މެލޭޝިއަން މެރިޓައިމް އެކަޑަމީ އާއި އެމްއެސްއެސް ދެމެދު އެއްބަސްވުމެއްގައި ސޮއިކޮށްފި

މެލޭޝިއަން މެރިޓައިމް އެކަޑަމީ އާއި މޯލްޑިވްސް ސްޓޭޓް ޝިޕިންގް (އެމްއެސްއެސް) އާ ދެމެދު އެއްބަސްވުމެއްގައި ސޮއިކޮށްފިއެވެ.

ސޮއިކުރުމުގެ ރަސްމިއްޔާތު އޮތީ މިއަދު ހެނދުނު މެލޭޝިއާގެ މެލަކާގައި ހުންނަ އެމްއެމްއޭއެސްބީ-އެކަޑަމީ ލައުޓް މެލޭޝިއާ (އަލަމް) ކެމްޕަހުގައެވެ.

އެއްބަސްވުމުގައި އެމްއެސްއެމްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގް ޑިރެކްޓަރު އަދި ސީއީއޯ އަޙްމަދު ޝަރީފެވެ. އެމްއެމްއޭއެސްބީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގް ޑިރެކްޓަރު އަދި ސީއީއޯ އެޑީ އަޙްމަދު ކޮހްދްޒާލީއެވެ.

މި އެއްބަސްވުމުގެ އަމާޒަކީ މެރިޓައިމް ތައުލީމާއި ތަމްރީނުގެ ފެންވަރު މަތިކުރުން ކަމަށާއި އެމްއެސްއެސް ކަލާސީން ސްކޮލަރޝިޕްގެ ކެންޑިޑޭޓުންނަށް ހަރުދަނާ ތައުލީމީ އޮނިގަނޑެއް ޤާއިމުކުރުން ކަމުގައި ބުނެފައިވެއެވެ.

މި އެއްބަސްވުމުގެ ދަށުން މެލޭޝިޔާގެ އަލަމްގެ އެޑްވާންސްޑް ސިމިއުލޭޝަން ޓެކްނޮލޮޖީގެ އެހީގައި ބައިނަލްއަޤްވާމީ ފުރުސަތުތައް އިތުރުވެގެންދާނެކަން އެމްއެސްއެސްއިން ފާހަގަކޮށްފައި ވެއެވެ. އަދި މެރިޓައިމް ގްރެޖުއޭޓުންގެ ހަރުދަނާ ޕޫލެއް އުފެދޭނެ ކަމަށް ވެސް ބުނެފައިވެއެވެ.

އެމްއެސްއެސް ކަލާސީން ސްކޮލަރޝިޕްގެ ދަރިވަރުންނަށް ނެވިގޭޝަނާއި އިންޖީނިއަރިންގެ ކޯސްތަކުގެ ދަށުން ތަމްރީން ކުރަމުންދާ އެމްއެމްއޭއެސްބީގެ ވަސީލަތްތައް ބޭނުންކުރުމުގެ ފުރުސަތު އޮންނާނެ ކަމަށް އެއްބަސްވުމުގައި ހިމެނެއެވެ.

މިއަދު ބޭއްވި ސޮއިކުރުމުގެ ރަސްމިއްޔާތުގައި ދިވެހިރާއްޖެއިން މެލޭޝިއާއަށް ކަނޑައަޅުއްވާފައި ހުންނަވާ ސަފީރު ޑޮކްޓަރ. މަރިޔަމް ޝަބީނާ އަހްމަދު ބައިވެރިވެވަޑައިގެންނެވިއެވެ.

ކަލާސީން އިނީޝިއޭޓިވް އަކީ އެމްއެސްއެސްއިން 2021 ވަނަ އަހަރު ފެށި އަހަރީ ސްކޮލަރޝިޕް ޕްރޮގްރާމެކެވެ.