މާލެ ސިޓީ ކައުންސިލުން އަލިފާނުގެ ހާދިސާ ހިނގި ތިން ތަނެއް ސާފުކުރަން ފަށައިފި

މާލެ އާއި ހުޅުމާލޭގެ ތިން ސަރަހައްދެއްގައި ހިނގި އަލިފާނުގެ ހާދިސާތަކާ ގުޅިގެން، އެ ތަންތަން ސާފުކުރުމުގެ އަމަލީ މަސައްކަތް މާލެ ސިޓީ ކައުންސިލުން ފަށައިފިއެވެ.

ސިޓީ ކައުންސިލުން މައުލޫމާތު ދެއްވި ގޮތުގައި، މި މަސައްކަތް ކުރިއަށް ގެންދަނީ އެ ކައުންސިލްގެ ވޭސްޓް ސެކްޝަންގެ ސީދާ ބެލުމުގެ ދަށުންނެވެ. މިގޮތުން މިހާރު ސާފުކުރަމުންދާ ތިން ތަނަކީ ހުޅުމާލެ ފޭސް 1 ގެ 110 ވަނަ ފްލެޓުގެ ގްރައުންޑް ފްލޯ އާއި، މާލޭގެ މާފަންނު އަވަށުގައި ހުރި ދެ ބުރީގެ އިމާރާތެއް ކަމަށްވާ މ. ޝަފާގެ އިތުރުން ގ. ފުންފަޅު ގޭގެ ހަތަރުވަނަ ފަންގިފިލާއެވެ.

ކައުންސިލުން ވިދާޅުވީ މި ތިން ތަނަކީ ވެސް ދާދި ފަހުން ހިނގި އަލިފާނުގެ ހާދިސާތަކުގައި ބޮޑެތި ގެއްލުންތަކެއް ލިބި، ބޭނުންނުކުރެވޭ ވަރަށް އަނދާފައިވާ ތަންތަން ކަމަށެވެ.

މި ހާދިސާތަކުގެ ތަފްސީލަށް ބަލާއިރު، ހުޅުމާލެ 110 ވަނަ ފްލެޓުގައި އަލިފާނުގެ ހާދިސާ ހިނގާފައިވަނީ މިދިޔަ އަންގާރަ ދުވަހުއެވެ. މި ހާދިސާގައި އެ ފްލެޓުގެ ގްރައުންޑް ފްލޯއަށް އެކި ވަރުގެ ގެއްލުންތައް ލިބިފައިވެއެވެ. މާފަންނު ޝަފާ ގޭގައި އަލިފާން ރޯވެފައިވަނީ އިއްޔެ މެންދުރުގެ ވަގުތެއްގައެވެ. އަދި ގ. ފުންފަޅު ގޭގެ ހަތަރުވަނަ ފަންގިފިލާގައި އަލިފާން ރޯވީ މިދިޔަ ހޯމަ ދުވަހުއެވެ.

މި ސަރަހައްދުތައް ސާފުކުރުމުގެ މަސައްކަތުގެ ތެރެއިން، އަލިފާނުގެ ހާދިސާގެ ސަބަބުން އުފެދިފައިވާ ކުނިތަކާއި، ބޭނުންނުކުރެވޭ ވަރަށް އަނދާފައިވާ ތަކެތި ނަގައި އެ ސަރަހައްދުތަކުން ހުސްކުރުމުގެ މަސައްކަތް ސިޓީ ކައުންސިލްގެ މުވައްޒަފުން ދަނީ ހަލުވިކަމާއެކު ކުރަމުންނެވެ. މި މަސައްކަތުގެ މަގުސަދަކީ އަލިފާނުގެ ހާދިސާ ހިނގި ތަންތަނުން އާންމުންނަށް ކުރިމަތިވެދާނެ ސިއްހީ އަދި ސަލާމަތީ ނުރައްކާތަކުން ރައްކާތެރިކުރުމެވެ.