ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ސްވިޒަރލޭންޑްގެ ޖެނީވާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް އެނބުރި ރާއްޖެ ވަޑައިގެންފިއެވެ.
މަޖިލީހުގެ ރައީސް އަބްދުއްރަހީމްގެ މި ދަތުރުފުޅަކީ އިންޓަރ ޕާލަމެންޓަރީ ޔޫނިއަން - އައިޕީޔޫގައި ބައިވެރިވަޑައިގަތުމަށް ކުރެއްވި ދަތުރުފުޅެކެވެ.
އައިޕީޔޫގެ 149 ވަނަ އެސެމްބްލީގައި ބައިވެރިވެވަޑައިގަތުމަށް، ރައްޔިތުންގެ މަޖިލީހުގެ ރައީސް އަބްދުއްރަހީމް ޖެނީވާއަށް ފުރާވަޑައިގަތީ މިދިޔަ ހޮނިހިރު ދުވަހުގެރޭގެ ވަގުތެއްގައެވެ
މިދަތުރުފުގައި މަޖިލީހުގެ ރައީސްގެ އަރިހުގައި، މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު، ހުޅުދޫ ދާއިރާގެ މެންބަރު މުހައްމަދު ޝާހިދު، ވިލިމާލެ ދާއިރާގެ މެންބަރު މުހައްމަދު އިސްމާއީލް، ފުވައްމުލަކު މެދު ދާއިރާގެ މެންބަރު އަލީ ފަޒާދުއާއި ކަނޑިތީމު ދާއިރާގެ މެންބަރު އަމީން ފައިސަލް ބައިވެރިވެވަޑައިގެންނެވިއެވެ.
އައިޕީޔޫއަކީ 157 ގައުމުގެ މައްޗަށް އެކުލެވިގެންވާ ޖަމުއިއްޔާއެކެވެ. އައިޕީޔޫ 149 ވަނަ އެސެމްބްލީ ކުރިއަށްދާނީ މިމަހުގެ 17 ގެ ނިޔަލަށެވެ.
މި ދަތުރުފުޅުގައި އެމަނިކުފާނު ވަނީ މިފަހަރުގެ އެސެމްބްލީގެ މަޢުޟޫޢު ކަމަށްވާ "ސުލްޙަވެރި އަމާން އަދި ދެމެހެއްޓެނިވި މުސްތަޤްބަލެއް ބިނާކުރުމަށް ސައިންސާއި ޓެކްނޮލޮޖީ އަދި އީޖާދުގެ ބޭނުންހިފުން" މި މަޢުޟޫއަށް ތަގުރީރު ކުރައްވާފައެވެ.
އައިޕީޔޫއަކީ ރައްޔިތުންގެ މަޖިލީހަށް އެކިއެކި ގޮތްގޮތުން އެހީތެރިކަން ފޯރުކޮށްދެމުން އަންނަ ޖަމިއްޔާއެކެވެ. ރާއްޖޭގެ ސިޔާސީ ކަންކަން ހަލަބޮލިވާ ވަގުތުތަކުގައި، މަޖިލީހުގެ މެމްބަރުންނަށް ދިމާވާ ގޮންޖެހުންތަކާ ގުޅިގެން އެ ޖަމިއްޔާގެ އެއްބާރުލުން މީގެކުރިން ލިބިފައި ވެއެވެ.
