އެންމެ ހެޔޮ ޢަމަލުތަކުގެ ތެރޭގައި އިލްމު ހޯދުން ހިމެނޭ

މާތް ﷲގެ މަގުގައި މީހަކަށް ކުރެވޭނެ އެންމެ ހެޔޮ އަމަލުތަކުގެ ތެރޭގައި ޢިލްމު ހޯދުމަށް މަސައްކަތް ކުރުން ހިމެނޭކަމަށް މިއަދުގެ ހުކުރު ޚުތުބާގައި ބުނެފި އެވެ.

މިއަދުކީ ޚުތުބާގައި ބުނީ އިލްމު އުނގެނުމަށް ވަކި ޢުމުރެއް އަދި ވަކި ޖިންސެއް ނޯންނަ ކަމަށާއި މަންމަގެ އުނގުން ފެށިގެން ކަށްވަޅަށް ދާންދެން ޢިލްމު އުނގެނުމަށް ގަދައަޅައި މަސައްކަތް ކުރަންޖެހޭ ކަމަށެވެ. މާތް ﷲ ގެ މަގުގައި މީހަކަށް ކުރެވޭނެ އެންމެ ހެޔޮ ޢަމަލުތަކުގެ ތެރޭގައި ޢިލްމު ހޯދުމަށް މަސައްކަތް ކުރުން ހިމެނޭ ކަމަށާއި އެއީ، ސުވަރުގެއަށް ވާޞިލުކޮށްދޭނެ ކަމެއް ކަމަށް ހުތުބާގައި ބުނެފައިވެ އެވެ.

ޢިލްމުވެރިންނަކީ ނަބިއްޔުންގެ ވާރުތަވެރީން ކަމަށާއި ނަބީބޭކަލުން ވާރުތަ ކުރެއްވީ ޢިލްމު ކަމަށްވާއިރު ދުނިޔަވީ އެއްވެސް މާއްދީ މުދަލެއް އެ ބޭކަލުންގެ ކިބައިން ވާރުތައެއް ނުވާ ކަމަށް ބުނެފައިވެ އެވެ.

"އަހަރެމެންގެ ތެރެއިން ހަމަ ކޮންމެ މީހަކުވެސް ސުވަރުގެއަށް ދިއުމަށް ޝައުޤުވެރިވާނެކަން ކަށަވަރެވެ! މާތް ﷲ ގެ ވަޖުހުފުޅަށްޓަކައި ޢިލްމު އުނގެނުމަށް މަސައްކަތް ކުރުމަކީ ސުވަރުގެއަށް ދިއުމަށް ކޮށޭނެ މަގެކެވެ،" ހުތުބާގައި ބުނެފައިވެ އެވެ.

މި ފެށޭ ދިރާސީ އާ އަހަރުގެ މައްޗަށް އަލިއަޅުވައިލައްވަމުން ހުތުބާގައި ވަނީ ދަރިވަރުންނަށް ލިބިފައިވާ ފުރުޞަތު ބޭކާރުކޮށް ނުލައި، ﷲ ގެ ވާގިފުޅާއެކު ހިންމަތާއެކު މަސައްކަތްކޮށް، ވަގުތުގެ ބޭނުން އެންމެ ހެޔޮގޮތުގައި ހިފުމަށް ޢަޒުމް އާކުރަން ނަސޭހަތްތެރިވެފަ އެވެ.