ރިޔާސީ ބަޔާނުގައި ވިދާޅުވި ގޮތަށް ރައީސުލް ޖުމްހޫރިއްޔާ މާދަމާ އިން ފެށިގެން ނޫސްވެރިންނާ ބައްދަލުކުރައްވަނީ

ރިޔާސީ ބަޔާނުގައި ވިދާޅުވި ގޮތަށް ރައީސުލް ޖުމްހޫރިއްޔާ މާދަމާ އިން ފެށިގެން ނޫސްވެރިންނާ ބައްދަލުކުރައްވާނެ ކަމަށް ރައީސުލް ޖުމްހޫރިއްޔާގެ އޮފީހުން ވިދާޅުވެއްޖެ އެވެ.

ރައީސުލް ޖުމްހޫރިއްޔާގެ ތިން ވަނަ ރިޔާސީ ބަޔާން އިއްވާފައި ވަނީ މިދިޔަ ފެބްރުއަރީ މަހުގެ 5 ވަނަ ދުވަހުގަ އެވެ.

ރިޔާސީ ބަޔާނުގައި ރައީސުލް ޖުމްހޫރިއްޔާ ވިދާޅުވެފައި ވަނީ މާރިޗް މަހުގެ ފުރަތަމަ ހޯމަ އަށްވާ ހޯމަ ދުވަހުން ފެށިގެން ކޮންމެ ހަފްތާއެއްގެ ހޯމަ ދުވަހުގެ ހެނދުނު 10:00 ގައި އެމަނިކުފާނު ނޫސްވެރިންނާއި ބައްދަލު ކުރައްވާނެ ވާހަކަ އެވެ.

މާދަމާ ރައީސުލް ޖުމްހޫރިއްޔާ ނޫސްވެރިންނާއި، ބައްދަލުކުރައްވާނެ ކަމަށް ރައީސްގެ ތަރުޖަމާން ހީނާ ވަލީދު ވަނީ ވިދާޅުވެފަ އެވެ.

ރިޔާސީ ބަޔާނުގައި މީގެ އިތުރުން، ސަރުކާރުގެ ވުޒާރާތަކުން ކުރަމުންދާ މަސައްކަތްތަކުގެ ތަފުސީލު ހާމަކުރުމަށްޓަކައި، ކޮންމެ ހަފުތާއަކު ކެބިނެޓު ވަޒީރަކު ވެސް މީޑިއާއާ ބައްދަލުކުރައްވާނެ ކަމަށް ރައީސް ވަނީ އިއުލާނު ކުރައްވާފައެވެ.

އެގޮތުން މިއަދު ވަނީ ފުރަތަމަ ވަޒީރުންގެ ބައްދަލުވުން ބާއްވާފަ އެވެ.