ޑޮލަރުގެ އަގުދަނީ ދުވަހެއްދުވަހަކަށް އުފުލެމުން: ރައީސް ނަޝީދު

ދިވެހިރާއްޖެއަށް ކުރިމަތިވެފައިވާ ޑޮލަރުގެ ދަތިކަމަށް އެއްވެސް ހައްލެއް ނުލިބި، ދުވަހެއް ދުވަހަކަށް ޑޮލަރުގެ އަގު އުފުލެމުންދާ ކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެކްސް ގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ޑޮލަރުގެ ތާށިކަމަށް އެދެވޭ ހައްލެއް ނުލިބުމުގެ ސަބަބުން އަމިއްލަ ވިޔަފާރިތަކަށް ޓީޓީ ހެދުމަށާއި މުދާ އެތެރެކުރުމަށް ބޮޑެތި ހުރަސްތަކެއް ކުރިމަތިވެފައިވާ ކަމަށެވެ.

މި ހިނގާ ސެޕްޓެމްބަރު މަސް ނިމުމުގެ ކުރިން 40 އިންސައްތަ ޑޮލަރު މާރުކުރުން ލާޒިމުކުރުމާއި، ބޭރުގެ ޓުއަރ އޮޕަރޭޓަރުންގެ އަތުން ޖީއެސްޓީ ނަގަން ފެށުމުން ދައުލަތަށް 160 މިލިއަން ޑޮލަރު ލިބޭނެ ކަމަށް ސަރުކާރުން އަންދާޒާކުރި ނަމަވެސް، އެކަންކަން ހާސިލުވެފައި ނުވާކަން ރައީސް ނަޝީދުގެ ޕޯސްޓްގައި ވަނީ ފާހަގަކުރައްވާފައެވެ.

ރައީސް ނަޝީދު އިތުރަށް ވިދާޅުވީ، ސަރުކާރުގެ މި ނިންމުންތަކުން އެދެވޭ އެއްވެސް ނަތީޖާއެއް ނުނިކުތުމުގެ ސަބަބުން، އޭގެ ހިތި އަސަރާއި ތަކުލީފުތައް އެންމެ ބޮޑަށް ތަހައްމަލުކުރަން ޖެހިފައިވަނީ ނިކަމެތި އާންމު ރައްޔިތުންނަށް ކަމަށެވެ.

ޑޮލަރުގެ އަގު އުފުލުމުގެ ސަބަބުން ތަކެތީގެ އަގު އުފުލި، ދިރިއުޅުމުގެ ހަރަދުތައް ބޮޑުވަމުންދާ ކަމުގެ ކަންބޮޑުވުން ރައީސް ނަޝީދު ވަނީ ފާޅުކުރައްވާފައެވެ.