ރާއްޖެއިން މަސައްކަތްކުރާނީ އަރަބި އިސްލާމީ ގައުމުތަކާއެކު، އެކަތިގަނޑެއްގެ ގޮތުގައި: ރައީސް

މެދުއިރުމަތީގެ ހަމަނުޖެހުމުގެ މި ދަނޑިވަޅުގައި، ދިވެހިރާއްޖެއިން މަސައްކަތްކުރާނީ އަރަބި އިސްލާމީ ގައއުމުތަކާއެކީ، އެއް ބްލޮކެއްގެ ގޮތުގައި، އެކަތިގަނޑެއްގެ ގޮތުގައިކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައީސް އޮފީހުގައި ނޫސްވެރިންނާ ބައްދަލުކުރައްވައި ވާހަކަފުޅުދައްކަވަމުންނެވެ.

ރައީސްގެ ވާހަކަފުޅުގައި، ދިވެހިރާއްޖެއިން ޢަރަބި އިސްލާމީ ޤައުމުތަކާއެކުގައި އެއްރޫޙެއްގައި އެކުގައި މަސައްކަތްކުރައްވާނެކަން ފާހަގަކުރެއްވިއެވެ. އަދި މި ހަނގުރާމައަކީ އިސްލާމީ އުންމަތަށް ލިބިގެންދިޔަ ވަރަށްބޮޑު ހިތާމައެއްގެ ގޮތުގައި އެމަނިކުފާނު ސިފަކުރެއްވިއެވެ. މިއަދުގެ ނޫސްވެރިންގެ ބައްދަލުވުމުގައި ރައީސް ވަނީ ހަމަލާތައް ދިނުން ކުށްވެރިކުރައްވައި، މި ހަނގުރާމައިގައި ގެއްލޭ ކޮންމެ މުސްލިމް ފުރާނައަކީ އިސްލާމީ އުންމަތަށް ލިބޭ ގެއްލުމެއްގެ ގޮތުގައި ސިފަކުރައްވާފައެވެ.

އިރާނުން ދެމުންދާ ޙަމަލާތަކާއި ގުޅުވައި ރައީސް ދެއްކެވި ވާހަކަފުޅުގައި، ޔުނައިޓެޑް ޢަރަބް އެމިރޭޓްސްގެ ރައީސަށް ފޯނުން ގުޅުއްވައި، ދިވެހިރާއްޖޭގެ ތާއީދު ފާޅުކުރައްވައި، ދިވެހި ރައްޔިތުން އެބޭފުޅުންނާއި އެކުގައި ތިބިކަން ދަންނަވާފައިވާނެ ކަމުގައި ވިދާޅުވިއެވެ. އަދި މިއަދު މެންދުރުފަހު އިތުރު ޤައުމުތަކުގެ އިސްވެރިންނަށް ގުޅުއްވައި، ދިވެހިރާއްޖޭގެ ތާއީދުފާޅުކުރައްވާނެކަން ރައީސުލްޖުމްހޫރިއްޔާގެ ވާހަކަފުޅުގައި ހާމަކުރެއްވިއެވެ. އެގޮތުން ސަޢޫދީ ޢަރަބިއްޔާ، ޤަތަރު، ބަހްރެއިން އަދި އޮމާންގެ އިސްވެރިންނަށް ގުޅުއްވައި ދިވެހި ރައްޔިތުން ތިބީ އެ ހުރިހާ ޤައުމުތަކެއްގެ ރައްޔިތުންނާއި އެކުގައިކަން ހާމަކުރައްވާނެކަމުގައި ރައީސުލްޖުމްހޫރިއްޔާގެ ވަހަކަފުޅުގައި ހާމަކުރެއްވިއެވެ.

މި ހަނގުރާމައިގައި ރާއްޖެއަށް އޭގެ އަސަރު މި ކުރަނީ، ރާއްޖެއަކީ ފަތުރުވެރިކަމަށާއި އަދި ކާބޯތަކެއްޗާއި ތެލަށް، މެދުއިރުމައްޗަށް ވަރަށް ބޮޑަށް ބަރޯސާވެފައިވާތީ ކަމުގައި ރައީސް ވިދާޅުވިއެވެ. އަދި ދިވެހިރާއްޖޭގެ މަސްލަޙަތު ހިމާޔަތްކުރުމުގެ ގޮތުންވެސް ވަރަށްގިނަ މަސައްކަތްތައް ކުރައްވަމުން ގެންދަވާކަން ވެސް ރައީސް ހާމަކުރެއްވިއެވެ.