ި"ދިވެހި ދަޢުލަތުގެ ދީނަކީ އިސްލާމް ދީނެވެ. އަދި އިސްލާމް ދީނަކީ ދިވެހިރާއްޖޭގެ ޤާނޫނު އަސާސީގެ މައިގަނޑު މަސްދަރުވެސް މެއެވެ." ދިވެހިރާއްޖޭގެ ޤާނޫނުއަސާސީގެ 10 ވަނަ މާއްދާގައި ދަޢުލަތުގެ ދީން ބުނެދީފައި ވަނީ އެފަދައިންނެވެ. ވީއިރު ދިވެހި ދަޢުލަތުން އިސްލާމް ދީނަށް ވަރަށް ހާއްސަ އަހައްމިއްޔަތުކަމެއް ދޭންޖެހޭނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މިޒައާމަތުގައި މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސައީދުގެ މޭސްތިރިކަމުގައި މިނިސްޓްރީ އޮފް އިސްލާމިކް އެފެއާޒުން ވަނީ އިސްލާމީ ނޫރާއި ދީނީ އަޤީދާ ދާއިރާއިން، އެތައް ކަމެއް ޙާޞިލުކޮށް ކާމިޔާބީތަކެއް ހޯދައި ކުރިއެރުންތަކެއް ހޯދާފައެވެ.
މިގޮތުން، ތަނަވަސްކަމުގެ އަހުލުވެރިންނަށް އެ މިނިސްޓްރީ މެދުވެރިކޮށް، ލުއި ފަސޭހަ ނިޒާމެއްގެ ތެރެއިން އޮންލައިންކޮށް މާތް ﷲ ގެ މަގުގައި ހޭދަކޮށް ޞަދަޤާތްކުރެވޭނެ ގޮތް މަގުފަހިކޮށްދިނުމަށާއި، އެ މިނިސްޓްރީގެ ޓްރަސްޓު ފަންޑުތަކަށް ޞަދަޤާތުގެ ގޮތުގައި ލިބޭ ފައިސާ އިތުރަށް ފުޅާކުރުމުގެ މަޤްޞަދުގައި، ބަނޑޭރި ޕޭއަށް ޞަދަޤާތް ކުރެވޭނެ، އަށް ބައި ވަނީ އިތުރުކޮށްފައެވެ. ރައީސްގެ މެނިފެސްޓޯގައިވާ ފަދައިން ރާއްޖޭގައި އިސްލާމީ ތަޢުލީމު ޒަމާނަށް ފެތޭގޮތަށް ހަރުދަނާކޮށް، ދިވެހިރާއްޖޭގެ އިސްލާމީ ޔުނިވަރސިޓީއަށް އައު ޢިމާރާތެއް ބިނާކުރުމަށް މަސައްކަތް ކުރުމުގެ ގޮތުން، އިސްލާމިކް މިނިސްޓްރީން ދަނީ ރާއްޖޭގައި ހުންނަ ޕާކިސްތާނު ހައިކޮމިޝަނާ މަޝްވަރާކޮށްގެން ޕާކިސްތާނު ސަރުކާރުގެ އެހީގައި އައި.ޔޫ.އެމްގެ އައު ޢިމާރާތް އެޅުމުގެ މަޝްވަރާތައް ކުރަމުންނެވެ.
ކީރިތި ޤުރްއާން ހިތުދަސްކުރާ މީހުންނާއި ކުދިންނަށް ހިތްވަރުދީ، ޙާފިޡުންގެ ޢަދަދު އިތުރުކޮށް، އިތުރު މީހުންނާއި ކުދިންނަށް ޙިފްޡުކުރުމަށް ޝައުޤުވެރިކަން އުފެއްދުމުގެ މަޤުސަދުގައި، ޤުރުއާން ހިތުދަސްކުރާ ޙާފިޡުން ޢުމްރާއަށް ފޮނުވުމުގެ މަޝްރޫޢުއެއް ވަނީ އިފްތިތާޙްކޮށްފައެވެ. 1445 ވަނަ އަހަރުގެ ރަމަޟާން މަހަށް ތައްޔާރުވުމުގެ ޕްރޮގްރާމްތަކާއެކު ރަމަޟާން މަހު މުޅި ޖުމްލަ 1013 ޕްރޮގްރާމް ވަނީ ބާއްވާފައެވެ. ރާއްޖޭގެ ދީނީ އެއްބައިވަންތަކަން ދަމަހައްޓާ ބަވަނަވެފައިމިވާ ދުނިޔޭގައި ހިނގަމުންދާ ލާދީނީ އޮއިވަރުތަކާއި ދީނަށް ފުރައްސާރަކުރުމުގެ ޢަމަލުތަކާއި، ދީނީ ހަރުކަށި ފިކުރުން ދީނީ މުޖުތަމަޢު ސަލާމަތްކުރުމަށްޓަކައި ކުރިއަށް ގެންދާ "ހަފްތާރެސް" ޕްރޮގްރާމްގައި މިނިސްޓްރީގެ ވާޢިޒުންނާއި ދާޢީން މެދުވެރިކޮށް ދީނީ މަޢުލޫމާތު ފޯރުކޮށްދިނުމަށް އަތޮޅުތެރޭގެ ރަށްތަކުގައި ސެޝަންތަކެއް ކުރިއަށް ގެންދިޔައެވެ.
ރައީސް ޑރ މުއިއްޒުގެ މެނިފެސްޓޯގައި ހިމެނޭ "އިސްލާމީ ނޫރާއި ދީނީ އަޤީދާ" އަދި މުޅި މެނިފެސްޓޯގައި ހިމެނޭ އެ މިނިސްޓްރީއާ ގުޅުންހުރި ކަންކަން ތަންފީޒުކުރުމާއި، މެންޑޭޓުގައި ހިމެނޭ މުހިންމު ޙަރަކާތްތައް އެކުލެވޭ އެކްޝަން ޕްލޭނާއި، އެކްޓިވިޓީ ކަލަންޑަރު ވަނީ އިފްޠިތާޙްކޮށްފައެވެ. މީގެ އިތުރުން، މޯލްޑިވްސް ޒަކާތު ހައުސްގެ އެކްޝަން ޕްލޭން ވަނީ އިފްޠިތާޙްކޮށްފައެވެ. އަދި ކީރިތި ޤުރްއާނާބެހޭ ޤައުމީ މަރުކަޒުގެ އެކްޝަން ޕްލޭން ވަނީ އިފްޠިތާޙްކޮށްފައެވެ. އަދި މިއެކްޝަން ޕްލޭންތަކާ އެއްގޮތަށް މަސައްކަތްތައް ކުރަމުންދާކަން ފާހަގަކުރެވެއެވެ.
ރައީސްގެ މެނިފެސްޓޯގައިވާ ގޮތަށް ރާއްޖޭގައި ހުރި ވަޤްފު އިތުރުކޮށް، ލިބޭ އާމްދަނީން ދީނީ ކަންކަމަށް ކުރެވޭ ހޭދަ އިތުރުކުރުމާއި، ނިކަމެތި ޢާއިލާތަކަށް އެހީވުމާއި ތަޢުލީމީ އަދި ސިއްޙީ ކަންކަމަށް އެފައިސާއިން ޚަރަދުކުރުމުގެ ސިޔާސަތު ތަންފީޛުކުރުމުގެ މަޤްޞަދުގައި، މާލެއާއި، ރާއްޖޭގެ އެކި ކަންކޮޅުތަކުގައި ވަޤްފު މަޝްރޫޢުތައް އިތުރުކުރުމުގެ މަސައްކަތްތައް ދަނީ ކުރަމުންނެވެ. އަދި މެނިފެސްޓޯގައި ބަޔާންކޮށްފައިވާ ގޮތުގެމަތީން، މިސްކިތްތަކުގެ ޙާލަތު މެދުކެނޑުމެއްނެތި ދެނެގަނެވޭނެ ނިޒާމެއް ޤާއިމުކުރުމުގެ ގޮތުން، "މަސްޖިދު ޕޯޓަލް"ގެ ނަމުގައި ޕޯޓަލެއް ވަނީ ލޯންޗުކޮށްފައެވެ. މި ޕޯޓަލްގެ ޒަރިއްޔާއިން މިސްކިތުގައި ދުވަހުން ދުވަހަށް ކުރަންޖެހޭ މަރާމާތުގެ މަސައްކަތްތަކާއި، މިސްކިތުގެ އިމާމުންނާއި ބެހޭގޮތުން އެކިއެކި ފަރާތްތަކުން ޕޯޓަލް މެދުވެރިކޮށް ހުށަހަޅާ މައްސަލަތަކާއި ޝަކުވާތަކަށް ޖަވާބުދާރީ ވަމުންދެއެވެ.
ޒުވާން ޚަޠީބުންގެ ޕްރޮގުރާމާއި އިމާމުން ތާޒާކުރުމުގެ ޤައުމީ މަޝްރޫޢުއަކީވެސް ފާހަގަކޮށްލަންޖެހޭ މަޝްރޫއެކެވެ. އިމާމުން ތާޒާކުރުމުގެ ޤައުމީ މަޝްރޫޢުއަކީ މިނިސްޓްރީން އިމާމުކަމުގެ ދާއިރާއިން އިތުރު ތަމްރީންދިނުމަށްޓަކައި، މުޅި ރާއްޖޭ ތަފާތު 11 ސަރަހައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން އިފްޠިތާޙްކުރެވިގެން، ކުރިޔަށްގެންދާ އިންޓެންސިވް ޓްރެއިނިންގ ޕްރޮގްރާމެކެވެ. މި ތަމްރީން ޕްރޮގްރާމުގެ އައު މަންހަޖެއް ފަރުމާކޮށް، ޖުމްލަ 9 މޮޑިއުލަށް އިމާމުންނަށް ޒަމާނީ ދީނީ މައްސަލަތަކަށް ހޭލުންތެރިކުރަމުން ދެއެވެ. މިގޮތުން، މިހާތަނަށް ޖުމްލަ 402 އިމާމުންނާއި ޚަޠީބުން ވަނީ ތަމްރީންކުރެވިފައެވެ.
ރާއްޖޭގެ ރަށްރަށުގައި ޚުޠުބާ ކިޔާ މީހުންގެ ދަތިކަން ކުރިމަތިވެފައިވާތީ، އެކަމަށް ޙައްލެއް ހޯދައި އިމާމުންނާއި ޚަޠީބުންގެ ޒުވާން ޖީލެއް އުފެއްދުމުގެ ސިޔާސަތުގެ ދަށުން، ސާނަވީ މަރުހަލާތަކުގައި ތަޢުލީމު ހާސިލުކުރަމުންދާ ނުވަތަ ސްކޫލު ނިންމާފައިވާ 18 އަހަރު ނުފުރޭ ޒުވާނުންގެ ތެރެއިން ތަޖުވީދުގެ ހަމަތަކާ އެއްގޮތަށް ރީތިކޮށް ޤުރްއާން ކިޔަވައި، ނަމާދުގެ ފިޤުހްގެ ބައިތަކަށް އަހުލުވެރިވެފައިވާ ދަރިވަރުންނަށް އަމާޒުކޮށްގެން ޒުވާން ޚަޠީބު ޕްރޮގްރާމް ވަނީ 26 ޖޫން 2024 ވަނަ ދުވަހު އިފްޠިތާޙްކޮށްފައެވެ. މިގޮތުން، އެފަރާތްތަކަށް ތަމްރީން ޕްރޮގްރާމްތައް ކުރިޔަށް ގެންދެވި، 252 ޒުވާން ޚަޠީބުންނަށް ވަނީ ރާއްޖޭގެ މިސްކިތްތަކުގައި އިމާމުވެ ހުކުރު ނަމާދު ކުރުގެ ހުއްދަ ވަނީ ދޫކޮށްފައެވެ.
ހަމައެހެންމެ، ޒަމާނީ ވަޞީލަތްތަކުގެ އެހީގައި ހުކުރު ޚުޠުބާއާ ގުޅޭ ކަންކަން ތަރައްޤީކުރުމުގެ ގޮތުން، އެ މިނިސްޓްރީ އިން ވަނީ ރާއްޖެއާއި ރާއްޖެއިން ބޭރުގައި ދިރިއުޅޭ ފަރާތްތަކަށް ރާއްޖޭގައި ކިޔާ ޚުޠުބާގެ މަޢުލޫމާތު ލުއިފަސޭހަކަމާއެކު ފޯރުކޮށްދިނުމުގެ މަޤްޞަދުގައި، ހުކުރު ޚުޠުބާ އިނގިރޭސި ބަހުން ތަރުޖަމާކުރެވި، ވެބްސައިޓުގައި އަދި ފޭސްބުކް ޕޭޖުގައި ޝާއިޢުކުރަން ފަށާފައެވެ. ރާއްޖޭގެ މުޖުތަމަޢުގައި ގިނަ ޢަދަދަކަށް ދިރިއުޅޭ ބަންގްލަދޭޝް ރައްޔިތުން ހުކުރަށް މިސްކިތްތަކަށް ދިޔުމާއެކު، އެފަރާތްތަކަށް ހުކުރު ޚުޠުބާ ދޭހަވާގޮތަށް އޮޅުންފިލުވައި ދިނުމުގެ މަޤްޞަދުގައި، ހުކުރު ޚުޠުބާ ބަންގްލަދޭޝް ބަހުން ތަރުޖަމާކޮށް ވެސް ޝާއިޢުކުރަމުންދެއެވެ. ޚުޠުބާއިން ޚަބަރު ހެދުމަށް މީޑިއާތަކަށް ދިނުމަށްޓަކައި، ކޮންމެ ހަފްތާއަކު ޚުޠުބާ މީޑިއާ ސްޓޭމަންޓް ހުރިހާ މިޑިއާތަކަށް ހިއްސާކުރެއެވެ. ދުނިޔޭގެ ފުންނާބުއުސް ދީނީ ޢިލްމުވެރިން ޢަރަބި ބަހުން ލިޔުއްވާފައިވާ އިސްލާމީ ޢިލްމީ 6 ފޮތް، ދިވެހި ބަހަށް ތަރުޖަމާކުރުމުގެ މަޝްރޫޢުއެއް ވަނީ ފަށާފައެވެ.
ރައީސްގެ މެނިފެސްޓޯގައި ބަޔާންކޮށްފައިވާ ގޮތުގެ މަތިން، ރާއްޖޭގައި މިހާރު އޮތް ޒަކާތުގެ ނިޒާމު ހަރުދަނާކޮށް، ޒަކާތު ފަންޑު ފުޅާކުރުމުގެ ގޮތުން ޒަކާތަށް ލިބޭ ފައިސާއިން ބައެއް ޝަރީޢާ ހުއްދަކުރާ ދާއިރާތަކަށް އިންވެސްޓްކޮށް ޒަކާތުގެ މާލީ ނިޒާމެއް ޤާއިމުކުރުމުގެ މަޤްޞަދުގައި، "މޯލްޑިވްސް ޒަކާތު ހައުސް" ގެ ނަމުގައި މުއައްސަސާއެއް ވަނީ އުފައްދަވާފައެވެ. މި މުއައްސަސާއަކީ ދިވެހިރާއްޖޭގައި ޒަކާތް ނެގުމާއި، ޒަކާތް ބެހުމާއި، ޒަކާތުގެ ނިޒާމް ހަރުދަނާކުރުމާއި، ޒަކާތު ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްޤީކުރުމަށް ކުރަންޖެހޭ މަސައްކަތްތައް ކުރުމަށް ވަކި މެންޑޭޓްއެއް ކަނޑައަޅާފައިވާ މުއައްސަސާއަކަށްވާތީ، މި މެންޑޭޓް ތަންފީޒުކުރުމަށްޓަކައި ގިނަ މަސައްކަތްތަކެއް ވަނީ ކޮށްފައެވެ. އަދިވެސް ދަނީ ކުރަމުންނެވެ.
މީގެ އިތުރުންވެސް މުހިންމު ގިނަ މަސައްކަތްތަކެއް ފާއިތުވީ 365 ދުވަހު އެކަނިވެސް އިސްލާމިކް މިނިސްޓްރީން ވަނީ ތަރުތީބުކޮށް ކޮށްފައެވެ.
