މަގުކޮންނަ އިރު ކަރަންޓް ކޭބަލަކަށް ގެއްލުންވެއްޖެނަމަ މަރާމާތުގެ ހަރަދު ހޯދަން ނިންމައިފި

މަގު ކޮނުމުގެ މަސައްކަތްތަކުގެ ތެރޭގައި ކަރަންޓު ކޭބަލްތަކަށް ގެއްލުންވެ، ހިދުމަތް މެދުކެނޑޭ މައްސަލަތައް އިތުރުވަމުންދާތީ، އެކަމުގެ އިހުމާލުވާ ފަރާތްތަކުގެ އަތުން މަރާމާތުގެ ހަރަދު ސްޓެލްކޯ އިން ނިންމައިފިއެވެ.

ސްޓެލްކޯއިން ހާމަކުރި ގޮތުގައި، އެ ކުންފުނީގެ ކަރަންޓު ވިއުގައަށް އެކި ފަރާތްތަކުގެ އިހުމާލުން ލިބޭ ގެއްލުންތަކުގެ ސަބަބުން ކަރަންޓުގެ ޚިދުމަތް ކެނޑި، އާންމު ރައްޔިތުންނަށް ދަނީ ބޮޑެތި ތަކުލީފުތަކަކާ ކުރިމަތިލާން ޖެހެމުންނެވެ. އެހެންކަމުން، މިފަދަ ހާދިސާތަކުގައި ގެއްލުންވާ ކޭބަލްތައް މަރާމާތުކޮށް، ހިދުމަތް އަލުން އިއާދަކުރުމަށް ހިނގާ އެންމެހައި ހަރަދެއް އެކަމަށް ޒިންމާވާންޖެހޭ ފަރާތްތަކުގެ އަތުން ނެގުމަށް މިހާރު ވަނީ ކަނޑައަޅާފައެވެ.

މި ނިންމުމަކީ ކަރަންޓު ކެނޑުމުގެ ސަބަބުން ރައްޔިތުންނަށް ކުރިމަތިވާ ދަތިތައް ވީހާވެސް ކުޑަކޮށް، މެދުކެނޑުމެއްނެތި ފެންވަރު ރަނގަޅު ހިދުމަތެއް ފޯރުކޮށްދިނުމުގެ މަގުސަދުގައި ނިންމި ނިންމުމެއް ކަމަށް އެ ކުންފުނިން ބުނެއެވެ.

މީގެއިތުރުން މަގު ކޮނުމުގެ އެކި މަސައްކަތްތައް ކުރިއަށްގެންދާއިރު ކަރަންޓު ވިއުގައަށް ގެއްލުން ނުވާނެ ހެން ފުރިހަމަ ޒިންމާދާރުކަމާއެކު މަސައްކަތްތައް ރާވައިގެން ކުރިއަށް ގެންދިއުމަށް ހުރިހާ ފަރާތްތަކަށް ސްޓެލްކޯއިން ވަނީ އެންމެހައި ފަރާތްތަކަށް އިލްތިމާސްކޮށްފައެވެ.

ސްޓެލްކޯއިން މި ފިޔަވަޅު އަޅަން ނިންމާފައި މިވަނީ މިދިޔަ ހަފުތާގެ ބުރާސްފަތި ދުވަހާއި ހޮނިހިރު ދުވަހުވެސް މަގު ކޮނުމުގެ ތެރޭގައި ކޭބަލްތަކަށް ގެއްލުންވެ ހުޅުމާލޭގެ ބޮޑު ބަޔަކުން ކަރަންޓުގެ ހިދުމަތް މެދުކެނޑިފައިވާ ދަނޑިވަޅެއްގައެވެ.