ހުނަރުވެރި މަސައްކަތްތެރިން އުފެއްދުމުގެ މަސައްކަތް ފަށައިފި

ހުނަރުވެރި 100 މަސައްކަތްތެރިން އުފެއްދުމުގެ މަސައްކަތް މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއުޑީސީ) އާއި ޕޮލިޓެކްނިކް ގުޅިގެން ފަށައިފިއެވެ.

މި ޕްރޮގްރާމް ފަށްޓަވައިދެއްވީ ޕޮލިޓެކްނިކްގައި ބޭއްވި ޖަލްސާއެއްގައި މާލޭ ސިޓީ ކައުންސިލްގެ މޭޔަރ އާދަމް ޢާޒިމްއެވެ.

މި ޕްރޮގްރާމް ކުރިޔަށް ގެންދިޔުމުގެ މައިގަނޑު މަގުސަދަކީ އަތްތެރި މަސައްކަތް ކުރުމާއި އިލެކްޓްރިކް ސާމާނު މަރާމާތު ކުރުމާއި ގެތުމާއި ދިގުހެދުން ފެހުމާއި ބޯވަޅު އަޅައި ލިބާސް ފަހަން ދަސްކޮށްދިނުމެވެ.

ހުނަރުވެރި މަސައްކަތްތެރިންގެ އެއް ގިންތިއަކީ "އެންޓަރ ޕްރިނިއަރސް" ޚިޔާލެއް މައްޗަށް ވިޔަފާރިއެއް އުފަންކޮށް އެއިން ނަފާހޯދުން ކަމަށާއި މިފަދަ ފަރާތްތައް ދިވެހި ޒުވާނުންގެ ތެރެއިން މަދުން ނަމަވެސް ފެންނަމުންދާތީ އުފާކުރައްވާ ކަމަށް މޭޔަރ އާދަމް ޢާޒިމް ވިދާޅުވެފައިވެއެވެ.

އަދި ހުނަރުވެރި މަސައްކަތްތެރިން އުފެދުމުން ސަރުކާރަށް ބަރޯސާނުވެ، އަމިއްލައަށް ޢާމްދަނީ ހޯދާނެ މަގު ފަހިވެގެން ދިއުމަކީ ލިބޭނެ އެންމެ ބޮޑު ފައިދާ ކަމަށް މޭޔަރ ވިދާޅުވިއެވެ. މި ކަމުގެ ސަބަބުން ހުނަރުވެރި މަސައްކަތްތެރިން އުފެދި އެ މީހުންގެ އެ ހުނަރު ބޭނުންކޮށްގެން އަމިއްލައަށް ވަޒީފާ އުފައްދާނެ ކަމަށްވެސް ފާހަގަކުރައްވާފައިވެއެވެ.

ހުނަރުވެރި މަސައްކަތްތެރިންގެ 100 މީހުން ތަމްރީނު ކުރުމުގެ މި ޕްރޮގްރާމުގައި، ކުރު މުއްދަތުގެ 6 ކޯސް ހިމެނިގެންވެއެވެ. މީގެން ކޮންމެ ކޯހެއް ކުރިޔަށްދާނީ 5 ދުވަހުގެ މުއްދަތަކަށެވެ. މުސްތަގުބަލުގައި ވެސް މިފަދަ ޕްރޮގްރާމްތައް ގަވާއިދުން ކުރިޔަށް ގެންދިޔުމަށް ރޭވިފައިވާ ކަމަށް ކައުންސިލުން ބުނެފައިވެއެވެ. އަދި މިއީ ރާއްޖޭގެ ޒުވާނުންނާއި އަންހެނުންނަށް ބޭނުންތެރި މަސައްކަތެއްކަން ފާހަގަކޮށްފައިވެއެވެ.