ހއ. ދިއްދޫގައި 1500 މީހުންގެ ޖާގައިގެ އިސްލާމިކް ސެންޓަރެއް

ހއ. ދިއްދޫގައި 1500 މީހުންގެ ޖާގައިގެ އިސްލާމިކް ސެންޓަރެއް ޢިމާރާތްކުރުމަށް ކުންފުންޏާކާ ޙަވާލުކޮށްފިއެވެ.

މިއަދު ހެނދުނު އިސްލާމިކް މިނިސްޓްރީގެ ހޯލުގައި ބޭއްވި ރަސްމިޔާތެއްގައި ވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާ " "ދިއްދޫ އިސްލާމިކް ސެންޓަރު" " އިމާރާތް ކުރުމަށް ހަވާލުކޮށްފައެވެ.

ދިއްދޫ އިސްލާމިކް ސެންޓަރު އިމާރާތް ކުރުމުގެ އެއްބަސް ވުމުގައި ރަސްމިއްޔާތުގައި ދިއްދޫ ދާއިރާގެ މެމްބަރު މުހައްމަދު ވަހީދު ބައިވެރިވެވަޑައިގަންނަވާފައި ވެއެވެ. އިސްލާމިކް މިނިސްޓްރީގެ ފަރާތުން ސޮއި ކުރެއްވީ އިސްލާމިކް މިނިސްޓަރ ޑރ. އަޙްމަދު ޒާހިރު ޢަލީ އެވެ. އަދި ރަޝީދު ކާޕެންޓްރީގެ ފަރާތުން ސޮއިކުރެއްވީ އެކުންފުނީގެ ޑިރެކްޓަރ އާދަމް ރަޙީމެވެ.

މި އިމާރާތުގައި އެއްފަހަރާ 1500 މީހުންނަށް ނަމާދު ކުރެވޭނެ ޖާގައިގެ އިތުރުން 450 މީހުންގެ މަލްޓިޕަރޕަސް ހޯލެއް ހުންނާނެއެވެ. އަދި މި މަރުކަޒުގައި އިދާރީ އޮފީހަކާއި، ލައިބްރަރީއަކާއި، 4 ކްލާސްރޫމާއި، 2 ސެމިނަރ ރޫމުގެ އިތުރުން ޕޭންޓްރީ ހުންނާނެކަމަށް އިސްލާމިކް މިނިސްޓްރީއިން ވިދާޅުވިއެވެ.

އިސްލާމިކް މިނިސްޓަރު މި ރަސްމިއްޔާތު ގައި ދެއްކެވި ވާހަކަފުޅުގައި މި މަސައްކަތް ވީހާވެސް އަވަހަކަށް ފަށައި، ބާރު ސްޕީޑުގައި ކުރިއަށް ގެންދެވުމަށް އެދިވަޑައިގަންނަވައި، ރަޝީދު ކާޕެންޓްރީ އަކީ ގިނަ މަސައްކަތްތަކެއް ކޮށްފައިވާ ތަޖުރިބާ ހުރި ކުންފުންޏަކަށް ވާތީ މަސައްކަތް ހަލުވިކަމާއެކު ފުރިހަމައަށް ކުރިއަށް ގެންދާނެ ކަމަށް ޔަޤީން ކުރައްވާ ކަމަށްވެސް ފާހަގަކުރެއްވިއެވެ.

ދިއްދޫ އިސްލާމިކް ސެންޓަރު ޢިމާރާތްކުރުމުގެ މަޝްރޫޢަށް 50.8 މިލިއަން ރުފިޔާ ޚަރަދުވާނެކަމަށް އިސްލާމިކް މިނިސްޓްރީން ވިދާޅުވެއެވެ. އަދި މި މަސައްކަތް ރަޝީދު ކާޕެންޓްރީއާއި ޙަވާލުކޮށްފައިވަނީ 540 ދުވަސް ތެރޭގައި ނިންމާގޮތަށެވެ.