ހަގީގީ މާނައިގައި ތަރައްގީ ބޭނުންވާނަމަ މީހުން ބިނާކުރަންޖެހޭ: ޑރ ޝަމްހީދު

ހަގީގީ މާނައިގައި ތަރައްގީ ބޭނުންވާނަމަ މީހުން ބިނާކުރަންޖެހޭ ކަމަށް ހުޅުމާލެ ދެކުނު ދާއިރާގެ މެމްބަރު ޑރ އަހްމަދު ޝަމްހީދު ވިދާޅުވެއްޖެއެވެ.

އަސްލުޓީވީގެ އެކްސްކްލޫސިވް ގައި ބައިވެރިވެ ވަޑައިގެން ޑރ ޝަމްހީދު ވަނީ ގައުމާއި މެދު ފުންކޮށްވިސްނާ ނަމަ މީހުން ބިނާކުރަންޖެހޭ ކަމަށް ވިދާޅުވެފައެވެ.

މީހުން ބިނާ ނުކޮށް ކޮންކްރީޓުން ތަރައްގީ ގެންނަން ބޭނުންވިއަސް އެކަން ނުކުރެވޭނެ ކަމަށް ޑރ ޝަމްހީދު ވިދާޅުވިއެވެ.

މީހުން ބިނާކުރުމުގެ ވާހަކަ ދައްކާއިރު އެންމެ ބޮޑަށް ސްޓްރަގްލް ކުރާ އެއް ދާއިރާއަކީ ސިއްހީ ދާއިރާކަމަށް ވިދާޅުވެ އެ ދާއިރާގައި ހަރަކާތްތެރިވާނެ ދިވެހިން އެކަށީގެންވާ ނެތް ކަމަށް ޑރ ޝަމްހީދު ވިދާޅުވިއެވެ.

މިގައުމަށް ބޭނުންވާ ސިއްހީ ދާއިރާގައި ހަރަކާތްތެރިވާ މުވައްޒަފުން ތަމްރީނުކުރާނެ މިންވަރަށް ފައިސާ ކޮންމެ އަހަރަކު ދައުލަތަށް ލިބުނު ނަމަވެސް އެކަން ކުރަން މަސައްކަތްކުރާތަން ނުފެންނަ ކަމަށް ޑރ ޝަމްހީދު ވިދާޅުވިއެވެ.

ގައުމެއް ބިނާކުރެވޭނެ ކަމަށް ގަބޫލުކުރެވެނީ ގައުމުގައި އުފަންވާ ކުދިންނަށް އެންމެ ތުއްތު އިރުވެސް ހަގީގީ މާނާއިގައި ކުރެވޭ އިންވެސްޓުން ކަމަށް ޑރ ޝަމްހީދު ވިދާޅުވިއެވެ.

ރައްޔިތުންގެ މަޖިލީހަކީ ރައްޔިތުން އެހާ އިހްތިރާމް ކުރާ ތަނެއް ނޫން ކަމަށް ޝަމްހީދު ވިދާޅުވިއެވެ. އެކަމުގެ ސަބަބެއް ކަމުގައި ޝަމްހީދު ވިދާޅުވިީ އެތަނުގައި ތިބި މެމްބަރުންގެ ކެޕޭސިޓީ ނެތުން ކަމަށެވެ.

ރާއްޖޭގެ އެކި ދާއިރާތަކަށް ބަލައިލިނަމަވެސް ފެނިގެންދަނީ އެދާއިރާތަކަށް ބޭނުންވާ ތަމްރީނާއި ތަޖުރިބާ ހުރި ބޭފުޅުން ނެތްކަން ކަމަށް ޝަމްހީދު ވިދާޅުވިއެވެ.

މިރާއްޖެ މިހާރު އޮތް ހިސާބުން ކުރިއަށް ގެންދެވޭނީ މީހުން ބިނާކުރަން ކުރާ އިންވެސްޓެމެންޓް އިތުރުކޮށް މީހުން ބިނާކޮށްގެން ކަމަށް އޭނާ ވިދާޅުވިއެވެ.