ޗައިނާއިން އިންގެރޭސިވިލާތައް ދަތުރުކުރާ ފަރާތްތަކުން ކޮވިޑް-19 ނެގެޓިވް ޓެސްޓެއް ދެއްކުން އެ ޤައުމުގައި މަޖުބޫރުކޮށްފި

ކޮވިޑު ބަލިމަޑުކަމުގައި ޗައިނާގެ ބޯޑަރުތައް ގިނަ ދުވަސްތަކެއް ވަންދެން ބަންދުކޮށްފައި އޮތުމަށްފަހު، ދާދި ފަހުން އެ ޤައުމުގެ ބޯޑަރުތައް ހުޅުވައިލުމާއެކު އަނެއްކާވެސް ޗައިނާގައި ކޮވިޑުގެ ވޭދަނަތައް ފެންނަ އަދަދުތައް މި ވަނީ މައްޗަށް އުފުލެން ފަށައިފައެވެ.

މިއާއިއެކު އެމެރިކާ، ފްރާންސް، އަދި އިންޑިޔާ ހިމެނޭހެން ގިނަ ޤައުމުތަކުން ދަނީ އެ ޤައުމުތަކުގައި އެޅިފައިވާ ކޮވިޑުގެ ފިޔަވަޅުތައް އިތުރަށް ވަރުގަދަކޮށްފައެވެ.

2023 ޖެނުއަރީ 8 ގައި އެ ޤައުމުގެ ހުރިހާ ބޯޑަރުތަކެއްވެސް އަލުން ހުޅުވައިލާނެކަމަށް ޗައިނާއިން ބުނެފައިވާއިރު، އެ ޤައުމުގެ ޑިޕާޓްމަންޓް އޮފް ހެލްތު އެންޑް ސޯޝަލް ކެއަރ އިން މައުލޫމާތު ދެއްވާގޮތުގައި، ޖެނުއަރީމަހުގެ 5 ވަނަ ދުވަހުން ފެށިގެން އެ ޤައުމުން ޑައިރެކްޓް ފްލައިޓް ތަކުގައި ދަތުރުކުރާ ފަރާތްތަކުން ދަތުރުގެ ކުރިން ޕީސީ އާރ ޓެސްޓް ހެދުން ލާޒިމްވާނެ ކަމަށެވެ.

ޖެނުއަރީމަހުގެ 8 ވަނަ ދުވަހުން ފެށިގެން ޗައިނާއިން ޑައިރެކްޓް ޕްލައިޓްތަކުގައި އެ ޤައުމަށް އެތެރެވާ ފަރާތްތަކުގެ ކޮވިޑް ސާމްޕަލް ތަކުގެ ނަތީޖާތައް ބަލަމުން ގެންދާނެކަމަށް އިންގެރޭސިވިލާތުގެ ހެލްތު ސެކިއުރިޓީ ޑިޕާޓްމަންޓް އިން ބުނެފައިވާއިރު މި ފަދަ ފިޔަވަޅެއް އަޅަން ޖެހުނީ ޗައިނާގެ ފަރާތުން، އެ ޤައުމުގައި ކޮވިޑު ފެތުރޭމިންވަރާއި ބަލީގެ އެންމެ ސާފު އަދާހަމަތައް ހިއްސާކުރެވެމުން ނުދާތީ ކަމުގައި އެ ޑިޕާޓްމަންޓުން ބުނެފައިވެއެވެ.

މި ފަދަ ދަނޑިވަޅެއްގައި ދުނިޔޭގެ ޤައުމުތަކުން އަޅަމުންދާ ފިޔަވަޅުތަކަކީ ބަލައިގަނެވޭ ފިޔަވަޅުތަކެއް ކަމުގައި ދުނިޔޭގެ ޞިއްހަތު ޖަމްޢިއްޔާ، ޑަބްލިޔުއެޗްއޯ އިންވެސް ވަނީ ބުނެފައެވެ.

ޗައިނާގެ ފޮރިން މިނިސްޓްރީން ހާމަކުރާ ގޮތުގައި އެ ޤައުމުގެ ކޮވިޑު ބަލިމަޑުކަމުގެ ޙާލަތުވަނީ އެންމެ ފުރިހަމަ ކޮންޓްރޯލްގެ ދަށުގައި ކަމުގައެވެ. އެހެން ނަމަވެސް ދުވާލެއްގެ މައްޗަށް އެ ޤައުމުގައި ކޮވިޑު ބަލި ރިޕޯޓުކުރާ އަދަދުތައް އުޅެނީ 5000 ން މަތީގައި ކަމުގައި ރިޕޯޓުތައް ބުނެ އެވެ.

ޗައިނާގައި ދުވާލެއްގެ މައްޗަށް ބައްޔަށް ފައްސިވާ އަދި ބަލީގައި މަރުވާ މީހުންގެ ސީދާ އަދަދުތައް ކަމާބެހޭ ވުޒާރާތަކުން ހާމަކުމުން ނުވާއިރު ކޮރެއާ، އިސްރާއީލް އަދި ސްޕެއިނުންވެސް އެ ޗައިނާއިން ޤައުމުތަކަށް އެތެރެވުމުގެ ކުރިން ޓެސްޓް ކުރުމުގެ އުސޫލުތަކެއް ކަނޑައަޅާނެ ކަން މިދިޔަ ހުކުރު ދުވަހު ވަނީ ހާމަކޮށްފައެވެ.