ބޭންކް އޮފް މޯލްޑިވްސްއިން މިއަދު މާސްޓަރކާޑްގެ ބިޒްނަސް ޕްރީޕެއިޑް ކާޑު ތައާރަފް ކޮށްފިއެވެ.
ބޭންކުން ބުނިގޮތުގައި މިއީ، ވިޔަފާރިތަކަށް ފަސޭހަކަމާއި ރައްކާތެރިކަމާއެކު ފައިސާ ދެއްކުމުގެ މުއާމަލާތްކުރުމަށް ފުރުސަތު ހޯދާދިނުމުގެ ގޮތުން ތައާރަފްކުރި ހިދުމަތެކެވެ.
ކުދި ވިޔަފާރިތަކުން ފެށިގެން ބޮޑެތި ވިޔަފާރިތަކުންވެސް ކުރާ މުއާމަލާތްތަކުގައި ނަގުދު ފައިސާގެ ބަދަލުގައި މާސްޓަރކާޑް ޕްރީޕެއިޑް ކާޑު ބޭނުންކޮށްގެން މުއާމަލާތްތަކުގެ ތަފްސީލު ރައްކާތެރިކަމާއެކު ބެލެހެއްޓި، ނަގުދު ފައިސާއާ ނުލައި ވިޔަފާރިއާ ގުޅޭ ހަރަދު ކުރުމަށް މަގުފަހިވެގެންދާނެ ކަމަށް ބޭންކުން ބުނެއެވެ.
ބީއެމްއެލްއިން ބުނީ ބިޒްނަސް ޕްރީޕެއިޑް ކާޑުގެ ރުފިޔާ ކާޑާއި ޑޮލަރު ކާޑުވެސް ލިބޭނެ ކަމަށެވެ. އެ ގޮތުން މި ދެބާވަތުގެ ކާޑުންވެސް ރާއްޖޭގެ ޕީއޯއެސް، ޕޭމަންޓް ގޭޓްވޭ އަދި އޭޓީއެމްތަކުގައި މުއާމަލާތުކުރެވޭނެ ކަމަށާއި ޑޮލަރު ކާޑުން ބޭރު ގައުމުތަކުގެ ޕީއޯއެސް މެޝިނާއި ޕޭމަންޓް ގޭޓްވޭ ތަކުގައި ބޭނުން ކުރެވޭނެ ކަމަށެވެ. މި ކާޑުތަކުން ދުވާލަކު 100،000 ދިވެހި ރުފިޔާ އަދި 50،000 ޑޮލަރުގެ މުއާމަލާތްކުރެވޭނެއެވެ. އަދި 200،000 ރުފިޔާ ނުވަތަ 50،000 ޑޮލަރު ކާޑަށް ރީލޯޑްކުރެވޭނެއެވެ. ކާޑުތަކުން ކޮށްފައިވާ މުއާމަލާތްތަކުގެ ތަފްސީލް އަދި ބެލެންސް އިންޓަރނެޓް ބޭންކިންގ އަދި މޯބައިލް އެޕް މެދުވެރިކޮށް ބަލާލެވޭނެ ކަމަށް ބީއެމްއެލް އިން ބުނެއެވެ.
"އަޅުގަނޑުމެންގެ ކާޑް ޕާރޓްނަރ ، މާސްޓަރކާޑާ ގުޅިގެން ވިޔަފާރިތަކަށް ޑިޖިޓަލް ބޭންކިންގ ސޮލިއުޝަނެއް ހޯދައިދެވޭކަމީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. މި ތައާރަފް ކުރެވުނު ބިޒްނަސް ޕްރީޕެއިޑް މާސްޓަރކާޑަކީ ވިޔަފާރިތަކަށް އެހީތެރިވުމުގެ އިތުރުން ވިޔަފާރިތަކުން ބޭނުންވާފަދަ ޒަމާނީ ހިދުމަތްތައް ދިނުމަށް އެޅުނު މުހިންމު ފިޔަވަޅެއްވެސްމެ." ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ، މުޙައްމަދު ޝަރީފް ވިދާޅުވިއެވެ.
މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 93 ސެލްފްސަރވިސް ބޭންކިންގ ސެންޓަރ، 148 އޭޓީއެމް، އޭޖެންޓު ބޭންކިންގ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިންގ ހިދުމަތާއެކު ބޭންކް އޮފް މޯލްޑިވްސްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.
