ރާއްޖޭގެ މެރިޓައިމް ދާއިރާއަށް އިންޤިލާބީ ބޮޑު ބަދަލެއް ރައީސް، ޑރ. މުހައްމަދު މުއިއްޒު ގެންނަވާނެ ކަމަށް އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވެއްޖެއެވެ.
ރައީސް ލ. ފޮނަދޫ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން ވަޖީހު ވިދާޅުވީ، ރައީސްގެ އިޤްތިސާދީ އެޖެންޑާގައި މުހިންމު ކަންތައްތައް ހިމަނުއްވާފައިވާ ކަމަށެވެ. އަދި އެކަމަކީ ރާއްޖެއަށް އިޤްތިސާދީ ބޮޑެތި ބަދަލުތަކެއް އަންނާނެ ކަމެއް ކަމަށް ވިދާޅުވިއެވެ.
"އަޅުގަނޑަށް ޤަބޫލުކުރެވެނީ މިއިން ޒަމާނަކު ރާއްޖޭގެ އިޤްތިސާދީ ކަންކަމާ މެދު ރައީސްއަކު ނުވިސްނާ މިންވަރަށް ރައީސް ޑރ. މުއިއްޒު ވިސްނާވާކަން، ރައީސް އަކީ އިޤްތިސާދީ މާހިރެއް. ރާއްޖެ ހުންނަ ސަރަހައްދަކީ ރެއަކާ ދުވާލު އެތައް ބިލިއަން ޑޮލަރުގެ ވިޔަފާރީ ދައުރުވަމުންދާ ތަނެއް ނަމަވެސް އޭގެ ބޭނުން އެއްވެސް ސަރުކާރަކުން މިހާތަނަކަށް ހިފާފައެއް ނުވޭ، އެކަމާއި ވިސްނެވީ ވެސް އެންމެ ފުރަތަމަ ރައީސް" ވަޖީހު ވިދާޅުވިއެވެ.
ވަޖީހު ވިދާޅުވީ، ރާއްޖޭގެ އެކި ސަރަހައްދުތަކުގައި ތަރައްޤީ ކުރާ ތިން ޕޯޓުގެ މަސައްކަތް ވެސް އެމްޕީއެލްއާ ހަވާލުކޮށްފައިވާތީ އެއީ ލިބުނު ވަރަށް ބޮޑު ޝަރަފެއް ކަމަށެވެ. އަދި ރައީސްގެ ސްޕީޑުގައި މަސައްކަތްކޮށްގެން ނަތީޖާ ނެރެދެއްވާނެ ކަމަށް ވެސް ވިދާޅުވިއެވެ.
މެރިންޓައިމް ހަބްގައި މައިގަނޑު 6 ބައެއް ވާނެ ކަމަށް ވަޖިހު ވިދާޅުވިއެވެ. އޭގެ ތެރެއިން ލ. ގާދޫގައި އޮފް ޝޯ ބަންކަރިން އަކީ ސަރަހައްދުން ދަތުރުކުރާ ބޯޓުތަކަށް ހިދުމަތްދޭނެ ކަމަށާއި ކްރޫޒް ޓާމިނަލް ޤާއިމުކުރެވުމުން ފިހާރަތަކާއި ކެފޭތަކާ ރެސްޓޯރެންޓް ޤާއިމުކުރެވިގެންދާނެ ކަމަށް ވެސް ވިދާޅުވިއެވެ.
ސުޕަރޔޮޓް މެރީނާ އިން ޔޮޓްތަކަށް ހިދުމަތްދޭނެ ކަމަށް ވެސް ވިދާޅުވިއެވެ. އަދި ރާއްޖެއަށް ޔޮޓްތައް އައުމުން ވެސް އިޤްތިސާދީ މަންފާ ލިބިގެންދާނެކަން ވަޖީހު ފާހަގަކުރެއްވިއެވެ. އަދި ތިމާވެއްޓާ ރައްޓެހި ރިސޯޓަކަށް ލ. ގާދޫ ޚާއްސަކޮށް ވެލާ ދިރުވާ އާލާކުރާނެ ކަމަށާއި ފަޅުގައި ރޫމްތައް ހަދާނެ ކަމަށް ވެސް ވިދާޅުވިއެވެ.
ވަޖީހު އިތުރަށް ވިދާޅުވީ މި މަސައްކަތްތައް ރާއްޖޭގައި ފެށުމަށް ތައްޔާރުވަމުން އަންނައިރު މާރކެޓް ހޯދުމުގެ މަސައްކަތް ފަށާފައިވާ ކަމަށާއި އޮޕަރޭޓަރުންނާ ވާހަކަ ދައްކައިގެން އެމީހުން ޝައުޤުވެރިވާ ގޮތަށް މަސައްކަތް އެމްޕީއެލުން ކުރާނެ ކަމަށެވެ.
