މިނިވަން މުއައްސަސާތަކުގެ ރައީސް އަދި ނައިބު ރައީސް އައްޔަނުކުރުމުގައި އަމަލުކުރުމަށް އެކި ގާނޫނުތަކުގަ ހުރީ އެކިގޮތަށް ކަމަށް ދައުލަތުގެ ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.
އެންޓި ކޮރަޕްޝަން ކޮމިޝަނާއި، އިލެކްޝަންސް ކޮމިޝަނުގެ ރައީސްގެ މަގާމަށް ބޭފުޅުން އައްޔަންކުރުމުގެ ބާރު ރައީސުލްޖުމްހޫރިއްޔާ އަށް ލިބޭ ގޮތަށް ގާނޫނަށް ބަދަލު ގެންނަން ރައްޔިތުންގެ މަޖިލީހަށް އިސްލާހެއް ވަނީ ހުށަހަޅާފައެވެ. އެއާއެކު އިދިކޮޅުން ވަނީ އެ ދެ ކޮމިޝަނުގެ ރައީސް އާއި ނައިބު ރައީސް އައްޔަނު ކުރުމުގެ ބާރު ދިނުމަށް ގާނޫނަށް ބަދަލުގެންނަން ސަރުކާރުން ކުރަމުންދާ މަސައްކަތް ހުއްޓާލަން ގޮޮވާލާފައެވެ.
އެކަމާ ގުޅިގެން އެކްސްގައި ހިއްސާކުރެއްވި ޕޯސްޓެއްގައި އޭޖީ ވިދާޅުވީ މިކަން އެއްގޮތް ކުރުމުގެ ބޭނުމުގައި، މިކަމުގައި ރައީސްގެ ދައުރެއް ބޭއްވުމުގެ މަގުސަދުގައި އިދިކޮޅު އެމްޑީޕީގެ ސަރުކާރުން 2021 ވަނަ އަހަރު ސިވިލް ސަރވިސްގެ ރައީސް އަދި ނައިބު ރައީސްއަކީ ރައީސުލްޖުމްހޫރިއްޔާ އައްޔަންކުރާ މަޤާމްތަކަކަށް ހެދުމަށް ގާނޫނަށް އިސްލާހު ގެނައިކަމަށެވެ. އޭރު މަޖިލީހުގެ ވިލިމާލޭގެ ދާއިރާގެ މެމްބަރުގެ ހައިސިއްޔަތުން އެ ކަމަށް ވޯޓްވެސް ދެއްވި ކަމަށެވެ. އެ އިސްލާހުގެ ބިލަކީ 2021 ވަނަ އަހަރުގެ އެޕްރީލް މަހުގެ 29 ވިީ ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ 37 ވަނަ ޖަލްސާގައި ފާސްކުރި ބިލެކެވެ. އޭރުގެ އޮތީ އެމްޑީޕީގެ މެޖޯރިޓީ މަޖިލީހެކެއެވެ.
އޭޖީ ވިދާޅުވީ އެދުވަހު ސިވިލް ސަރވިސް ގާނޫނަށް ގެނައި އިސްލާހާ މިހާރު ސަރުކާރުން މިނިވަން މުއައްސަސާތަކުގެ ރައީސް އަދި ނައިބު ރައީސް އައްޔަނުކުރުމުގައި އަމަލުކުރުމަށް ހުށަހެޅި އިސްލާހާ އެއްވެސް ތަފާތެއް ނެތް ކަމަށެވެ. އަދި އެދުވަހު ރަނގަޅުވި ކަމެއް މިއަދު ގޯސްކަމަކަށް ވީ ކީއްވެގެންތޯ، އޭޖީ ވަނީ ސުވާލުއުފައްދަވާފައެވެ.
މި ބަދަލުތައް ގެނައުމަށް ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ގާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ ފެލިދޫ ދާއިރާގެ މެމްބަރު އާދަމް ޒާހިރެވެ. އަދި އިލެކްޝަންސް ކޮމިޝަންގެ ގާނޫނަށް އިސްލާހު ގެނައުމުގެ ބިލު ހުށަހެޅުއްވީ ކެލާ ދާއިރާގެ މެމްބަރު އަބްދުﷲ ޝަރީފެވެ.
އިލެކްޝަންސް ކޮމިޝަންގެ ގަވާއިދު މިހާރު އޮންނަގޮތުން އޭސީސީ އަދި އިލެކްޝަންސް ކޮމިޝަނަށްވެސް ރައީސާއި ނައިބު ރައީސް އައްޔަން ކުރަނީ އެ ކޮމިޝަނުގެ މެމްބަރުންގެ މެދުގައި ނަގާ ވޯޓަކުންނެވެ. އަދި އެ މަގާމުގައި ތިއްބަވާ ބޭފުޅުން އިސްތިއުފާ ދޭ ނަމަ، އެކަން އަންގަން ވެސް ޖެހެނީ ކޮމިޝަނަށެވެ. އަދި އެ ބޭފުޅުންގެ ދައުރު ހަމަވެއްޖެ ނަމަ އައު މެމްބަރަކު އައްޔަންކުރުމަށް ފަހު އަނެއްކާ ވެސް ވޯޓަކަށް ދާނީ އެވެ.
ސަރުކާރުގެ ފަރާތުން ހުށަހަޅާފައިވާ އިސްލާހުގައިވާ ގޮތުން ކޮމިޝަނުގެ ރައީސާއި ނައިބުރައީސް އައްޔަންކުރައްވާނީ ރައީސުލްޖުމްހޫރިއްޔާ އެވެ. އަދި އެ މަގާމަށް ބޭފުޅަކު އައްޔަންކުރާނީ ވެސް އެ ކޮމިޝަނުގައި ތިއްބަވާ މެމްބަރުންގެ ތެރެއިން ކަމަށް ވެސް އިސްލާހުގައިވެ އެވެ.ރައީސާއި ނައިބު ރައީސް އައްޔަން ކުރެއްވުމަށް ނަންތައް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެ ކަމަށާއި، ރައީސުލްޖުމްހޫރިއްޔާ މަޖިލީހަށް ހުށަހަޅުއްވާ ނަން ދިރާސާކޮށް މަޖިލީހުން ފާސްކުރަންޖެހޭނެ ކަމަށްވެސް އިސްލާހުގައި ބަޔާންކޮށްފައިވެ އެވެ.
މީގެ އިތުރަށް އެ ދެ މަގާމަށް އައްޔަންކުރާ ބޭފުޅުން އިސްތިއުފާ ދޭން ބޭނުންވާ ނަމަ އެކަން އަންގާ ސިޓީ ހުށަހަޅަން ޖެހޭނީ ވެސް ރައީސުލްޖުމްހޫރިއްޔާ އަށް ކަމަށް ވެސް އިސްލާހުގައި ބަޔާންކޮށްފައިވެ އެވެ.
