އިންޑިއާ ސިފައިން ތިބުމާ ދެކޮޅުވުމަކީ އެ ގައުމާ ދެކޮޅަށް ނިކުތުމެއް ނޫން: ރައީސުލްޖުމްހޫރިއްޔާ

އިންޑިއާ ސިފައިން ރާއްޖޭގައި ތިބުމުން އެކަމާ އިހުތިޖާޖު ކުރުމުގެ މާނައަކީ ދިވެހިރާއްޖެއިން އެގައުމާ ދެކޮޅުވެ، ރާއްޖެއާ އެގައުމާ ދެމެދު މައްސަލައެއް އޮތުން ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އދ. ގެ އާއްމު މަޖިލީހުގެ 79 ވަނަ ޖަލްސާގައި ބައިވެރިވެވަޑައިގަތުމަށް ނިއުޔޯކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެމެރިކާގެ މަޝްހޫރު ޕްރިންސްޓަން ޔުނިވާސިޓީގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ ރާއްޖެއާއި އިންޑިއާއާ ދެމެދު އެއްވެސް މައްސަލައެއް ނެތް ކަމަށެވެ. ދިވެހި ރައްޔިތުންނަށް މައްސަލައަކަށް ވީ ބޭރު ގައުމެއްގެ ސިފައިން ރާއްޖޭގައި ގާއިމުވެ ތިބުން ކަމަށެވެ.

ރާއްޖޭގައި ޤާއިމްވެ ތިބީ އިންޑިއާގެ 77 ސިފައިންނެވެ. އެމީހުން ޤާއިމްވެ ތިބީ ތިން މަރުކަޒެއްގައެވެ. އެއީ ހދ. ހަނިމާދޫ، ސ.ގަން އަދި ލ.ކައްދޫއެވެ.

އެކަން ފާހަގަކުރައްވައި ރައީސް ވިދާޅުވީ 77 ސިފައިންނަކީ ގިނަ އަދަދެއް ނޫން ނަމަވެސް ބޭރުގެ އެންމެ ސިފައިންގެ މީހަކު މި ގައުމުގައި ގާއިމުވެ ހުރުމަކީ ދިވެހި އެއްވެސް ރައްޔިތަކު ރުހޭނެ ކަމެއް ނޫން ކަމަށެވެ. އިންޑިއާ ސިފައިން ފޮނުވާލެވުނީ ވެސް އެގޮތުގެ މަތިން ކަމަށް ރައީސް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އިންޑިއާ ސިފައިން ރާއްޖެއިން ފޮނުވާލިޔަސް ދެ ޤައުމުގެ ގުޅުމަށް އެއްވެސް އަސަރެއް ނުކުރާނެ ކަމަށެވެ. އަދި ދެ ޤައުމުގެ ދެމެދުގައި އޮތް ޒަމާންވީ ގުޅުން އެގޮތުގައި ދެމި އޮންނާނެ ކަންވެސް އެމަނިކުފާނު ފާހަގަކުރެއްވިއެވެ.

އިންޑިއާގެ ސިފައިން ރާއްޖޭގައި ހަރަކާތްތެރިވަމުން އައީ އެ ޤައުމުން ހަދިޔާކޮށްފައިވާ ދެ ހެލިކަޕްޓަރާއި ޑޯނިއާ މަތިންދާ ބޯޓެއް ދުއްވައި، އޭގެ މެއިންޓަނަންސްގެ ކަންކަން ބެލެހެއްޓުމަށެވެ. ނަމަވެސް ސިފައިން ފޮނުވާލުމަށްފަހު އެތަކެތި އޮޕަރޭޓްކުރަން އަސްކަރިއްޔާއަށް ނިސްބަތްނުވާ އިންޑިއާގެ މަދަނީ ބަޔަކު ވަނީ ރާއްޖެ އައިސްފައެވެ.

ރާއްޖޭން އިންޑިއާ ސިފައިން ފޮނުވައިލުމަކީ ރައީސްގެ ރިޔާސީ ވައުދެކެވެ. އެ ވައުދު ފުރިހަމަވެގެން ދިޔައިރު، ސަރުކާރުން ބުނެފައިވަނީ މެއި މަހުގެ 10 ގެ ފަހުން ރާއްޖޭގައި އިންޑިއާ ސިފައިން ނުތިބޭނެ ކަަމަށެވެ.

އިންޑިއާ ސިފައިންގެ ފުރަތަމަ ބެޗް ދިޔައީ މާޗް މަހުގެ ތެރޭގައެވެ. އަދި ދެވަނަ ބެޗް ދިޔައީ އޭޕްރީލް މަހުގެ ތެރޭގައެވެ.