ޚާއްސަ އިސްކަންދޭ ކެޓަގަރީގެ ފްލެޓް ލިބުމުގެ ޝަރުތުތަކަށް ބަދަލުތަކެއް

"އާއިލީ ބޯހިޔާވަހިކަން" ޕްރޮގްރާމުގައި ހިމެނޭ ހާއްސަ ކެޓަގަރީތަކަށް ފްލެޓަށް ކުރިމަތިލެވޭ ޝަރުތުތައް އިސްލާހުކުރުމާ އެކު ކޮންމެ ކެޓަގަރިއަށް ދޫކުރުމަށް ކަނޑައަޅާފައިވާ ފްލެޓުގެ އަދަދު ހައުސިން މިނިސްޓްރީއިން އާންމުކޮށްފި އެވެ.

ޚާއްސަ ކެޓަގަރީގައި އިދާރާތައް އަދި މުއައްސަސާތަކުގެ ބައިން މައިގަނޑު 3 ބަދަލެއް އުސޫލަށް ވަނީ ގެނެސްފައެވެ.

ވަޒީފާގެ މުއްދަތަށް ގެނެވުނު ބަދަލު :

ކުރިން އޮންނަ ގޮތުން ޚާއްސަ ކެޓަގަރީއަށް ޝަރުތު ހަމަވުމަށްޓަކައި، އެ އިދާރާއެއްގައި މަދުވެގެން 5 އަހަރު ދުވަހު މަސައްކަތް ކޮށްފައިވާން ޖެހެއެވެ.

ނަމަވެސް މިހާުވަނީ މި މުއްދަތު 1 އަހަރު ދުވަހަށް ކުރުކޮށްފައެވެ. އެގޮތުން، ޚާއްސަ އިސްކަންދެވޭ އިދާރާއެއްގައި މެދުނުކެނޑި ވޭތުވެދިޔަ 1 އަހަރު ފުލް-ޓައިމް ވަޒީފާ އަދާކޮށްފައިވާ ފަރާތްތަކަށް މިހާރު އެކެޓަގަރީން ފުލެޓަށް ކުރިމަތިލެވޭނެއެވެ.

ފުލެޓު ލިބުމަށްފަހު ޚިދުމަތްކުރުމަށް އެއްބަސްވާ މުއްދަތު:

ކުރިން އުސޫލުގައި އޮތްގޮތުން ނަމަ، ފުލެޓު ލިބޭ ފަރާތްތަކުން އެ އިދާރާއެއްގައި މަދުވެގެން 5 އަހަރު ދުވަހު މަސައްކަތްކުރުމަށް އިގުރާރުވާން ޖެހެއެވެ.

އުސޫލަށް ބަދަލު ގެނެސްފައިވަނީ ބޯހިޔާވަހިކަން ހަވާލުކުރާ ތާރީޚުން ފެށިގެން، އެ އިދާރާއަކުން ނުވަތަ މުއައްސަސާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހޭގޮތަށެވެ.

އިތުރު އިދާރާއެއް ލިސްޓުގައި ހިމެނުން:

ތިންވަނަ ބަދަލެއްގެ ގޮތުގައި، އިދާރާތަކުގެ ލިސްޓަށް އެއް އިދާރާ ވަނީ އިތުރުކޮށްފައެވެ. ޚާއްސަ އިސްކަންދެވޭ އިދާރާތަކުގެ ލިސްޓަށް (ކެޓަގަރީ 6 ގެ ދަށުން) އިތުރުކޮށްފައިވަނީ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (CMDA) އެވެ.

ފްލެޓުގެ އަދަދުތައް:

1. ޖުޑިޝަރީގެ މުވައްޒަފުން - 100 ފްލެޓު
2. ފުލުހުން - 100 ފްލެޓު
3. އެމްއެންޑީއެފް - 100 ފްލެޓު
4. ސިވިލް ސާވިސްގެ މުވައްޒަފުން - 200 ފްލެޓު
5. ކަރެކްޝަންސް ސާވިސް - 100 ފްލެޓު
6. ސަރުކާރުގެ ސްކީމްގެ ދަށުން ފުރަތަމަ ބުރުގައި 7900 ފްލެޓް ދޫކުރުމަށް ވަނީ ހުޅުވާލާފައެވެ. މީގެތެރެއިން މުއައްސަސާތަކާއި އިދާރާތައް ހިމެނޭ، ޚާއްސަ އިސްކަންދޭ ކެޓަގަރީއަށް 2400 ފްލެޓު ވަނީ ކަނޑައަޅާފައެވެ.