ރޯދަ އަށް މާލެތެރެ ސާފުކުރަނީ

"ރޯދަ ސާފު" ގެ ނަމުގައި މާލެ ސާފުކުރުމުގެ ހާއްސަ ހަރަކާތެއް ދިވެހިބަހާއި ސަގާފަތާއި ތަރިކައާއި ބެހޭ ވުޒާރާއިން ކުރިއަށް ގެންގޮސްފިއެވެ.

މި ހަރަކާތުގައި ދިވެހިބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހިމާއި ސިއްހީ ވަޒީރު އަބްދުﷲ ނާޒިމް އިބްރާހިމް ވަނީ ބައިވެރިވެވަޑައިގެންނެވިއެވެ.

ކޮންމެ އަހަރަކު ވެސް ދިވެހިބަހާއި ސަގާފަތާއި ތަރިކައާއި ބެހޭ ވުޒާރާއިން އިންތިޒާމްކޮށްގެން އެ ހަރަކާތް ކުރިއަށް ގެންދެއެވެ.

މާލެ ސަރަހައްދުގައި އެ ހަރަކާތުގެ ދަށުން ވަނީ ފަސް ސަރަހައްދެއް ސާފުކޮށްފައެވެ. އަދި ހަރަކާތުގައި ސަރުކާރުގެ މުވައްސަސާތަކާއި ކުންފުނިތަކާއި އެކި އިދާރާތައް އަދި ވުޒާރާތައް ހިމޭނޭގޮތައް 22 އިދާރާއަކުން ވަނީ ބައިވެރިވެފައެވެ.