އީގަލް ހިލްސްއަށް 500 ހެކްޓަރުގެ ބިން 99 އަހަރަށް ދިނުން: ރާއްޖެއަށް އޮތް ބޮޑު ނުރައްކަލެއް

ދިވެހިރާއްޖޭގެ ފަޚުރުވެރި މިނިވަން ދުވަހަކީ އިނގިރޭސިންގެ ހިމާޔަތުގެ ދަށުގައި އޮތް ކަޅު ސަފުހާތައް ނިމުމަކަށް ގެނެސް، ހިމާޔަތުގެ އެއްބަސްވުން އުވާލުމާއި އެކުއެކީ، 100 އަހަރަށް އައްޑުއަތޮޅު ގަން އިނގިރޭސިވިލާތަށް ކުއްޔަށް ދީފައި އޮތް އެއްބަސްވުން ބާތިލުކުރުން ފާހަގަކުރާ މުހިންމު ދުވަހެކެވެ. ކަންމިހެން އޮތް އިރު ޕަލަސްތީނުގެ އެތައްހާސް މައުސޫމު ތުއްތުކުދިންގެ ޤާތިލުން ކަމުގައިވާ، އިސްރާއީލުގެ ޔަހޫދީ ޒައިނިސްޓުންގެ ނުފޫޒާއި ގުޅުން ބޮޑު ވިޔަފާރިތަކަށް ދިވެހިންގެ ފަސްގަނޑުން އިންޗިއެއްވެސް 99 އަހަރަށް ކީއްކުރަންތޯ، އެންމެ ސިކުންތަކަށްވެސް ދޫކޮށްލުމަކީ ދިވެހި އެއްވެސް ރައްޔިތަކު އެދޭނެ ކަމެއް ނޫނެވެ.

އިސްރާއީލުގެ ޔަހޫދީ ޒައިނިސްޓުންނަށް ރާއްޖެއަށް ނާދެވޭ ގޮތަށް ގާނޫނީ ހުރަސްތައް ގާއިމުކުރެވިފައި އޮތް ނަމަވެސް، މިފަދަ އެއްބަސްވުމެއްގެ ތެރެއިން ރާއްޖޭގެ ވަސީލަތްތަކަށް އަތްގަދަކޮށް ނުވަތަ އެބައިމީހުންގެ ނުފޫޒުން ގާނޫނަށް ފަހުން ބަދަލު ގެނެސްގެން ރާއްޖޭގައި ވަޒަންވެރި ވުމުގެ ފުރުސަތު ހޯދުން ވެސް ދުރެއް ނޫނެވެ. އަދި މިފަދަ އެއްބަސްވުމެއްގެ ތެރެއިން ރާއްޖޭގެ ވަސީލަތްތައް ބޭނުންކޮށްގެން އިންސާނީ ނަސްލު ނައްތާލުމާއި މައުސޫމު ތުއްތު ކުދިން ޤަތުލު ކުރުމަށް އެފައިސާ ބޭނުންކުރުމަކީ ދިވެހި އެއްވެސް ދަރިއަކު ހިތުންރުހުމުން ގަބޫލުވާނެ ނޫނެވެ.

ނަމަވެސް،ފަލަސްތީނުގެ ކުޑަކުދިން މަރަން ހަރަދު ކުރަމުންދާ ޔޫއޭއީގެ އީގަލް ހިލްސް (Eagle Hills) ކުންފުންޏާއެކު ދިވެހި ސަރުކާރުން ސޮއިކުރި "މޯލްޑިވްސް ވޯޓާފްރަންޓް އެންޑް މެރީނާ" ޕްރޮޖެކްޓުގެ ދަށުން، ރަސްމާލެއިން 500 ހެކްޓަރުގެ ބިން 99 އަހަރުގެ މުއްދަތަށް އެ ކުންފުންޏަށް ދިނުމަށް ވަނީ ނިންމާފައެވެ. 12 ބިލިއަން އާއި 20 ބިލިއަން އެމެރިކާ ޑޮލަރާ ދެމެދުގެ އަގުހުރި މުއާމަލާތެއްގެ ގޮތުގައި ސިފަކުރާ މި މަޝްރޫއަކީ، ގައުމީ ސިޔާދަތާއި، އިގްތިސާދީ މިނިވަންކަމާއި، އިސްލާމީ ވަހުދަތަށް ބޮޑެތި ނުރައްކާތަކެއް ކުރިމަތިކުރުވާނެ "ބޮޑު ގެއްލުމެއް" ކަމަށް ގިނަ މުހައްލިލުން ދަނީ އިންޒާރު ކުރަމުންނެވެ.

1. އިގްތިސާދީ ގޮތުން ހުރި ބޮޑެތި ނުރައްކާތަކާއި ގޮންޖެހުންތައް

ޓެރަރިސްޓް އިސްރާއީލަށް ހަރަދު ކުރާ ވިޔަފާރިވެރިއެއްގެ އަތްމައްޗަށް ރަސްމާލޭގެ ބިމުން ބޮޑު ބައެއް ދޫކޮށްލުކީ އިގްތިސާދީ ގޮތުންވެސް ބޮޑެތި ނުރައްކާތަކާއި ގޮންޖެހުންތައް ހުރި ކަމެކެވެ. އެގޮތުން؛

1. ގައުމީ އިގްތިސާދަށްވުރެ ބޮޑު މަޝްރޫއެއްގެ ނުރައްކާ: ދިވެހިރާއްޖޭގެ މުޅި ގައުމީ އުފެއްދުންތެރިކަން (GDP) އަހަރަކު 6 ބިލިއަން އާއި 7 ބިލިއަން ޑޮލަރާ ދެމެދުގައި އުޅޭއިރު، މުޅި އިގްތިސާދަށްވުރެ ދެގުނަ ބޮޑު 12 ބިލިއަން އާއި 20 ބިލިއަން ޑޮލަރުގެ މަޝްރޫއެއްގެ ކާމިޔާބީއަށް ގައުމު ބަރޯސާވުމަކީ މާލީ ނިޒާމު ނުރައްކަލުގެ ތެރެއަށް ވައްޓާލެވޭނެ ކަމެކެވެ.
2. ބައިނަލްއަގުވާމީ މާކެޓް ރިސްކާއި މާލީ ފެއިލިއާ: ބައިނަލްއަގުވާމީ ރިއަލް އެސްޓޭޓް މާކެޓަށް އަންނަ ލޮޅުމެއްގެ ސަބަބުން މި މަޝްރޫއު ހުއްޓިއްޖެނަމަ، ނުވަތަ އެކަށީގެންވާ ގޮތެއްގައި ރިއަލް އެސްޓޭޓް ނުވިއްކިއްޖެނަމަ، އޭގެ ސީދާ ނޭދެވޭ އަސަރު ދިވެހިރާއްޖޭގެ މާލީ ނިޒާމަށާއި ބޭންކިންގް ދާއިރާއަށް ކުރާނެއެވެ.
3. ޝަފާފުކަން ނެތުމާއި ސިއްރު އެއްބަސްވުން: ސަރުކާރުން ސޮވްރިން ގަރަންޓީއެއް ނުދޭ ކަމަށް ބުނި ކަމުގައިވިޔަސް، ދެފަރާތުގެ ދެމެދުގައި ވެވިފައިވާ އެއްބަސްވުމުގެ ފުރިހަމަ ތަފްސީލު އާންމުނުކޮށް ސިއްރުކޮށްފައި އޮތުމަކީ ގައުމީ މާލިއްޔަތަށް އޮތް ބޮޑު ނުރައްކަލެކެވެ.
4. ވަޒީފާގެ ފުރުސަތުތަކުގެ ހަގީގަތް: މަޝްރޫއުގެ ސަބަބުން 54،000 ވަޒީފާ އުފެދޭނެ ކަމަށް ބުނި ނަމަވެސް، މީގެ ތެރެއިން އެންމެ އެކަށީގެންވާ ބޮޑު ބައެއް ހިއްސާކުރާނީ ބޭރުގެ ބިދޭސީ އެކްސްޕެޓް މަސައްކަތްތެރިން ކަމަށްވާތީ، ދިވެހިންނަށް ލިބޭނެ ހަގީގީ ފައިދާއާމެދު ސުވާލު އުފެދެއެވެ.

2. ގައުމީ މިނިވަންކަމާއި ސިޔާދަތަށް ހުރި ތުރާލާއި ނުރައްކާ

ޓެރަރިސްޓް އިސްރާއީލަށް ހަރަދު ކުރާ ވިޔަފާރިވެރިއެއްގެ އަތްމައްޗަށް ރަސްމާލޭގެ ބިމުން ބޮޑު ބައެއް ދޫކޮށްލުމަކީ ގައުމީ މިނިވަންކަމާއި ސިޔާދަތަށް ވެސް ނުރައްކާތެރިކަން ބޮޑު ކަމެކެވެ. އެގޮތުން؛

1. 99 އަހަރުގެ ބިމުގެ ކޮންޓްރޯލް ގެއްލުން: ގައުމެއްގެ އެންމެ މުހިންމު ސަރަހައްދުން 500 ހެކްޓަރުގެ ބޮޑު ބިމެއް 99 އަހަރަށް ބޭރުގެ އަމިއްލަ ކުންފުންޏަކަށް ދިނުމަކީ، އެ ސަރަހައްދުގެ އަމަލީ އަދި އިގްތިސާދީ ކޮންޓްރޯލް ދިވެހި ދައުލަތުގެ އަތުން ބޭރުވެގެންދާނެ ކަމެކެވެ.
2. ޖިއޯޕޮލިޓިކަލް ނުފޫޒާއި ޚާރިޖީ ސިޔާސަތު ބަލިކަށިވުން: ބޭރުގެ ބޮޑެތި އިންވެސްޓަރުންނާއި އެފަރާތްތަކުގެ ފަހަތުގައިވާ ބާރުތަކުން ރާއްޖޭގެ އިގްތިސާދުގެ ބޮޑު ބައެއް ހިއްސާކުރަން ފެށުމުން، ގައުމީ ނިންމުންތަކަށާއި ޚާރިޖީ ސިޔާސަތުތަކަށް އެފަރާތްތަކުގެ ސީދާ ނުފޫޒު ފޯރުމުގެ މަގު ހުޅުވިގެންދާނެއެވެ.
3. އިންވެސްޓަރުންގެ ހައްގުތަކުގެ ނަމުގައި ސިޔާދަތީ ބާރު ކުޑަވުން: ބައިނަލްއަގުވާމީ އިންވެސްޓްމަންޓް ގާނޫނުތަކުގެ ދަށުން އިންވެސްޓަރުގެ މަސްލަހަތު ހިމާޔަތްކުރުމަށް ދެވޭ ގާނޫނީ ބާރުތަކުގެ ސަބަބުން، ދިވެހި ރައްޔިތުންގެ ގައުމީ މަސްލަހަތަށްވުރެ އިންވެސްޓަރުގެ އަމިއްލަ މަސްލަހަތު އިސްވާ ހާލަތްތައް މެދުވެރިވެގެންދާނެ އެވެ.

3. އިސްލާމީ ވަހުދަތާއި އިޖުތިމާއީ ފޭރާމަށް ކުރާނެ ނޭދެވޭ އަސަރު

ޓެރަރިސްޓް އިސްރާއީލަށް ހަރަދު ކުރާ ވިޔަފާރިވެރިއެއްގެ އަތްމައްޗަށް ރަސްމާލޭގެ ބިމުން ބޮޑު ބައެއް ދޫކޮށްލުމަކީ ދިވެހީންގެ އިސްލާމީ ވަހުދަތާއި އިޖުތިމާއީ ފޭރާމަށް ވެސް ނޭދެވޭ އަސަރު ކުރާނެ ނުރައްކާތެރިކަން ބޮޑު ކަމެކެވެ. އެގޮތުން؛

1. ޒައިނިސްޓް އަދި ބޭރުގެ ނުފޫޒު ބޮޑުވުން: އިސްލާމީ އަޚުވަންތަކަމުގެ ނަމުގައި ހިންގޭ މިފަދަ ބިޔަ މަޝްރޫއުތަކުގެ ފަހަތުގައި، ބައިނަލްއަގުވާމީ އަހޫދީ ޒައިނިސްޓް ވިޔަފާރި ނެޓްވޯކްތަކުގެ ނުފޫޒު އެކުލެވިގެންވާނަމަ، އެއީ ދިވެހިރާއްޖޭގެ ސައްތައިން ސައްތަ އިސްލާމީ ވަހުދަތަށް އޮތް ސީދާ ގޮންޖެހުމެކެވެ.
2. އިޖުތިމާއީ ފަރަގު ބޮޑުވުން: ލަގްޒަރީ ރިއަލް އެސްޓޭޓްތަކުގައި ދިރިއުޅޭ ބޭރުގެ މުއްސަނދިންނާއި، ކައިރީގައި ދިރިއުޅޭ އާންމު ދިވެހި ރައްޔިތުންގެ މެދުގައި އިގްތިސާދީ އަދި އިޖުތިމާއީ ބޮޑު ފަރަގެއް އުފެދި، އިޖުތިމާއީ މަސްލަހަތު ގޯސްވުމަށް މަގުފަހިވެގެންދާނެ އެވެ.
3. ދީނީ އަދި ސަގާފީ އައިޑެންޓިޓީ ހީނަރުވުން: ބައިނަލްއަގުވާމީ ފެންވަރުގެ އެކްސްކްލޫސިވް ސިޓީއެއް ގާއިމުކުރެވޭއިރު، އެތަނުގައި ހިންގޭ އާންމު އާދަކާދަތަކާއި ދިރިއުޅުމުގެ އުސޫލުތަކުގެ ސަބަބުން ދިވެހިރާއްޖޭގެ އިސްލާމީ ސަގާފަތާއި ދީނީ އިޖުތިމާއީ މިންގަނޑުތައް ހީނަރުވެގެންދާނެ އެވެ.

ނިންމުން: ގައުމީ ސިޔާދަތު ގުރުބާންކޮށްލެވޭ ބޮޑު ނުރައްކަލެއް

އީގަލް ހިލްސްއަށް ރަސްމާލެއިން 500 ހެކްޓަރުގެ ބިން 99 އަހަރަށް ދޫކުރުމުގެ މަޝްރޫއަކީ، އިގްތިސާދީ ތަރައްގީގެ ނަމުގައި ގައުމުގެ އެންމެ އަގުހުރި ރައުސްމާލާއި ގައުމީ މިނިވަންކަން ނުރައްކަލުގެ ތެރެއަށް ވައްޓާލެވޭ "ބޮޑު ގެއްލުމެކެވެ". ސައްތައިން ސައްތަ އިސްލާމީ ގައުމެއްގެ ގޮތުގައި ދެމިއޮތް ދިވެހިރާއްޖޭގެ ފަސްގަނޑުން ބޮޑު ބައެއް، ބޭރުގެ ނުފޫޒު ބޮޑު އަމިއްލަ ކުންފުންޏަކަށް ގަރުނެއްގެ މުއްދަތަކަށް ދޫކޮށްލުމަކީ އަންނަން އޮތް ޖީލުތަކުގެ ހައްގުތަކަށް އަރައިގަތުމެވެ. މިއީ ހަމައެކަނި އިގްތިސާދީ ވަސީލަތެއް ދޫކޮށްލުމެއް ނޫނެވެ. މިއީ ގައުމުގެ ސިޔާދަތީ ބާރާއި އިސްލާމީ ވަހުދަތު ބޭރުގެ ފަރާތްތަކުގެ ކޮންޓްރޯލްގެ ދަށަށް ދޫކޮށްލެވޭ ނުރައްކާތެރި ނިންމުމެކެވެ.