މެދުއިރުމަތީގެ ހަނގުރާމަ އާއެކު ތެލުގެ އަގު މައްޗަށް!

މެދުއިރުމަތީގެ ހަނގުރާމަ އާއެކު ދުނިޔޭގެ ބާޒާރުގައި ތެލުގެ އަގު މައްޗަށް އުފުލިއްޖެ އެވެ.

ދުނިޔޭގެ ބާޒާރުގައި ތެލުގެ އަގު ގާތްގަނޑަކަށް 10 އިންސައްތަ އުފުލި، ފީފާއެއްގެ އަގު 80 ޑޮލަރަށްވުރެ މައްޗަށް ވަނީ ގޮސްފަ އެވެ.

ތެލުގެ އަގު މިހާ ބޮޑަށް އުފުލިފައި މި ވަނީ މެދު އިރުމަތީގައި މިހާރު ކުރަމުންދާ ހަނގުރާމައިގެ ސަބަބުންނެވެ. މިއީ ފާއިތު މިވީ ދުވަސްތަކުގައި ތެލުގެ އަގު މިހާވަރަށް އުފުލުނު ފުރަތަމަ ފަހަރެވެ.

މެދުއިރުމަތީގެ ހަނގުރާމައިގެ ސަބަބުން ދުނިޔޭގެ ބާޒާރުގައި ތަކެތީގެ އަގު އުފުލުމާއެކު އިގުތިސާދަށް ވަރަށް ބޮޑު ލޮޅުމެއް އަންނާނެ ކަމަށް އިގްތިސާދީ މާހިރުން ލަފާކުރައްވަ އެވެ.

މި ހަމަނުޖެހުންތަކާ ގުޅިގެން އެންމެ ބޮޑު ކަންބޮޑުވުމެއް އުފެދިފައިވަނީ ދުނިޔޭގެ ތެލުގެ ވިޔަފާރީގެ "މަގު" ކަމުގައިވާ ހޮރްމޫޒް ކަނޑުއޮޅި ބަންދުވުމެވެ. މި ކަނޑުއޮޅިއަކީ ދުނިޔޭގައި ބޭނުންކުރާ ތެލުގެ ގާތްގަނޑަކަށް 20 އިންސައްތަ އުފުލާ މައި މަގެވެ.

ތެޔޮ އުފުލާ ބޮޑެތި ބޯޓުފަހަރު ނުވަތަ ޓޭންކަރުތައް އޮޕަރޭޓްކުރާ ބައެއް ކުންފުނިތަކުން ވަނީ އެ ސަރަހައްދުން ދަތުރުކުރުން ވަގުތީގޮތުން ހުއްޓާލާފައެވެ. މިއީ ސަޕްލައިއަށް ދިމާވެދާނެ ވަރަށް ބޮޑު ގޮންޖެހުމެކެވެ.

ތެލުގެ ބާޒާރު ދިރާސާކުރާ މާހިރުން ލަފާކުރާ ގޮތުގައި، ހަމަނުޖެހުންތައް އިތުރަށް ގޯސްވެ، ހޮރްމޫޒް ކަނޑުއޮޅިން ކުރާ ދަތުރުތަކަށް ހުރަސްއެޅިއްޖެނަމަ، ތެޔޮ ފީފާއެއްގެ އަގު 100 ޑޮލަރަށްވުރެ މައްޗަށް ދިއުމަކީ އެކަށީގެންވާ ކަމެކެވެ. ބައެއް ރިޕޯޓުތައް ބުނާގޮތުން އޯޕެކް ޕްލަސްއިން މިއަދު ބާއްވާ ބައްދަލުވުމުގައި، ބާޒާރު ހަމައަކަށް އެޅުވުމަށްޓަކައި ތެޔޮ އުފައްދާ މިންވަރު އިތުރުކުރުމަށް ނިންމުމަކީ ގާތްކަމެކެވެ.