އިންޑިއާގެ ދަނޑުވެރިކަމުގެ އުފެއްދުންތައް އެތެރެކުރުން ގިނަ ގައުމުތަކަކުން މެދުކަނޑާލައިފި

އިންޑިއާގެ ދަނޑުވެރިކަމުގެ އުފެއްދުންތައް ބޭރުގެ ބާޒާރުތަކަށް އެކްސްޕޯޓްކުރުމުގައި ބޮޑެތި ގޮންޖެހުންތަކަކާ ކުރިމަތިލާން ޖެހިއްޖެއެވެ.

ޖަޕާނުން އިންޑިއާގެ އަނބު އެތެރެކުރުން ހުއްޓާލާފައިވާއިރު، ޗައިނާއިން ވަނީ އިންޑިއާގެ ހަނޑޫ ބަލައިގަންނަން އިންކާރުކޮށްފައެވެ.

ޔޫރަޕާއި ހޮންގް ކޮންގަށް އެކްސްޕޯޓްކުރި ހަވާދުގެ ބައެއް ބާވަތްތަކުން މައްސަލަތަކެއް ފާހަގަކުރެވިފައިވެއެވެ.

ޖަޕާނުގެ ކަރަންޓީން އިންސްޕެކްޓަރުން މިދިޔަ މާރިޗު މަހު އިންޑިއާގެ އުއްތަރު ޕްރަދޭޝްގެ ލަކްނައުގައި ހުންނަ މޭވާ ސާފުކޮށް ރައްކާތެރިކުރާ މަރުކަޒެއް ބަލައި ފާސްކުރުމަށްފަހު، އެ ތަނުގެ ފިއުމިގޭޝަނާއި ސެޓިފިކޭޝަން މަރުހަލާގައި ހުރި އުނިކަންކަމާ މެދު ކަންބޮޑުވުން ފާޅުކުރިއެވެ.

މި މައްސަލައާ ގުޅިގެން، މާރިޗު 25 ގެ ފަހުން ދޫކޮށްފައިވާ ހުރިހާ ސެޓިފިކެޓުތަކެއް ބާތިލުކޮށް، އިންޑިއާއިން އަނބު އެތެރެކުރުން ހުއްޓާލުމަށް ޖަޕާނުން ވަނީ މާރިޗު 31 ގައި ރަސްމީކޮށް ނިންމާފައެވެ.

މި ނިންމުމުގެ ސަބަބުން އަލްފޯންސޯ، ކެސާ، ލެންގްރާ، ބަންގައްނަޕައްލީ، ޗައުސާ އަދި މައްލިކާ ފަދަ މަޝްހޫރު ހަ ބާވަތެއްގެ އަނބު އެކްސްޕޯޓްކުރުމަށް ވަނީ ހުރަސް އެޅިފައެވެ.

އިންޑިއާއިން 2024 އިން 2025 އާ ދެމެދު ޖަޕާނަށް ގާތްގަނޑަކަށް 1.54 މިލިއަން ޑޮލަރުގެ އަނބު އެކްސްޕޯޓްކޮށްފައިވެއެވެ.

ޖަޕާނަކީ އިންޑިއާގެ އަނބުގެ ބޮޑު ބާޒާރަކަށް ނުވި ނަމަވެސް، އެ ޤައުމުގެ ފެންވަރު ހިފެހެއްޓުމުގެ މިންގަނޑުތަކަކީ ބައިނަލްއަޤުވާމީ ދުނިޔޭގައި އިތުބާރު އޮންނަ މިންގަނޑުތަކެކެވެ.

މިކަމާ ގުޅިގެން މަހާރާޝްޓްރާ ސްޓޭޓްގެ ދަނޑުވެރިއެއް ކަމަށްވާ ރާޖޭޝް ޕަޓީލް ބުނި ގޮތުގައި، ޖަޕާނުގެ މިންގަނޑުތަކަށް ފެތުމަށްޓަކައި ގާތްގަނޑަކަށް 80،000 ރުޕީސް (840 ޑޮލަރު)ހަރަދުކޮށްގެން ދަނޑުވެރިކަމުގެ އުސޫލުތައް އިސްލާހުކޮށް، ސޫފި ފަދަ ތަކެތިން ރައްކާތެރިވުމުގެ ތަމްރީނުތައްވެސް ވަނީ ފުރިހަމަކޮށްފައެވެ.

މިފަދަ ހުރަސްތަކުގެ ސަބަބުން ދަނޑުވެރިންނަށް ބޮޑެތި ގެއްލުންތަކަކާ ކުރިމަތިލާން ޖެހިދާނެ ކަމުގެ ބިރު ވަނީ ހީވެފައެވެ.