ބޭރު ފައިސާ މާރުކުރުން ނުވަތަ ފޮރިންގ އެކްސްޗޭންޖުގެ ޤާނޫނެއް ނެތުމުގެ ސަބަބުން މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ އަތް އޮތީ ބަނދެވިފައި ކަމަށް ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
އެމްއެމްއޭއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ގަވަރުނަރު ވަނީ ރާއްޖެ އަންނަ ކޮންމެ ފަތުރުވެރިއަކަށް 500 ޑޮލަރު މާރުކުރަން ލާޒިމްކޮށް އެކުލަވާލި ގަވާއިދަށް ބަދަލު ގެނެސްފައިވާ ކަމަށް ބުނެ ދެކެވޭ ވާހަކަތައް ދޮގުކުރައްވާފައެވެ. އެކަން ދޮގު ކުރައްވާ މުނައްވަރު ވިދާޅުވީ ރިސޯޓުތަކާއި ގެސްޓް ހައުސްތަކަށް ލިބޭ ޑޮލަރު ބޭންކުތަކުން މާރުކުރަންޖެހޭ ގޮތަށް ނިންމާފައިވާ ނިންމުމަށް ލުޔެއް ނުދޭ ކަމަށެވެ. އަދި މަސައްކަތް ކުރަމުން ދަނީ މިހާރު އެކަމަށް ހަދާފައިވާ ގަވާއިދު ގާނޫނަކަށް ބަދަލުކުރުމަށް ކަމަށް ވެސް ވިދާޅުވިއެވެ.
އެއްވެސް ލުޔެއް ދީފައެއް ނުވާނެ. ފެއާ ވުމުގެ ގޮތުން ނޮން ޓޫއަރިޒަމް ފަރާތްތައް ހިމެނުން ފިޔަވައި އިތުރު އެއްވެސް ޗޭންޖެއް ގެނެސްފައެއް ނުވާނެ - ގަވަރުނަރު އަހުމަދު މުނައްވަރު
ގަވަރުނަރު ވިދާޅުވީ އެފަދަ ގާނޫނެއްގެ މަސައްކަތް ކުރުމުގެ އެންމެ ބޮޑު މަގްސަދަކީ ފޮރިން އެކްސްޗޭންޖު މާކެޓުގައި ބޭންކުތަކަށް ޑޮލަރު ވަންނަ މިންވަރު ވަރަށް ބޮޑަށް ދަށަށް ގޮސްފައިވުމުން ކަމަށެވެ. އަދި ވިދާޅުވީ ބޭންކިން ނިޒާމަށް ބޭރު ފައިސާ މާރުކުރުމަކީ ދުނިޔޭގެ ގިނަ ޤައުމުތަކުގައި ވެސް ކުރަމުން އަންނަ ކަމެއް ކަމަށެވެ. އެކަން ނުކޮށް އޮތް ގައުމަކީ ދިވެހިރާއްޖެކަން ފާހަގަކުރައްވާ މުނައްވަރު ވިދާޅުވީ ރާއްޖޭގެ ޓޫރިޒަމް ދާއިރާއަށް އަހަރަކު ހަތަރު ބިލިއަން ޑޮލަރު ވަންނަ އިރު، ދައުލަތުގެ ރިޒާވް އިތުރު ނުވަނީ ކީއްވެތޯ އައިއެމްއެފް އަދި ވޯލްޑް ބޭންކް ފަދަ މަރުކަޒުތަކުން ވެސް ސުވާލު ކޮށްފައިވާ ކަމަށެވެ.
އޭގެއިތުރުން، އެމްއެމްއޭއިން މިގެންނަ ބަދަލާއެކު ދިވެހި ރައްޔިތުންނަށް ފޮރިން އެކްސްޗޭންޖު މާކެޓުގައި ފަސޭހައިން ޑޮލަރު ލިބި، ވިޔަފާރިތަކަށްވެސް ފަސޭހައިން ޑޮލަރު ލިބޭނެކަމަށް ވެސް މުނައްވަރު ވިދާޅުވިއެވެ.
15 އަހަރު ކުރިން ފެށިގެން މިހާރަށްވެސް ކޮބައިތޯ އަޅުގަނޑުމެން ރާއްޖެއިން ބޭރަށް ދާއިރު ދިވެއްސަކަަށް ޑޮލަރު ހޯދަންޖެހޭ ގޮތަކީ؟ ރޭޓަކީ 15.42 އެކަމު ބްލެކް މާކެޓުގައި އަބަދު ގަންނަންމިޖެހެނީ. އެހެންވީމަ އަޅުގަނޑުމެން އަބަދު ބޭނުންވޭތޯ ބްލެކްމާކެޓް ފްލަރިޝްވެގެން އޮންނަން. އިންފޯމަލް މާކެޓެއް އޮތުން ބޭނުންވޭތޯ. - ގަވަރުނަރު އަހުމަދު މުނައްވަރު
ްިއިތުރަށް ވާހަކަދައްކަވަމުން މުނައްވަރު ވިދާޅުވީ ކޮވިޑުގެ ކުރިން ފަތުރުވެރިކަމުން ގާތްގަނޑަކަށް 70 އިންސައްތަ ޑޮލަރު ވަންނަމުން ދިޔަ ނަމަވެސް، މިހާރު އެ އިންސައްތަ ހުރީ 50 ގައި ކަމަށެވެ. އަދި ޑޮލަރު މާރުކުރާ އަދަދަކީ ގާތްގަނޑަކަށް 10 އިންސައްތަ ކަމަށާއި ކޮވިޑުގެ ކުރިން ގާތްގަނޑަކަށް 20 އިންސައްތަ މާރުކުރާ ކަމަށެވެ. އެހެންކަމުން މަސައްކަތް ފަށައިގެން މިއުޅެނީ ފޮރިން އެކްސްޗޭންޖު މާކެޓުގައި މިހާރު ހުރި ލެވެލް ކުރިން ހުރި ލެވެލްއަށް ގެންދިއުމަށް ކަމަށެވެ.
ގަވަރުނަރު ވަނީ ޑޮލަރު މާރުކުރަންޖެހޭ ގޮތަށް އެކުލަވާލި ގަވާއިދަށް ބަދަލު ނުގެންނަ ކަމަށް ތަކުރާރުކުރައްވާފައެވެ. އަދި އެ ގަވައިދަށް ގެނައި ހަމައެކަނި ބަދަލަކީ ފަތުރުވެރި ނޫން ކެޓަގަރީއެއް އިތުރުކުރުން ކަމަށެވެ.
