މަޖިލީހުގެ ރައީސް، އެމަނިކުފާނުގެ އުފަން ރަށް ފޮނަދޫގައި

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ލ. ފޮނަދޫއަށް ވަޑައިގެންފިއެވެ.

ރައްޔިތުންގެ މަޖިލީހުގެ އިދާރާއިން ބުނީ ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ލ. ފޮނަދޫގައި ބާއްވާ އާއިލީ ހަވީރެއް ޝަރަފުވެރިކޮށްދެއްވުމަށް އެމަނިކުފާނު މިއަދުގެ ވަގުތެއްގައި ފޮނަދުއަށް ވަޑައިގެންފައިވާ ކަމަށެވެ.

ވެމްކޯގެ "ފަށްޓަމާ އާއިލީ ހަވީރު" ބާއްވާފައިވަނީ މިއަދު ހަވީރު 16:15 ގައި ފޮނަދޫ ބަނދަރު ސްޓޭޖް ސަހައްދުގައެވެ. އާއިލީ ހަވީރުގައި ބައިވެރިވުމަށް ވެމްކޯއިން ވަނީ އެންމެހައި ފަރާތްތަކަށް ދައުވަތުދީފައިވާއިރު މި ހަވީރު ޝަރަފުވެރި ކޮށްދެއްވީ މަޖިލީހުގެ ރައީސް އަބްދުއްރަހީމެވެ.

މި ހަރަކާތް ހިންގުމަށް ވެމްކޯއަށް އެހީތެރިވަނީ ދިވެހި ފުލުހުން، ފެނަކަ ކޯޕަރޭޝަން ލިމިޓެޑް، އެމްޓީސީސީ، ފޮނަދޫ ހެލްތް ސެންޓަރ، ގަމު ރީޖަނަލް ހޮސްޕިތަލުގެ އިތުރުން ވެސް ފޮނަދޫގެ ބައެއް ސްކޫލްތަކާއި މުއައްސަސާތަކެވެ.