ބާޒާރުގައި ކަރާގެ އަގު މައްޗަށް، އެހެންތަކެތީގެ އަގުތައް ދަށަށް

ޑިމާންޑަށްވުރެ ސަޕްލައި ދަށްވެ، މާލޭގެ ބާޒާރުގައި ކަރަލުގެ އަގު އުފުލިއްޖެއެވެ.

އިޤްތިޞާދީ ނަޒަރަކުން ބަލާ ނަމަ، ޑިމާންޑަށްވުރެ ސަޕްލައި ދަށްވުމަކީ ތަކެތީގެ އަގު އުފުލިގެންދާނެ ކަމެކެވެ.

މާލޭ މާރުކޭޓްތަކުގައިި މިރަމަޟާންމަހުގެ ފުރަތަމަ ދެ ދިހައެއް ނިމި، ފަހުދިހައަކަށް އެޅިއިރުވެސް ކަރާ ކިލޯއެއްގެ އަގު ހުރީ 20 ރުފިޔާއަށެވެ.

ނަމަވެސް ފަހު ދިހައެއް ފެށުނު ފަހުން، ސަޕްލައި ދަށްވެ، މިހާރު ކަރާ ކިލޯއެއްގެ އަގު ހުރީ 30 ރުފިޔާއަށް އުފުލިފައެވެ. މިއީ މިރަމަޟާންމަހު ކަރާގެ އަގު މައްޗަށް ދިޔަ ފުރަތަމަ ފަހަރެވެ.

ކެއްކުމާއި ކައުންބުއިންތައް ތައްޔާރުކުރުމުގައި އާންމުކޮށް ބޭނުންކުރާ ބާވަތްތަކުގެ އަގުތައް މިރަމަޟާންމަހު އެއް ހަމައެއްގައި ހިފެހެއްޓިފައި ހުރިކަން ފާހަގަކުރެވެއެވެ.

ބައެއް ތަކެތީގެ އަގު އެހެން ރަމަޟާން މަސްތަކާ އަޅާބަލާއިރު ދަށްކަން ފާހަގަކުރެވެއެވެ.

ރަމަޟާންމަސް ފެށުނުއިރު ބާޒާރުން 100 ގްރާމް މިރުސް ގަންނަން ލިބެން ހުރީ 35 ރުފިޔާއާއި 40 ރުފިޔާއާ ދެމެދުގެ އަގެއްގައެވެ. އެކަމަކު މިހާރު ބާޒާރުން 100 ގްރާމް މިރުސް ގަންނަން ލިބެން ހުރީ 15 ރުފިޔާއާއި 25 ރުފިޔާއާ ދެމެދުގެ އަގެއްގައެވެ.

ރަމަޟާންމަސް ފެށުނުއިރު ބާޒާރުން ލުނބޯ ކިލޯއެއް ލިބެން ހުރީ 40 ރުފިޔާއާއި 50 ރުފިޔާއާ ދެމެދުގެ އަގެއްގައެވެ. ނަމަވެސް ލުނބޯ ކިލޯއެއްގެ އަގު މިހާރު ވަނީ 40 ރުފިޔާއާއި 45 ރުފިޔާއާ ދެމެދުގެ އަގަކަށް ތިރިވެފައެވެ.

މީގެކުރިން 140 ރުފިޔާއާއި 150 ރުފިޔާއާ ދެމެދުގެ އަގެއްގައި ގަންނަން ލިބުނު އަނބު ކިލޯއެއް މިހާރު ބާޒާރުން ލިބެން ހުރީ 90 ރުފިޔާއާއި 100 ރުފިޔާއާ ދެމެދުގެ އަގެއްގައެވެ.

ކުރިން 150 ރުފިޔާއަށް ލިބެން ހުރި ޖުމްހޫރީ މޭވާ ކިލޯއެއްގެ އަގު މިހާރު ވަނީ 110 ރުފިޔާއާއި 120 ރުފިޔާއާ ދެމެދުގެ އަގަކަށް ވެށްޓިފައެވެ.

ކެރެޓްގެ އަގަށް ބަދަލު އައިސްފައި ނުވާއިރު ކެރެޓް ކިލޯއެއް ކުރިން އަދި މިހާރުވެސް ހުރީ 40 ރުފިޔާއިން ފެށިގެން 45 ރުފިޔާއާ ދެމެދުގެ އަގެއްގައެވެ.

މީގެ އިތުރުން ފަތްޕިލާވެލީގެ ބާވަތްތަކުގެ އަގުތައް ރަމަޟާންމަހުގެ ފުރަތަމަ 10 ދުވަސް ނިމުނު އިރުވެސް ހުރީ ހަމަ އެއް އަގެއްގައި ހިފެހެއްޓިފައެވެ.

މިގޮތުން، ކުއްޅަފިލާފަތް ބޮނޑިއެއް ލިބެން ހުރީ 15 ރުފިޔާއާއި 20 ރުފިޔާ ދެމެދުގެ އަގެއްގައެވެ. ކޮޕީފަތް ބޮނޑިއެއްގެ އަގު 10 ރުފިޔާގައި ހުރިއިރު 100 ގްރާމް ލެޓިއުސް ގަންނަން ލިބެން ހުރީ 10 ރުފިޔާއާއި 15 ރުފިޔާއާ ދެމެދުގެ އަގެއްގައެވެ.