ޓައިވާންގެ ކައިރިން ޗައިނާގެ އަސްކަރީ ޖެޓްތައް އުދުއްސަން ފަށައިފި

ޗައިނާގެ އަސްކަރިއްޔާއިން ޓައިވާނާއި ދިމާލަށް 71 އަސްކަރީ މަތިންދާބޯޓާއި 7 ކަނޑުބޯޓު ފޮނުވާފައިވާ ކަމަށް ޓައިވާނުގެ ޑިފެންސް މިނިސްޓްރީން ބުނެފިއެވެ.

އެމެރިކާ އާއި ޓައިވާންއިން ޗައިނާއަށް ބިރު ދައްކަނީ ކަމަށް ޗައިނާއިން ބުނެފައިވާއިރު، މިއީ އެއްދުވަސް ތެރޭގައި ޗައިނާއިން މިހާ ގިނަ އަސްކަރީ އުޅަނދު ޓައިވާންގެ ކައިރިއަށް ފޮނުވި ފުރަތަމަ ފަހަރެވެ. ޗައިނާއިން ފޮނުވާފައިވާ ވައިގެ އުޅަނދު ތަކުގެ ތެރޭގައި އެކިވައްތަރުގެ އަސްކަރީ މަތިންދާބޯޓާއި، ޖެޓްތަކާއި، ޑްރޯންތައް ހިމެނެއެވެ.

މިއަދު ނެރުނު ބަޔާނެއްގައި ޓައިވާނުގެ ޑިފެންސް މިނިސްޓްރީން ބުނެފައިވަނީ ޗައިނާގެ 47 މަތިންދާބޯޓް ޓައިވާން ސްޓްރެއިޓްގެ މީޑިއަން ރޮނގު ހުރަސްކޮށްފައިވާ ކަމަށެވެ. މި ރޮނގަކީ ދެ ގައުމުން ކުރިން ކަނޑައަޅާފައިވާ ނުރަސްމީ ސަރަހައްދީ އިމެއް. ޗައިނާގެ ބޯޓުތައް ދަތުރުކުރަމުން ދިޔަ ގޮތްތައް، އެގައުމުގެ އެއްގަމުގައާއި ކަނޑުގެ އަސްކަރީ ބޯޓުތަކުގައި ގާއިމުކޮށްފައި ހުރި މިސައިލް ސިސްޓަމު ތަކުން ބަލާފައިވާ ކަމަށް މިނިސްޓްރީން ވަނީ ބުނެފައެވެ.

ޓައިވާނަކީ ޗައިނާގެ ބައެއްގެ ގޮތުގައި ގަބޫލުކުރާ ޗައިނާ އިން އިއްޔެ ބުނެފައިވަނީ ޓައިވާނުގެ ވަށައިގެންވާ ކަނޑާއި ވައިގެ ސަރަހައްދުގައި ޗައިނާއިން ތަމްރީނުތަކެއް ކުރިއަށް ގެންގޮސްފައިވާ ކަމަށެވެ. ޗައިނާއިން ބުނެފައިވަނީ މި ތަމްރީނުތަކަކީ އެމެރިކާ-ޓައިވާން ގުޅިގެން ޗައިނާއަށް ބިރުދެއްކުމުގެ މަސައްކަތް އިތުރު ކޮށްފައިވާތީ އެކަމުގެ ރައްދު ކަމަށެވެ.

ޗައިނާ ރުޅި އައިސްގެން މި އުޅެނީ މިދިޔަ ހުކުރު ދުވަހު އެމެރިކާއިން ފާސްކުރި ޑިފެންސް ބިލުގައި ޓައިވާނަށް ދިފާއީ އަދި އަސްކަރީ އެހީ ދިނުމަށް ނިންމާފައި އޮތުމުގެ ސަބަބުންނެވެ. އެމެރިކާއިން ޓައިވާނަށް އެހީ ދިނުމަށް ޗައިނާއިން ދެކޮޅު ހަދާ. ރަސްމީ ގޮތުން ޑިޕްލޮމެޓިކް ގުޅުމެއް ނެތަސް، ޓައިވާނުގެ ބައިނަލްއަގުވާމީ އެންމެ ބޮޑު ވާގިވެރިއަކީވެސް އަދި އެންމެ ގިނައިން ހަތިޔާރު ފޯރުކޮށްދޭ ފަރާތަކީވެސް އެމެރިކާ އެވެ.