މުޝްފިޤް ހޯދުމަށް މިހާތަނަށް 53.04 ސްކުއެއާ ނޯޓިކަލް މޭލް ބަލައިފި

ރޭ ދަންވަރު ހިނގި އަލިފާނުގެ ޙާދިސާގައި ރޯވި މުދާ އުފުލާ ބޯޓުން ގެއްލުނު ލ.މާވަށަށް ނިސްބަތްވާ ޢުމުރުން 25 އަހަރުގެ ޢަލީ މުޝްފިގް މުހައްމަދު ޝަރީފު ހޯދުމުގެ މަސައްކަތުގައި ކަނޑާއި ވައިގެމަގުން ޑައިވަރުން އަދިވެސް ހަރަކާތްތެރިވަމުންދާ ކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން މީޑިއާތަކާ ހިއްސާ ކުރި މެސެޖެއްގައި ބުނީ މުޝްފިގް ހޯދުމަށް މިހާތަނަށް 53.04 ސްކުއެއާ ނޯޓިކަލް މޭލް ބަލާފައިވާ ކަމަށެވެ. އެއީ އަންޑަރވޯޓަރ (ޑައިވިންގ) ސަރޗްގެ ގޮތުގައި 64240 އަކަމީޓަރު އަދި ވައިގެ މަގުން 1545 ސްކުއެއާ މޭލް (4000 އަކަމީޓަރު) ކަމަށެވެ.

ހޮޅުދޫ ބޯޓުގައި ރޯވީ ތ.ހިރިލަންދޫން ފުރައިގެން ދަނިކޮށް ރޭ 21:07 ހާއިރުއެވެ. މި ބޯޓުގައި އަލިފާން ރޯވެ އެއްކޮށް ވަނީ އަނދައި ހުލިވެފައެވެ. މިބޯޓު ރޭ ދަންވަރު 02:07 ހާއިރު މުޅިން އަޑިއަށްގޮސްފައިވާކަމަށް އެމްއެންޑީއެފުން މައުލޫމާތުދެއެވެ.

އެމްއެންޑީއެފުން ބުނިގޮތުގައި އެ ބޯޓުން ދަތުރު ކުރަމުން ދިޔައީ ކެޕްޓަންއާއެކު 18 މީހުން ކަމަށާއި 17 މީހުން ސަލާމަތްކޮށްފައިވާ ކަމަށެވެ. އަދި މިހާތަނަށް ނުފެނިވަނީ މުޝްފިގް މުހައްމަދު ޝަރީފެވެ.

ޢަލީ މުޝްފިޤް ހޯދުމުގެ މަސައްކަތް ކޯސްޓްގާޑްގެ ތިން އުޅަންދެއްގެ އިތުރުން ޑައިވަރުންނާއި އެއާރ ކޯރގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ދަނީ ކުރަމުންނެވެ.

ހޮޅުދޫ ބޯޓުގައި އަލިފާން ރޯވިކަމުގެ މަޢުލޫމާތު ލިބުމާއެކު އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑުން، ބޯޓު އޮތް ސަރަހައްދަށް ގޮސް އަލިފާން ނިއްވުމުގައި ވަގުތުން ހަރަކާތްތެރިވެފައިވެއެވެ.