ތިނަދޫ ދެކުނު ދާއިރާގެ ކުރީގެ މެމްބަރު އަބްދުﷲ އަހްމަދު އެމްޑީޕީ އާއި ގުޅިވަޑައިގެންފި

ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ އަހްމަދު (އަބުޅޯ) އެމްޑީޕީއާއި ގުޅިވަޑައިގެންފިއެވެ.

އަބްދުﷲ އަހްމަދު އެމްޑީޕީއާ ގުޅިވަޑައިގަތީ މިރޭ ގދ. ތިނަދޫގައި ބޮޑު ބަދަލުގެ ނަމުގައި އެ ޕާޓީން ބޭއްވި ހާއްސަ ޖަލްސާއެއްގައެވެ.

18 ވަނަ ރައްޔިތުންގެ މަޖިލީހުގައި ޖުމްހޫރީ ޕާޓީ ތަމްސީލުކުރެއްވި އަބްދުﷲ އަހްމަދު ވަނީ، އެމްޑީޕީއަށާއި ކުރީގެ ރައީސް މުޙައްމަދު ނަޝީދަށް ވަރަށް ބޮޑަށް ތައުރީފު ކުރައްވައި ވާހަކަދައްކަވާފައެވެ.

ރައީސް ނަޝީދު ގެންދަވަނީ ޗެއަރޕާސަން އިންތިހާބުގެ ކެމްޕޭންގައި ރާއްޖޭގެ އެކި ކަންކޮޅުތަކަށް ދަތުރުކުރައްވައި ޖަލްސާތައް ބާއްވައި ދޮރުން ދޮރަށް ހިންގަވައި ކެމްޕޭން ކުރައްވަމުންނެވެ.

މި ޖަލްސާގައި ވާހަކަދައްކަވަމުން އަބްދުﷲ ވިދާޅުވީ، އެމްޑީޕީއަކީ ނިދާފައި ބޭއްވޭނެ ޕާޓީއެއް ނޫން ކަމަށެވެ. އަދި އޭނާއަކީ އަބަދުވެސް އެމްޑީޕީގެ ފިކުރާ ގާތް ބޭފުޅެއްކަން ފާހަގަކުރައްވައި، ރާއްޖެއަށް ޑިމޮކްރަސީ ގެނައުމަށް އެ ޕާޓީން ކުރާ މުހިންމު މަސައްކަތްތަކުގައި އޭނާގެ ހިއްސާވެސް އޮންނާނެ ކަމަށް ވިދާޅުވިއެވެ.