ގަވާއިދާ ހިލާފަށް ޕާކްކޮށްފައިހުރި ވެހިކަލްތަކެއް ހުޅުމާލެއިން ޓޯކޮށްފި

ހިނގާބިނގާވެ އުޅޭ މީހުންނަށާއި އާއްމު ދަތުރުފަތުރަށް ދަތިވާ ގޮތަށް ހުޅުމާލޭގެ މަގުތަކުގައި ޕާކުކޮށްފައި ހުރި 50 އުޅަނދެއް ފުލުހުން ޓޯކޮށްފިއެވެ.

ހުޅުމާލޭގެ މަގުމަތިން އުޅަނދުތައް ޓޯކޮށްފައިވަނީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށާއި، ދަތުރުފަތުރަށް ހުރަސްއެޅޭ ގޮތަށް ހުންނަ އުޅަނދުތައް ނެގުމަށް ކުރިއަށްގެންދާ ޚާއްޞަ މަސައްކަތުގެ ތެރެއިން ކަމަށް ފުލުހުން ވަނީ ބުނެފައެވެ.

ފާއިތުވި 48 ގަޑިއިރުގެ ތެރޭގައި ހުޅުމާލޭގެ އެކި ސަރަހައްދުތަކުން ޖުމްލަ 50 އުޅަނދެއް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

މި އުޅަނދުތަކުގެ ތެރެއިން 48 އުޅަނދެއް ޖޫރިމަނާކޮށްފައިވާއިރު، އޭގެ ތެރޭގައި ހިމެނެނީ ދެ ފުރޮޅުލީ 43 އުޅަނދާއި ހަތަރު ފުރޮޅުލީ 5 އުޅަނދެވެ.

މާލެ ސަރަހައްދުގެ މަގުތަކުގައި ގަވާއިދާ ހިލާފަށް އުޅަނދުތައް ޕާކުކުރުމުގެ މައްސަލަ ބޮޑުވެފައިވާކަން ފާހަގަކުރައްވައި ފުލުހުން ބުނީ ވަކިން ޚާއްޞަކޮށް ސައިކަލު ފަދަ ދެ ފުރޮޅުލީ އުޅަނދުތައް ނުގަވާއިދުން ޕާކުކުރާ މިންވަރު އިތުރުވެފައިވާ ކަމަށެވެ.

އާންމުންނަށް އުނދަގޫވާ ގޮތަށް ޕާކްކޮށްފައި ހުންނަ އުޅަނދުތައް މަގުމަތިން ނެގުމުގެ މަސައްކަތް މެދުނުކެނޑި ކޮންމެ ދުވަހަކުވެސް ކުރިއަށްދާނެ ކަމަށް ފުލުހުން ވަނީ ބުނެފައެވެ.

ޕާކްކުރަން ކަނޑައަޅާފައިވާ ތަންތަނުގައި ޕާކްކުރުމަށް ފުލުހުން ދަނީ އާއްމުންނަށް ހަނދާންކޮށްދެމުންނެވެ.