ރައްޔިތުންގެ މަޖިލީހުން ގާނޫނުއަސާސީއަށް ގެނައިސްލާހުތަކަކީ ޤައުމުގެ މިނިވަންކަމާއި ސިޔާދަތު ޙިމާޔަތްކޮށް، ޤައުމުގައި ހަމަޖެހުން ޤާއިމުކުރުމަށް ވަރަށް މުހިންމު އިޞްލާޙުތަކެއް ކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، އެ އިސްލާހް ތަކަކީ ދިވެހީންގެ މިނިވަންކަމާއި، ރާއްޖޭގެ އިހްތިސާސް އަދި ސިޔާސީ ހަމަޖެހުން ކަށަވަރު ކުރުމަށް ލިބިގެން ދިޔަ ކުރިއެރުމެއް ކަމަށެވެ.
މީގެކުރިން ރާއްޖޭގެ ސަރަހައްދު ކަނޑައަޅާފައިވަނީ ރައްޔިތުންގެ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތުން ކަމަށާއި މިހާރު ރާއްޖޭގެ ސަރަހައްދު ކަނޑައަޅާފައިވަނީ ހަތަރު ބައި ކުޅަ ތިން ބައިގެ އަޣުލަބިއްޔަތުން ކަމަށް ރައީސް ވިދާޅުވިއެވެ.
ރައީސް ހިއްސާކުރެއްވި ޕޯސްޓްގައި، ކުރިން ރާއްޖޭގެ ސަރަހައްދަކީ ބޭރު ކަނޑާ ހަމައަށް ކަމާއި މިހާރު ރާއްޖޭގެ ސަރަހައްދަކީ ރާއްޖޭގެ ބޭރު ކަނޑުން ބޭރަށް، ރާއްޖޭގެ 'އެކްސްކުލޫސިވް އިކޮނޮމިކް ޒޯން' އާ ހަމައަށް ކަމަށް ވިދާޅުވިއެވެ.
ރައްޔިތުންގެ މަޖިލީހުން ޤާނޫނުއަސާސީއަށް ގެނައި އިޞްލާޙުތަކާއެކު ރާއްޖޭގައި ބޭރުގެ އެއްވެސް ސިފައިންގެ މީހެއް، ޢަމަލީ ގޮތުން ޙަރަކާތްތެރި ވާނަމަ، އެކަމަށް މަޖިލީހުން ރުހުންލިބި ފާސްވާންޖެހޭކަމަށް ކަނޑައަޅާފައިވާކަން އެމަނިކުފާނު ފާހަގަކުރެއްވިއެވެ.
ހަމަމިއާއެކު، ކުރިން ވޯޓު ނަގަން ޖެހޭ ކަންތައްތަކަކީ ކޮބައިކަން ކަނޑައެޅުމުގެ ބާރު މަޖިލީހަށް ލިބުނު ނަމަވެސް މިހާރު ވޯޓު ނަގަންޖެހޭ ކަންތަައްތަކަށް ބަދަލެއް ގެންނަ ކަމުގައި ވާނަމަ ރައްޔިތުންގެ ވޯޓަކުން އެކަން ފާސްކުރަން ޖެހޭނެ ކަމަށް ރައީސް ހިއްސާކުރެއްވި ޕޯސްޓުގައި ވިދާޅުވެފައި ވެއެވެ.
ހަމަ އެއާއެކު، ޤައުމުގެ ހަމަޖެހުން ޤާއިމުކުރުމަށްޓަކައި 'އެންޓި ޑިފެކްޝަން' ޤާނޫނު އަސާސީގައި ހިމެނުމަކީވެސް ރައްޔިތުންގެ މަޖިލީހުން ނިންމެވި ވަރަށް މުހިންމު ކަމެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ރައްޔިތުންގެ މަޖިލީހުން ޤާނޫނު އަސާސީއަށް ގެނައި އިޞްލާޙުތަކުގެ ތެރޭގައި ރާއްޖޭގެ ތަރައްޤީއަށް ކުރު މެދު އަދި ދުރު ރާސްތާގެ ޕްލޭންތައް ހެދުން ރައީސުލްޖުމްހޫރިއްޔާގެ މަސްއޫލިއްޔަތުގެ ތެރޭގައި ހިމެނިގެން ހިނގައްޖެކަން ފާހަގަކުރެއްވިއެވެ.
