ހުޅުމާލޭގައި ދުވާރުމަތީ ބަހައްޓާފައި ހުރި ތަކެތި ނެގުމުގެ މަސައްކަތް ފަށާފައިވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
ހުޅުމާލޭގެ އެކި ސަރަހައްދުތަކުގެ ދުވާރުމަތީގައި އަދި ހެޖު ތެރޭގައި ކެފޭ، ރެސްޓޯރެންޓް އަދި ޓޭކް-އަވޭ ޕޮއިންޓުތަކުން ގޮނޑި މޭޒު ބަހައްޓައިގެން ޚިދުމަތްދެމުން ގެންދާތީ އެ ގޮނޑިތަކާއި މޭޒުތައް، އިއްޔެގެ ނިޔަލަށް ނެގުމަށް އެޗްޑީސީން މިމަހުގެ އެއް ވަނަ ދުވަހު ވަނީ އަންގާފައެވެ.
އެޗްޑީސީން އެންގުމުން ވެސް އެތަކެތި ބަހައްޓާފައިވާ ބައެއް ފަރާތްތަކުން އެތަކެތި ނަގާފައެއް ނުވެއެވެ. އެތައް ފަހަރެއްގެ މަތިން އެޗްޑީސީން އެންގުމުންވެސް ހުޅުމާލޭގެ ބައެއް މަގުތަކުގެ ދުވާރުމަތި އަދިވެސް އޮތީ ގޮނޑި މޭޒުތަކުން ފުރާލާފައެވެ.
ތިން ފަހަރެއްގެ މަތިން އެޗްޑީސީން ވަނީ އެތަންތަން ހުސްކުރުމަށް އަންގާފައެވެ. އެގޮތުން މިދިޔަ ނޮވެމްބަރު 15 އާއި މިދިޔަ ޖުލައި 23 އަދި އޮގަސްޓް އެއް ވަނަ ދުވަހު ވެސް އެ ތަކެތި ނަގަން އެންގިއެވެ.
ދުވާރުމައްޗާއި ހެޖް ތެރޭގައި ގޮނޑިއާއި މޭޒު ބަހައްޓައިގެން ވިޔަފާރި އުސޫލުން ބޭނުން ކުރުމަކީ މަނާ ކަމެކެވެ.
މިގޮތަށް ދުވާރުމަތީގައި ގޮނޑި މޭޒު ފަދަ ތަކެތި ބަހައްޓާފައި ހުންނާތީ އާއި ހިނގާބިނގާވެ އުޅޭ ފަރާތްތަކަށް ދަތިވާ ގޮތަށް ދުވާރު ބޭނުން ކުރުމާއި، ސްކޫލް ހިމެނޭ ސަރަހައްދުތަކުގައި ދުންފަތުގެ އިސްތިއުމާލު ކުރުމުގެ ސަބަބުން އާންމުންނާއި ކުޑަކުދިންނަށް ދުންފަތުގެ ދުމުގެ ނޭދެވޭ އަސަރު ކުރުމާއި، އަދަބާ ހިލާފު އިބާރާތްތަކުން މުއާމަލާތް ކުރާ ކަމުގެ ޝަކުވާ ބެލެނިވެރިންގެ ފަރާތުންނާއި ސްކޫލްތަކުން ވެސް އެ ކޯޕަރޭޝަނަށް ހުށަހަޅާފައިވާ ކަމަށް މީގެކުރިން އެޗްޑީސީން ވަނީ ބުނެފައެވެ.
