ރާއްޖޭގައި ގާއިމުކުރި ފުރަތަމަ ޕެޓް ކެއަރ ފެސިލިޓީ "އޮޅުހިޔާ" މިއަދު ހުޅުވައިފި އެވެ.
ހުޅުމާލޭގައި ގާއިމުކޮށްފައިވާ ޕެޓް ކެއާ ފެސިލިޓީ ހުޅުވާދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއެވެ.
މި ރަސްމިޔާތުގައި ރައީސުލް ޖުމްހޫރިއްޔާގެ ނައިބު ހުސެއިން މުހައްމަދު ލަތީފުގެ އިތުރުން ސަރުކާރުގެ ވަޒީރުން ބައިވެރިވަޑައިގެންނެވި އެވެ.
"އޮޅުހިޔާ" ހުޅުވުމުގެ ރަސްމިޔާތުގައި ރައީސް ޑރ.މުއިއްޒު ވިދާޅުވީ އެމަނިކުފާނު މާލޭގައި މޭޔަރު ކަމުގައިި ހުންނެވި ދުވަސްވަރު މާލޭގައި ޕެޓް ކެއާ ސެންޓަރެއް ގާއިމުކުރުމަށް ކުރެއްވި މަސައްކަތައް އޭރުގެ ސަރުކާރުން އެއްވެސް ފުރުސަތެއް ނުދެއްވި ކަމަށެވެ. ނަމަވެސް އެމަނިކުފާނު ވެރިކަމަށް ވަޑައިގެން އެކަމަށް ހާއްސަކަމެއް ދެއްވައި މި ފެސިލިޓީ ގާއިމު ކުރުމުގެ މަސައްކަތް މާލޭ ސިޓީ ކައުންސިލާ ހަވާލުކުރެެއްވިކަން ފާހަގަ ކުރައްވައި ވިދާޅުވީ އެމަނިކުފާނު ބޭނުންފުޅުވެވަޑައިގެންނެވީ އެމަނިކުފާނު މޭޔަރަކަށް ހުންނެވިއިރު ސަރުކާރުން ސިޓީ ކައުންސިލަށް ނުދިން ފުރުސަތު އެމަނިކުފާނުގެ ވެރިކަމުގައި މަޅޭ މާލޭ ސިޓީ ކައުންސިލަށް ދިނުމަށް ކަމަށެވެ.
"އަޅުގަނޑު ބޭނުންވީ ކައުންސިލް މެދުވެރިކޮށް ކުރަން. އަޅުގަނޑު އުޅެ އުޅެ ކުރިޔަ ނުދިން ކަންތައް ސިޓީ ކައުންސިލް މެދުވެރިކޮށް ކުރަން" ރައިސް ވިދާޅުވި އެވެ.
މި ފެސިލިޓީ ގާއިމު ކުރުމުގައި ސަރުކާރުގެ ހަފްތާ14ގައި ހިމަނައިގެން ކުރިއަށް ގެންދެވި ކަމެއްކަން ފާހަގަ ކުރައްވައި ރައީސް ވިދާޅުވީ މި ފެސިލިޓީގެ ސަބަބުން ،މާލޭގައި ބުޅާ ގިނަވަގެން ދިމާވި މައްސަލަތަކަށް ހައްލު ލިބިގެންދާންވެސް ރައީސް ވަނީ ފާހަގަ ކުރައްވބާފަ އެވެ.
މި ފެސިލިޓީގައި ކެޓް ކެފޭއަކާއި ވެޓް ކްލިނިކެއްގެ އިތުރުން ކެޓް ޝޮޕެއް ވެސް ގާއިމުކޮށްފައިވެއެވެ. މި ފެސިލިޓީ އަކީ މާލޭ ސިޓީ ކައުންސިލާ ހަވާލުކޮށްގެން ކުރިއަށް ގެންދިޔަ ފެސިލިޓީއެކެވެ. މާލެ ސަރަހައްދުގެ ޕާރކްތަކާއި މަގުމަތީގައާއި އަދި މިނޫންވެސް އާންމުން އެއްވެ އުޅޭ ސަރަހައްދުތަކުގައި ބުޅާތައް ގިނަވެފައިވުމުން އެ ބުޅާތަކަށް ލިބެމުންދާ އަނިޔާތަކާއި އަދި ތަފާތު ބަލިތައް ޖެހުމުން ސަލާމަތްކޮށް، ބުޅާތައް ދިރިއުޅޭނެ ރައްކާތެރި ސާފު މާހައުލެއް ގާއިމް ކުރުމަށް ހުޅުވި ފެސިލިޓީއެކެވެ.
މީގެ އިތުރުން ގޭގޭގައި ގެންގުޅޭ ބުޅާތަކަށް ފެންވަރު ރަނގަޅު ސިއްހީ ފަރުވާ މި ފެސިލިޓީއިން ލިބިގެންދާނެއެވެ. މި ފެސިލިޓީ ގާއިމްކުރުމުގެ ސަބަބުން އާންމު ރައްޔިތުންނަށް، ބުޅާތައް ގިނަވެފައިވުމުން ދިމާވެފައިވާ އުނދަގޫތަކަށް ހައްލެއް ލިބިގެންދާނެއެވެ. އެގޮތުން މި ފެސިލިޓީ މެދުވެރިކޮށް، ބުޅާތަކަށް ބޭނުންވާނެ ފުރިހަމަ އަޅާލުންލިބިގެންދާނެއެވެ. އޭގެ ތެރޭގައި ބުޅާތައް ކަރަންޓީން ކުރެވޭ ސަރަހައްދަކާއި، ކްލިނިކްއަކާއި، ފާރމަސީއާއި، ލެބޯޓްރީ، އަދި ހިޔާވަހިކަމާއި، އެކަށީގެންވާ ސިއްހީ ފަރުވާ އަދި ކުޅޭ ސަރަހައްދު ފަދަ ތަފާތު ހިދުމަތްތައް އެއް ފުރާޅެއްގެ ދަށުން ލިބިގެންދާނެއެވެ.
