މެދު އިރުމަތީގެ ހާލަތާއި ގުޅިގެން ކެންސަލްވެފައިވާ ފްލައިޓުތަކަށް ހާއްސަ ކައުންޓަރުތަކެއް!

މެދުއިރުމަތީގެ މަސްރަޙު ހޫނުވެ ވައިގެ ސަރަޙައްދު ބަންދުކުރުމާ ގުޅިގެން ކެންސަލްވި ފްލައިޓުތަކުގެ ފަސިންޖަރުންނަށް އެހީވުމަށް, ހާއްސަ ކައުންޓަރުތަކެއް ވެލާނާ އިންޓަރނޭޝަނަލް އެއަރޕޯޓުގެ ޑޮމެސްޓިކް ޓާމިނަލްގައި ޤާއިމުކޮށްފައިވާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ބުނެފިއެވެ.

ދަތުރުވެރިންނަށް ދިމާވާ ދަތިތައް ހައްލުކުރުމަށްޓަކައި 28 ފެބްރުއަރީ 2026 ގައި ވެލާނާ އިންޓަރނޭޝަނަލް އެއަރޕޯޓުގައި 'ޑިސްރަޕްޝަން މެނޭޖްމެންޓް ސެންޓަރެއް' ވަނީ ހުޅުވާފައެވެ.

މި ހާލަތުގެ ސަބަބުން ދެ ދުވަސް ތެރޭގައި ޖުމްލަ 28 ފްލައިޓެއް ކެންސަލްވެ، 5,000 އަށްވުރެ ގިނަ ފަސިންޖަރުންނަށް ދަތުރުފަތުރުގެ ދަތިތަކާ ކުރިމަތިވިއެވެ. ފަސިންޖަރުންނަށް ލުއިފަސޭހަ އިންތިޒާމުތައް ހަމަޖައްސައިދިނުމަށްޓަކައި ޑޮމެސްޓިކް ޓަރމިނަލް މިހާރު ބޭނުންކުރަމުންދާކަމަށް އެމްއޭސީއެލްއިން ވަނީ ބުނެފައެވެ.

އެމްއޭސީއެލްއިން ވަނީ މިހާތަނަށް 130 ފަސިންޖަރުންނަށް ޒަރޫރީ އެހީތެރިކަން ފޯރުކޮށްދީ، އެއަރލައިންތަކާއި ޓުއަރ އޮޕަރޭޓަރުންނާ ގުޅިގެން މަސައްކަތް ފަށާފައެވެ.

ކުރިމަތިވެފައިވާ ހާލަތުން އަރައިގަތުމަށްޓަކައި ފަތުރުވެރިކަމާއި ތިމާވެއްޓާ ބެހޭ ވުޒާރާއާއި ވިޒިޓް މޯލްޑިވްސްއާއި އެއަރލައިންތަކުގެ އިތުރުން ޓުއަރ އޮޕަރޭޓަރުންނާއި ގުޅިގެން، ފަސިންޖަރުންނަށް ދިމާވާ އެކިއެކި ދަތިތައް ހައްލުކުރުމުގެ މަސައްކަތް ކުރަމުންދާކަމަށް އެމްއޭސީއެލްއިން ބުންޏވެ. އެގޮތުން ކެންސަލްވެފައިވާ ފްލައިޓުތަކުގެ އެއަރލައިންތަކަށް ޚާއްސަ ސަރވިސް ކައުންޓަރުތައް ޑޮމެސްޓިކް ޓާމިނަލްގައި ޤާއިމުކޮށް، ފަސިންޖަރުންނަށް އެކިއެކި އިންތިޒާމްތައް ހަމަޖައްސައިދިނުމުގައި އެއަރލައިންތަކުގެ މަންދޫބުން ހަރަކާތްތެރިވަމުން އަންނަކަން އެކުންފުނިން ވަނީ ފާހަގަކޮށްފައެވެ.

މި ދަތިތަކާ އެކުވެސް ވެލާނާ އިންޓަރނޭޝަނަލް އެއަރޕޯޓުގެ އާންމު އޮޕަރޭޝަންތަކަށް އެއްވެސް ބަދަލެއް ނާންނަކަމަށް އެމްއޭސީއެލްއިން ކަށަވަރުކޮށްދެއެވެ.