އާމްދަނީ އާއި ހިލޭ އެހީގެ ގޮތުގައި 20.5 ބިލިއަން ރުފިޔާ ލިބިއްޖެ

ޖުލައި 10 ގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 20.5 ބިލިއަން ރުފިޔާ ލިބިއްޖެއެވެ.

މިއީ މިދިޔަ އަހަރުގެ މި މުއްދަތާ އަޅާބަލާއިރު 7.9 އިންސައްތައިގެ އިތުރުވުމެކެވެ.

މިނިސްޓްރީ އޮފް ފިނޭންސްގެ ވީކްލީ ފިސްކަލް ޑިވެލޮޕްމަންޓް ރިޕޯޓުގައިވާ ގޮތުގައި، ޓެކުހުގެ ގޮތުގައި ދައުލަތަށް 15.7 ބިލިއަން ރުފިޔާ ލިބިފައިވެއެވެ.

މިއީ މުޅި އާމްދަނީގެ 76.3 އިންސައްތައެވެ. ޓެކުހުގެ ރޭޓްތަކަށް ގެނެވުނު ބަދަލާ ގުޅިގެން، ގްރީން ޓެކްސްގެ ގޮތުގައި ލިބުނު އާމްދަނީ 95.8 އިންސައްތަ އިތުރުވެފައިވާއިރު، ޑިޕާޗަރ ޓެކްސްގެ ގޮތުގައި ލިބުނު އާމްދަނީ 52.6 އިންސައްތަ އިތުރުވެފައިވެއެވެ.ފަތުރުވެރިކަމުގެ ދާއިރާއިން ލިބޭ އާމްދަނީވެސް ވަނީ އިތުރުވެފައެވެ. އެގޮތުން އެއަރޕޯޓް ޑިވެލޮޕްމަންޓް ފީގެ ގޮތުގައި ލިބުނު އާމްދަނީ 49.3 އިންސައްތަ އިތުރުވެފައިވެއެވެ. މިއަހަރުގެ މިހާތަނަށް ރާއްޖެއަށް 2.1 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 9.6 އިންސައްތައިގެ އިތުރުވުމެކެވެ.

ރިޒޯޓުތަކުން ކުލީގެ ގޮތުގައި ލިބޭ އާމްދަނީގެ އިތުރުން، ލޭންޑް އެކުއިޒިޝަން އެންޑް ކޮންވަރޝަން ފީ އަދި ލީޒް ޕީރިއެޑް އެކްސްޓެންޝަން ފީގެ ގޮތުގައި ލިބޭ އާމްދަނީވެސް ވަނީ އިތުރުވެފައެވެ. މި އިތުރުވުމާއެކު ސޮވެރިން ޑިވެލޮޕްމަންޓް ފަންޑަށް ޖަމާކުރެވުނު ފައިސާގެ އަދަދު 50.3 އިންސައްތަ އިތުރުވެ، 1.1 ބިލިއަން ރުފިޔާއަށް އަރާފައިވެއެވެ.