ބޭހަށް ނުގުޑާ ޖަރާސީމުން ތަރައްގީއަށް އަސަރުކުރޭ: މެޑަމް ސާޖިދާ

ބޭހަށް ނުގުޑާ ޖަރާސީމުގެ ނުރައްކަލަކީ ތަރައްގީއަށް ކުރާ ހުރިހާ ކަމެއްގައި އަދި އިގްތިސާދީ މަސައްކަތްތަކަށްވެސް ނޭދެވޭ އަސަރު ކުރުވާނެ މައްސަލައެއް ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެޖެއެވެ.

މެޑަމް ސާޖިދާ މިއެހެން ވިދާޅުވީ ނެޝަނަލް އެކްޝަން ޕްލޭން އޮން އެންޓިމައިކްރޯބިއަލް ރެސިސްޓެންސް އިފްތިތާހް ކުރުމަށް ބޭއްވި ރަސްމިއްޔާތު ޝަރަފްވެރިކޮށްދެއްވާ ދެއްކެވި ވާހަކަފުޅުގައެވެ.

ބޭހަށް ނުގުޑާ ޖަރާސީމުގެ ނުރައްކާ އޮތުމުން އެކަމާ ގުޅޭ ޕްލޭނެއް މިއަދު އިފްތިތާހް ކުރިއިރު މިމައްސަލައިގައި ވަރަށް ދުރަށް ވިސްނަންޖެހޭ ކަމަށާއި މިވަގުތު އޮތް އާންމު ވިސްނުމަކީ ބޭހަށް ނުގުޑާ ޖަރާސީމުގެ ނުރައްކާ އޮތީ ހަމައެކަނި ހޮސްޕިޓަލްތަކާއި ކްލިނިކްތަކާ ހިސާބުގައިކަމަށް ބަލައިގެން ކުރާ ކަމެއް ކުރުން ކަމަށް މެޑަމް ސާޖިދާ ވިދާޅުވިއެވެ.

އެކަމަކު އެއަށް ވުރެ ދުރަށް ވިސްނަންޖެހޭ ކަމަމަށް މެޑްމް ސާޖިދާ ވިދާޅުވިއެވެ.

ޖަރާސީމުތަކާއި ދެކޮޅަށް ބޭނުންކުރާ އެކިބާވަތުގެ ބޭސްތައް ނަހަމަ ގޮތުގައި މަސްވެރިކަމާއި ދަނޑުވެރިކަމުގެ ސިނާއަތުގައި ބޭނުންކުރެވޭނަމަ އެކަމުގެ ނުރައްކާ ވަރަށް ބޮޑު ކަމަށާއި، އޭރުން ކާބޯތަކެތީގެ ނިޒާމާއި ދިރިއުޅުމުގެ ހުރިހާ ކަމަކަށްވެސް ނޭދެވޭ އަސަރުތައް ކުރިމަތިވާނެ ކަމުގައި މެޑަމް ސާޖިދާ ވިދާޅުވިއެވެ.