އިނގިރޭސިވިލާތުގެ ވިސާ މާލޭގައި ތިބެގެން ނެގޭނެ ވަގުތީ އިންތިޒާމެއް ހަމަޖައްސައިފި

މަތީ ތަޢުލީމަށާއި އެކި ބޭނުންތަކަށް އިނގިރޭސިވިލާތަށް ދަތުރުކުރާ ދިވެހިންނަށް ވިސާ ހޯދުމުގައި ކުރިމަތިވާ މާލީ އަދި އިދާރީ ގޮންޖެހުންތަކަށް ލުޔެއް ހޯދައިދިނުމުގެ ގޮތުން، ރާއްޖޭގައި ތިބެގެން ޔޫކޭ ވިސާއަށް އެދެވޭނެ ވަގުތީ ސެންޓަރެއް މާލޭގައި ހުޅުވުމަށް ވީއެފްއެސް ގްލޯބަލްއިން ނިންމައިފިއެވެ.

ޚާރިޖީ ވުޒާރާއިން ހާމަކުރައްވާފައިވާ ގޮތުގައި، މި ވަގުތީ ވިސާ ކްލިނިކްގެ ޚިދުމަތް ކުރިއަށްދާނީ އަންނަ އޮގަސްޓު މަހުގެ 10 އިން 12 އަށް މާލޭގެ މާގިރި ހޮޓަލުގައެވެ.

މިއީ ކޮންމެ އަހަރަކުވެސް އިނގިރޭސިވިލާތުގެ ތަޢުލީމީ އައު އަހަރު ފެށުމާ ދިމާކޮށް، ދިވެހި ކިޔަވާކުދިންނާއި އާއިލާތަކުން ވިސާ ހޯދުމަށް ރާއްޖެއިން ބޭރަށް ކުރަންޖެހޭ ބޮޑު ޚަރަދު ކުޑަކޮށްދިނުމުގެ މަގްސަދުގައި ސަރުކާރުން އިސްނަގައިގެން ކުރިއަށްގެންދާ އަހަރީ އިންތިޒާމެކެވެ.

މި ހިދުމަތް ހޯދުމަށް އެދޭ ފަރާތްތަކުން އިނގިރޭސިވިލާތުގެ ރަސްމީ ޕޯޓަލް މެދުވެރިކޮށް އޮންލައިންކޮށް ފޯމު ހުށަހަޅައި، ވީއެފްއެސް މެދުވެރިކޮށް އެޕޮއިންޓްމަންޓް ބުކްކުރަން ޖެހޭނެއެވެ. އެޕޮއިންޓްމަންޓް ލިބޭ ފަރާތްތަކަށް، ކަނޑައެޅިފައިވާ ތާރީޚުތަކުގައި މާގިރި ހޮޓަލަށް ވަޑައިގެން ބަޔޮމެޓްރިކްސް ދިނުމާއި، ލިޔެކިޔުންތައް ހަވާލުކުރުމުގެ މަރުހަލާ ފުރިހަމަކުރެވޭނެއެވެ.

އާންމު އުސޫލުން ދިވެހިން ޔޫކޭ ވިސާ ހޯދުމަށްޓަކައި އަވައްޓެރި ސްރީލަންކާ ނުވަތަ އިންޑިއާއަށް ދަތުރުކުރަންޖެހޭތީ، މިއީ ހިނގާދާނެ ބޮޑު ޚަރަދަކުން ސަލާމަތްވެ، ރާއްޖޭގައި ތިބެގެން ފަސޭހަކަމާއެކު އިދާރީ ކަންކަން ނިންމާލުމަށް ލިބޭ އަގުހުރި ފުރުސަތެކެވެ.

މިފަދަ އިންތިޒާމުތަކަކީ ދެ ޤައުމުގެ ދެމެދުގައި އޮތް ގާތް ގުޅުމާއި، ދިވެހި ދަރިވަރުންނަށް އިނގިރޭސިވިލާތުގެ ތަޢުލީމީ ފުރުސަތުތައް ފަސޭހަކަމާއެކު ފޯރުކޮށްދިނުމަށް ދެ ސަރުކާރުން ދޭ އަހައްމިއްޔަތު ރަމްޒުކޮށްދޭ ކަމެކެވެ.