ބޭރު ފައިސާ މާރުކުރުން ނުވަތަ ފޮރިންގ އެކްސްޗޭންޖުގެ ބިލަށް ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަންގެ ރައީސް އަދި ކާނި ހޮޓެލްސްގެ ސީއީއޯ އަބްދުﷲ ނަޝީދު (ކާނި އަބްދުﷲ) ތާއީދުކުރައްވާކަން ހާމަކުރައްވައިފިއެވެ.
ފޮރިން އެކްސްޗޭންޖްގެ ކަންކަން ހަރުދަނާ ކުރުމަށްޓަކައި ބޭރު ފައިސާއާބެހޭ ބިލެއް އެކުލަވައިލުމުގެ މަސައްކަތް ކަމާބެހޭ މުއައްސަސާތަކާ ގުޅިގެން ކުރަމުން އަންނަ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފައިވާއިރު އެކަމާ ގުޅިގެން އެކްސްގައި ކުރެއްވި ޕޯސްޓެއްގައި ކާނި އަބްދުﷲ ވަނީ އެ ބިލަށް ތާއީދުކުރައްވާ ކަން ހާމަކުރައްވާފައެވެ.
އެ ޕޯސްޓުގައި ކާނި އަބްދުﷲ ވަނީ އެމްއެމްއޭއިން ކުރަމުންދާ އެ މަސައްކަތަށް ތައުރީފު ކުރައްވައި، އެއީ ރަނގަޅު ނިންމެވުމެއް ކަމަށް ވިދާޅުވެފައެވެ.
ޑްރާފްޓުކޮށްފައިވާ ބިލުގައި ބޭރު ފައިސާ މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައި ވެއެވެ.
އެގޮތުން ގިނަވެގެން 24 ގަޑިއިރު ހޭދަކޮށްފައިނުވާ ޓޫރިސްޓުން، އުމުރުން ދެއަހަރު ފުރިހަމަނުވާ ކުޑަކުދިން، ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ ފަރާތްތައް އޭގެތެރޭގައި ހިމެނެއެވެ.
މިހާރު އެކުލަވާލާފައިވާ ބިލުގައި ހިމެނޭ އިތުރު ބަދަލުތަކުގެ ތެރޭގައި ގާނޫނާ އެއްގޮތްވާ ގޮތުގެމަތިން ބޭރުފައިސާއިން މުއާމަލާތްކުރުމަށް ކަނޑައަޅާފައިވާ ކަންކަމަށް ފިޔަވައި، ދިވެހިރާއްޖެއިން ދިވެއްސަކު ހޯދާ މުދަލާއި ހިދުމަތްތަކަށް ބޭރު ފައިސާއިން އަގު އަދާކުރަން ލާޒިމެއް ނުކުރެވޭނެ ކަމަށާއި އަހަރެއްގެ ތެރޭގައި ވިހި މިލިއަން އެމެރިކާ ޑޮލަރަށްވާ އަދަދަށް ބޭރު ފައިސާ ލިބޭ ވިޔަފާރިތައް އެ ފަރާތްތަކަށް ލިބޭ ބޭރުފައިސާގެ އާމްދަނީ ރާއްޖޭގެ ބޭންކު އެކައުންޓަކަށް ޖަމާކުރަން ޖެހެއެވެ. އަދި އެ އާމްދަނީގެ 25 ޕަސެންޓަށް ވާ ފައިސާ މާރުކުރަން ޖެހޭނެއެވެ.
އަދި 50 ކޮޓަރިއަށް ވުރެ މަދުން ނުވަތަ ގިނައިން ހުރި ގެސްޓްހައުސްތަކާއި ސަފާރީ އުޅަނދުތައް ކެޓަގަރީ ބީއަށް ވަނީ ބަދަލުކޮށްފައެވެ. ކުރިން އެމްއެމްއޭ އިން އާންމުކުރި ބޭރު ފައިސާގެ ގަވާއިދުގައި އޮތް ގޮތުން މީހުން ދިރިއުޅޭ ރަށްރަށުގައި 50 ކޮޓަރިއަށް ވުރެ ގިނައިން ހުންނަ ހޮޓާތަކާއި ސަފާރިތަކުން އަންނަ ކޮންމެ ޓޫރިސްޓެއްގެ ބޮލަށް 500 މާރުކުރަން ޖެހޭނެއެވެ. ނަމަވެސް އާންމުންގެ ހިޔާލު ހޯދުމަށް ރޭ ހުޅުވާލި ބިލުގެ ޑްރާފްޓުގައި ރަށްރަށުގައި ހިންގާ ހޮޓާތަކާއި ސަފާރީތައް ވަނީ 500 ޑޮލަރު މާރުކުރަންޖެހޭ އޭ ކެޓަގަރީގެ ތަންތަނުން، 25 ޑޮލަރު މާރުކުރަން ޖެހޭ ބީ ކެޓަގަރީއަށް ބަދަލުކޮށްފައެވެ.
ރާއްޖޭން ބޭރުގައި ރަޖިސްޓަރީކޮށްފައިވާ ޓޫރިސްޓު އުޅަނދުތައް މި ބިލުން އިސްތިސްނާވާނެ ކަމަށް އެމްއެމްއިން ބުނެއެވެ.
