ލީބިޔާގެ ވައިގެ ސަރަހައްދުގެ ދަތިކުރުން އުވާލައިފި

ލީބިޔާގައި 2015 ވަނަ އަހަރު ހިނގި ދާޚިލީ ހަމަނުޖެހުންތަކާ ގުޅިގެން، އދގެ ދަ އިންޓަނޭޝަނަލް ސިވިލް އޭވިއޭޝަން އޮގަނައިޒޭޝަން (އައިކާއޯ) އިން އެ ގައުމުގެ ވައިގެ ސަރަހައްދަށް އަޅާފައިވާ ދަތިކުރުމުގެ ފިޔަވަޅުތައް އުވާލައިފިއެވެ.

މި ނިންމުން އިޢުލާނުކުރީ ގަތަރުގައި ބޭއްވުނު މަދަނީ އުދުހުންތަކާ ބެހޭ ސަރަހައްދީ އިސް އޮފިޝަލުންގެ ބައްދަލުވުމެއްގައި، އައިކާއޯގެ ސެކްރެޓަރީ ޖެނެރަލް ހުއާން ކާލޯސް ސަލަޒާ އެވެ.

ލީބިޔާގެ ދަތުރުފަތުރުގެ ވަޒީރު ބަޔާންކުރި ގޮތުގައި، މިއީ އެ ގައުމުގެ އުދުހުންތަކުގެ ދާއިރާއިން ލިބުނު ފާހަގަކޮށްލެވޭ ކާމިޔާބީއެއް ކަމަށާއި، އަދި ބައިނަލްއަގްވާމީ މުޖުތަމައުގެ އިތުބާރު އަލުން ލިބުމުގެ ނަތީޖާއެއް ކަމަށެވެ.

މި ދަތިކުރުމުގެ ފިޔަވަޅުތައް އުވާލުމާ ގުޅިގެން، ލީބިޔާގެ ވައިގެ ސަރަހައްދު ބޭނުންކޮށްގެން ދަތުރުކުރުމުގެ ހުއްދައަށް އެދި ދުނިޔޭގެ އެކި އެއާލައިންތަކުން ބޮޑު ތަރުހީބެއް ދޭން ފަށާފައިވެއެވެ.

މި ނޮވެމްބަރު މަހުން ފެށޭ ފިނި މޫސުމުގައި މަހަކު 61,968 ފްލައިޓް އެ ސަރަހައްދުން ދަތުރުކުރުމަށް ހުއްދަ ދޫކޮށްފައިވާ ކަމަށް އެ ގައުމުން މައުލޫމާތު ދެއެވެ.

މިއީ ކުރީ އަހަރުގެ އެވްރެޖް 2,000 ފްލައިޓާ އަޅާބަލާއިރު ވަރަށް ބޮޑު އިތުރުވުމެކެވެ.

2011 ވަނަ އަހަރުގެ ހަމަނުޖެހުންތަކާއި 2014 ވަނަ އަހަރުގެ ދާޚިލީ ހަނގުރާމައިގެ ސަބަބުން ލީބިޔާގެ ވައިގެ ދަތުރުފަތުރަށް ބޮޑެތި ގެއްލުންތަކެއް ކުރިމަތިވެފައިވީ ނަމަވެސް، މި އައު ބަދަލާއެކު ގައުމުގެ އިގްތިސާދަށް ބޮޑު ކުރިއެރުމެއް ލިބޭނެ ކަމަށް މާހިރުން ވަނީ ލަފާކޮށްފައެވެ.