ރަޝިޔާ އާއި ޗައިނާއިން ހަނގުރާމަ ހުއްޓާލަން ގޮވާލައިފި

މެދުއިރުމަތީގައި މިހާރު ކުރިއަށްދާ ހަނގުރާމަ އަކީ އެސަރަހައްދުގެ ހަމެޖުން ނަގާލަން ވެގެން އިޒްރެއިލާއި، އެމެރިކާ ކުރަމުންގެންދާ ހަނގުރާމައެއް ކަމަށާއި، އެ ހަނގުރާމަ ހުއްޓާލުމަށް ރަޝިޔާ އާޢި ޗައިނާއިން ގޮވާލައިފި އެވެ.

ރަޝިޔާ އަދި ޗައިނާ އަކީ ވެސް އަސްކަރީގޮތުން ބާރުގަދަ ދުނިޔޭގެ ފެންވަރުގައި ފާހަގަކޮށްލެވޭ ދެ ގައުމެވެ.

ޗައިނާގެ ޚާރިޖީ ވަޒީރު ވޮންގ ޔީ ވަނީ ޔަހޫދީންގެ ޚާރިޖީ ވަޒީރު ގިދިއޮން ސާރަށް ފޯނުން ގުޅުއްވާފައެވެ. ވޮންގ ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕާއި ޔަހޫދީންގެ ބޮޑުވަޒީރު ބެންޔަމިން ނަތަންޔާހޫ އިސްވެ އީރާނަށް ޙަމަލާ ދީފައި ވަނީ، އީރާނާއި އެމެރިކާއާ ދެމެދު ކުރަމުން ދިޔަ މަޝްވަރާތަކުގައި "ބޮޑެތި ކުރިއެރުންތަކެއް" ލިބެމުން ދަނިކޮށް ކަމުގައެވެ.

އަދި، އީރާންގެ ނިއުކްލިޔަރ ހަކަތަ އުފެއްދުމުގެ ޕުރޮގުރާމާ ގުޅޭ ގޮތުން ކުރަމުން ދިޔަ މަޝްވަރާތަކުގައި ޔަހޫދީންގެ ސަލާމަތީ ކަންބޮޑުވުންތަކަށް ޙައްލު ހޯދުނު ކަމުގައި ވެސް ވޮންގ ވިދާޅުވިއެވެ.

ރަޝިޔާގެ ޚާރިޖީ ވަޒީރު ސިރްގިޔޭ ލެވްރޮފް ވެސް ވަނީ ފާޑުވިދާޅުވެ، ހޫނު ބަހުގެ ޙަމަލާތަކެއް އަމާޒު ކުރައްވާފައެވެ. އީރާނުން ނިއުކްލިޔަރ ހަތިޔާރެއް އުފެއްދުމަށް މަސައްކަތް ކުރަމުންދާ ކަމުގައި ޔަހޫދީންނާއި އެމެރިކާއިން ކުރަމުންދާ ތުހުމަތަށް އިޝާރާތް ކުރައްވައި ލެވްރޮފް ވިދާޅުވީ، އީރާނުން ނިއުކްލިޔަރ ބޮމެއް އުފައްދަން މަސައްކަތް ކުރަމުންދާ ކަމުގެ އެއްވެސް ހެއްކެއް ރަޝިޔާއަށް ފެންނަން ނެތް ކަމުގައެވެ.

ނަމަވެސް، އީރާނާ ދެކޮޅަށް ހަނގުރާމަ ފެށުމާ ގުޅިގެން، އެ ޤައުމުން އަމިއްލަ ދިފާޢުގައި ނިއުކްލިޔަރ ހަތިޔާރު ހޯދުމަށް ހިތްވަރު ލިބި، މަޖުބޫރުވެގެންދާނެ ކަމުގައި ވެސް އޭނާ ވިދާޅުވިއެވެ.