ސްޓެލްކޯގެ މަގާމުތަކަށް ކުއްލި ބަދަލެއް- އަަޒްހަދުވެސް ވަކިކޮށްފި

ސްޓެލްކޯގެ މެނޭޖިން ޑިރެކްޓަރުކަމުން އަހްމަދު ޝަމާހު ރަޝީދު މިއަދު ވަކިކުރިތާ ގަޑިއިރުތަކެއް ފަހުން އެ ކުންފުނީގެ ޕްރޮކިއުމަންޓް ހެޑް، އަޒްހަދު ރަމީޒް ވެސް މަގާމުން ވަކިކޮށްފި އެވެ.

އެމްޑީ ކަމުގެ މަގާމުން ސަމާހު މިއަދު ވަކިކުރިއިރު އޭނާގެ މައްޗަށް ތުހުމަތު ކުރެވޭ އޯޑިއޯއެއް މީސް މީޑިޔާގައި ދަނީ ދައުރުވަމުންނެވެ.

ލީކުވެފައިވާ އޯޑިއޯގައި ޝަމާހު ކުންފުނީގެ އެތެރޭގައި "ކުރަން އުޅުނު ކަންތައްތައް" އެނގޭނީ ކުންފުނީގެ ޕްރޮކިއުމަންޓް ޑިޕާޓްމަންޓްގެ ޖެނެރަލް މެނޭޖަރު އަޒްހަދާއި އިތުރު އެހެން މީހަކަށް ކަމަށް ބުނެއެވެ. ނަމަވެސް އެއީ ޝަމާހު ކަމެއް ޔަގީނެއް ނޫނެވެ.

އެނގިފައިވާ ގޮތުގައި އަޒްހަދުގެ ބަދަލުގައި ސްޓެލްކޯގެ ޕްރޮކިއުމަންޓްގެ ހިންގުން ވަގުތީ ގޮތުން ހަވާލުކޮށްފައިވަނީ ބިއުރޯ ހެޑް އަސްފާ ހުސައިންއާ އެވެ.

ސްޓެލްކޯގެ މަގާމުތަކަށް މިއަދު ގެނެސްފައިވާ ކުށްލި ބަދަލުތަކާއިއެކު މިހާރު އެކުންފުނީގެ ހިންގުން ވަގުތީ ގޮތުން ހަވާލުކޮށްފައިވަނީ ޑީއެމްޑީ އަޒްވަރާ ކަމަށް އެނގިފައި ވެ އެވެ. އަޒްވަރު އެ ކުންފުންޏާ ގުޅިވަޑައިގަތީ 1997 ގަ އެވެ.