މަގުމަތީގެ ގަވާއިދާ ތަކުރާރުކޮށް ޚިލާފުވާ މީހުންނަށް ހަރުކަށި ފިޔަވަޅު އަޅަނީ

މަގުމަތީގެ ސަލާމަތާއި ރައްކާތެރިކަމުގެ ޤަވާއިދުތަކަށް ތަކުރާރުކޮށް ހިލާފުވާ ފަރާތްތަކާމެދު ގާނޫނީ ގޮތުން އެޅެންހުރި އެންމެ ހަރުކަށި ފިޔަވަޅުތައް އަޅުއްވާނެ ކަމަށް ކޮމިޝަނަރ އޮފް ޕޮލިސް އަހްމަދު މުހައްމަދު ވިދާޅުވެއްޖެއެވެ.

ކޮމިޝަނަރ އޮފް ޕޮލިސް ދެއްވި ހާއްސަ މެސެޖެއްގައި ފާހަގަކުރެއްވި ގޮތުގައި، މަގުމަތީގެ އަދަބުތަކާއި އުސޫލުތަކަށް އިޙްތިރާމް ނުކުރާ މަދު ބައެއްގެ ސަބަބުން، ޢާންމު ރައްޔިތުންގެ ޙައްޤުތަކަށް އުނިކަން ލިބި، ނުރައްކާތެރި އެކްސިޑެންޓްތައް ހިނގުން ވަނީ އިތުރުވެފައެވެ. އެހެންކަމުން، ޓްރެފިކް ގަވާއުދުތަކަށް ބޯނުލަނބާ ފަރާތްތައް ދެނެގަނެ، އެ ފަރާތްތަކާމެދު ދިވެހި ފުލުހުންގެ ހިދުމަތުން ހާއްސަ ފިޔަވަޅުތަކެއް އަޅަމުން ގެންދާނެ ކަމަށް އެމަނިކުފާނު ވިދާޅުވިއެވެ.

މި ފިޔަވަޅުތަކުގެ މައިގަނޑު މަގްސަދަކީ މަގުތަކަކީ އެންމެހައި ރައްޔިތުންނަށް އަމާން އަދި ރައްކާތެރި ވެށްޓަކަށް ހެދުމާއެކު، ޒިންމާދާރުކަން ކުޑަ އަމަލުތަކުގެ ސަބަބުން ކުރިމަތިވާ ނުރައްކާތެރި ހާދިސާތައް ހުއްޓުވުން ކަމަށް ސީޕީ ބަޔާންކުރެއްވިއެވެ.

މީގެއިތުރުން، ކަމާގުޅުންހުރި އެންމެހައި މުއައްސަސާތަކާ ގުޅިގެން މި ފިޔަވަޅުތައް އެންމެ ފުރިހަމަ ގޮތުގައި ތަންފީޒުކުރުމަށް ފުލުހުންގެ ކަމާބެހޭ ހުރިހާ ބަހާތަކަށް މިހާރު އަންގަވާފައިވާ ކަމަށްވެސް ވިދާޅުވިއެވެ.

ގްރޭޓަރ މާލެ ސަރަޙައްދުގެ އިތުރުން، އަތޮޅުތަކުގެ ރަށްރަށުގައިވެސް މި އުސޫލުތައް ހަރުދަނާކަމާއެކު ތަންފީޒު ކުރެވެމުންދާނެ ކަމަށް އެމަނިކުފާނު ފާހަގަކުރެއްވިއެވެ.

ކޮމިޝަނަރުގެ މެސެޖު ނިންމަވާލައްވަމުން، މަގުމަތީގެ އަމާންކަމާއި ރައްކާތެރިކަން ދެމެހެއްޓުމަށްޓަކައި ފުލުހުން ކުރަމުންދާ މަސައްކަތްތަކުގައި، އެންމެހައި ލޮބުވެތި ރައްޔިތުންގެ ފުރިހަމަ އެއްބާރުލެއްވުމާއި އެހީތެރިކަން ދެއްވުމަށް އިހްލާސްތެރިކަމާއެކު އިލްތިމާސްކުރެއްވިއެވެ.