ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ރަސްމީ ދަތުރުފުޅެއްގައި ސްވިޒަރލޭންޑްގެ ޖެނީވާއަށް ވަޑައިގެންފިއެވެ.
މި ދަތުރުފުޅަކީ އިންޓަރ-ޕާލަމެންޓަރީ ޔޫނިއަން - އައިޕީޔޫގައި ބައިވެރިވަޑައިގަތުމަށް އެ މަނިކުފާނު އެ ގައުމަށް ކުރައްވާ ދަތުރުފުޅެކެވެ.
ރައްޔިތުންގެ މަޖިލީހުގެ އިދާރާއިން ބުނެފައިވަނީ، އައިޕީޔޫގެ 149 ވަނަ އެސެމްބްލީގައި ބައިވެރިވެވަޑައިގަތުމަށް، ރައްޔިތުންގެ މަޖިލީހުގެ ރައީސް އަބްދުއްރަހީމް ޖެނީވާއަށް ފުރާވަޑައިގަތީ ހޮނިހިރު ދުވަހުގެރޭގެ ވަގުތެއްގައި ކަމަށެވެ.
މިދަތުރުފުގައި މަޖިލީހުގެ ރައީސްގެ އަރިހުގައި، މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު، ހުޅުދޫ ދާއިރާގެ މެންބަރު މުހައްމަދު ޝާހިދު، ވިލިމާލެ ދާއިރާގެ މެންބަރު މުހައްމަދު އިސްމާއީލް، ފުވައްމުލަކު މެދު ދާއިރާގެ މެންބަރު އަލީ ފަޒާދުއާއި ކަނޑިތީމު ދާއިރާގެ މެންބަރު އަމީން ފައިސަލް ބައިވެރިވެވަޑައިގަންނަވައެވެ.
އައިޕީޔޫއަކީ 157 ގައުމުގެ މައްޗަށް އެކުލެވިގެންވާ ޖަމުއިއްޔާއެކެވެ. އައިޕީޔޫ 149 ވަނަ އެސެމްބްލީ ކުރިއަށްދާނީ މި މަހުގެ 17 ގެ ނިޔަލަށެވެ.
އައިޕީޔޫއަކީ ރައްޔިތުންގެ މަޖިލީހަށް އެކިއެކި ގޮތްގޮތުން އެހީތެރިކަން ފޯރުކޮށްދެމުން އަންނަ ޖަމިއްޔާއެކެވެ. ރާއްޖޭގެ ސިޔާސީ ކަންކަން ހަލަބޮލިވާ ވަގުތުތަކުގައި، މަޖިލީހުގެ މެމްބަރުންނަށް ދިމާވާ ގޮންޖެހުންތަކާ ގުޅިގެން އެ ޖަމިއްޔާގެ އެއްބާރުލުން މީގެކުރިން ލިބިފައި ވެއެވެ.
