ނައިފަރު ހޮސްޕިޓަލްގައި ޑައިލަސިސް ހިދުމަތް ފަށައިފި

ޅ. އަތޮޅު ނައިފަރުގައި ހުންނަ ޅ.އަތޮޅު ހޮސްޕިޓަލުގައި ޑައިލަސިސް ސެންޓަރުން ޑައިލަސިސްގެ ހިދުމަތް ފަށައިފިއެވެ.

ސަރުކާރުގެ ފެން ކުންފުނި ކަމަށްވާ، އެމްޑަބްލިވްއެސްސީގެ އެހީގައި ބިނާކުރި މި ޑައިލަސިސް ސެންޓަރ ތަރައްގީކޮށްފައި ވަނީ ކިޑްނީގެ ބަލިތަކަށް ފަރުވާ ހޯދާ ބަލި މީހުންނަށް ހާއްސަ ދެ އެނދާއި، 1 އައިސޮލޭޝަން ރޫމް އަދި ޑައިލިސިސް ޚިދުމަތް ފޯރުކޮށްދިނުމަށް ބޭނުންވާ އެންމެ ޒަމާނީ ވަސީލަތްތައް ހިމެނޭހެންނެވެ.

އަދި މިއީ މި ސަރަހައްދުގެ އަތޮޅުތަކުގައި ދިރިއުޅޭ، ކިޑްނީ ބައްޔަށް ފަރުވާ ހޯދާ ފަރާތަކަށް ފަސޭހަކަމާއެކު ފެންވަރު ރަނގަޅު ސިއްހި ހިދުމަތްތައް ފޯރުކޮށްދިނުމަށް ތަރައްގީ ކުރި ސެންޓަރެއް ކަމަށް އެމްޑަބްލިވްއެސްސީން ބުނެފައި ވެއެވެ.

ޅ. އަތޮޅު ހޮސްޕިޓަލުން ބުނެފައިވާގޮތުން، އެ ހޮސްޕިޓަލްގައި ޑައިލަސިސް ހިދުމަތް ފެށީ މިއަދުއެވެ. އެގޮތުން މިތަނުން އެއްފަހަރާ ތިން މީހުންނަށް ހިދުމަތް ދެވޭނެ ގޮތަށް އެނދު ތައްޔާރުކޮށްފައިވާ ކަމަށްވެސް ބުނެފައި ވެއެވެ.

ފަހަކަށް އައިސް ރާއްޖޭގައި ކިޑްނީ ފެއިލްވެ ޑައިލެސިސް ހަދާ މީހުން އިތުރުވެފައިވާ އިރު ސަރުކާރުން މިހާރު މަސައްކަތް ކުރަމުން ގެންދަނީ އަތޮޅުތަކުގެ ގިނަ ހޮސްޕިޓަލުތަކުގައި ވެސް އެ ހިދުމަތް ދިނުމަށެެވެ.