދުމަތުގެ ދަންމަރު އެމަނިކުފާނު ގެންދަވަނީ ދުވަހެއް ދުވަހަކަށް ވަރުގަދަކުރައްވަމުންކަންވެސް ނައިބް ރައީސް ވާހަކަފުޅުގައި ފާހަގަކުރެއްވިއެވެ.