މިދިޔަ މަހު ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު 197،000 އިން މައްޗަށް އަރައިފި

މިދިޔަ މަހުގެ ތެރޭގައި ރާއްޖެއަށް 197،640 (އެއްލައްކަ ނުވަދިހަ ހަތްހާސް ހަސަތޭކަ ސާޅީސް) ފަތުރުވެރިން ޒިޔާރަތްކޮށްފައިވާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާގެ ތަފާސްހިސާބުތަކުން ހާމަވެއްޖެއެވެ.

މިއީ ވޭތުވެދިޔަ އަހަރުގެ މި މުއްދަތުގައި ރާއްޖެ އައި 193،529 ފަތުރުވެރިންނާ އަޅާބަލާއިރު 2.1 އިންސައްތައިގެ ކުރިއެރުމެކެވެ. ރާއްޖެ ޒިޔާރަތްކުރި ފަރާތްތަކުގެ ތެރޭގައި އެންމެ ބޮޑު ޙިއްޞާއެއް ހިމެނެނީ ޗުއްޓީ ހޭދަކުރުމުގެ ބޭނުމުގައި އައި ފަތުރުވެރިންނެވެ.

ނިމިދިޔަ މަހު ފަތުރުވެރިން އައި މިންވަރު އިތުރުވި ނަމަވެސް، މުޅި އަހަރުގެ ޖުމްލަ ޢަދަދަށް ބަލާއިރު މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 3.7 އިންސައްތައިގެ ދަށްވުމެކެވެ. އެގޮތުން، މިއަހަރުގެ މިހާތަނަށް ރާއްޖެއަށް ޖުމްލަ 1،456،930 (އެއްމިލިއަން ހަތަރުލައްކަ ފަންސާސް ހަހާސް ނުވަސަތޭކަ ތިރީސް) ފަތުރުވެރިން ވަނީ ޒިޔާރަތްކޮށްފައެވެ.

މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައިސްފައިވާ ފަސް ޤައުމަކީ ޗައިނާ، ރަޝިޔާ، އިނގިރޭސިވިލާތް، އިޓަލީވިލާތް އަދި ޖަރުމަނުވިލާތެވެ.

މި ފަތުރުވެރިން މައިގަނޑު ގޮތެއްގައި ޗުއްޓީ ހޭދަކޮށްފައިވަނީ ރާއްޖޭގެ ޓޫރިސްޓު ރިސޯޓުތަކާއި ގެސްޓްހައުސްތަކުގައެވެ.